თბილისში ბინის ქირა წლიურად გაიაფდა - ბაზრის ტენდენციები

თქვენთვის სასურველ უბანში საშუალო ქირის ფასის გასაგებად მიჰყევით ბმულს.

რატომ იაფდება საცხოვრებელი უძრავი ქონების ქირა თბილისში?

უძრავი ქონების სააგენტოებსა და კვლევებზე დაყრდნობით, დედაქალაქში ქირის  გაიაფებას რამდენიმე  მიზეზი შეიძლება ჰქონდეს:

·         არასტაბილური პოლიტიკური გარემო;

·        მაღალი ინფლაცია (საქსტატის მონაცემებით ოქტომბერში ინფლაციის წლიური დონე 5.2 პროცენტი იყო, ხოლო ნოემბერში გასულ თვესთან შედარებით დაიკლო და 0.4%-ს გაუტოლდა. ამასთან, აგვისტოში ინფლაცია 29-თვიან მაქსიმუმზე იყო და ფასების ზრდა 4.6%-მდე დაჩქარდა);

·         ექსპატების სიმცირე;

·         მიგრაციის ეფექტის ამოწურვა ან საგრძნობლად შესუსტება და სხვა.

მეორე მხრივ, სააგენტოების ნაწილში აღნიშნავენ, რომ რეალურად, ქირაზე მოთხოვნა კვლავ მაღალია, მიწოდება კი, განსაკუთრებით მაღალ სეგმენტში დაბალი და არსებული სტატისტიკა სრულ სურათს ვერ ასახავს.

„საკურა პროფერთის“ დამფუძნებელი ვიქტორია საკუროვა:

„ახლანდელ სტატისტიკას გაზრდილი მიგრაციის პერიოდს თუ შევადარებთ, ბაზარზე ქირის ფასების ცალსახა კლებაა და მიმდინარე თვეების სტატისტიკაში შეიძლება სწორედ აღნიშნული ეფექტი გვქონდეს. ვიტყოდი, რომ  ახლანდელ პერიოდში გაქირავების ფასი საერთოდ არ შეცვლილა, პირიქით, კარგი გასაქირავებელი ბინების დეფიციტია. პრესტიჟულ და მოთხოვნად უბნებში ერთიდან სამ საძინებლამდე უძრავი ქონებები გასაქირავებლად ფაქტობრივად ხელმისაწვდომი არ არის და დამქირავებლები მზადაც კი არიან, მეტი გადაიხადონ“.

ოდნავ განსხვავებულ სურათზე საუბრობს სააგენტოების ნაწილი. „ჯეო რეალთის“ დამფუძნებელი მაია გამზარდია:

„მიგრაციის ეფექტი ახლანდელ ვითარებაზე გავლენას ვეღარ ახდენს და სრულად ჩავლილია. ამჟამად მოთხოვნა შემცირებულია და ფასის კლებაც სწორედ ამით არის განპირობებული.

ნებისმიერ არასტაბილურობაზე ყველაზე მძიმედ რეაგირებს ხოლმე საშუალო სეგმენტი, რომელშიც ბაზარზე უკვე ყველაზე დიდი არჩევანია და პრაქტიკულად, არასდროს დგება დეფიციტი. ყოველთვის დეფიციტურია ბიუჯეტური და მაღალფასიანი სეგმენტი, რადგან ძალიან კარგი ბინები ყოველთვის ცოტა ნაკლებია ბაზარზე.

ყველაზე მეტად ყოველთვის საშუალო სეგმენტში მცირდება ფასები, რასაც მოთხოვნის შემცირების პარალელურად მიწოდების ზრდა განაპირობებს. მაღალფასიან სეგმენტში განსაკუთრებული ინვესტიციებია საჭირო, რასაც როგორც ვხვდები, ერიდებიან საქართველოში და ამიტომაც მოთხოვნის შემცირების პარალელურად მიწოდებაც ცოტა შემცირებულია.

სააგენტოს გამოცდილების საფუძველზე, მაია გამზარდია საუბრობს მოთხოვნის შემცირების მიზეზებზე, განსაკუთრებით მაღალ სეგმენტში:

„შემცირებულია საერთაშორისო ვიზიტორების, უცხოური ბიზნესების, საკონსულოებისა და დიპლომატიური კორპუსების წარმომადგენლების ნაკადი. საქართველოში აღარ ხორციელდება ბევრი საერთაშორისო პროექტი და შესაბამისად მასში მონაწილე პირების რაოდენობაც, რომლებიც აქ წლების განმავლობაში ცხოვრობდნენ. ალბათ საინვესტიციო თვალსაზრისითაც გარკვეული კითხვის ნიშნები არსებობს. ახლა შეიძლება Eagle Hills-ის პროექტმა შეცვალოს სურათი, მაგრამ ბევრმა, ვისაც ჩვენს ქვეყანაში ინვესტირება სურდა, გარკვეული პერიოდი თავი შეიკავა. რეალურად, ასეთი პროექტები ქმნის ბაზარზე მოთხოვნასაც და მიწოდებასაც და ინვესტორები რომ თავს იკავებენ, ეს რა თქმა უნდა, აისახება“, - განმარტა მაია გამზარდიამ.

რა მოლოდინები არსებობს ქირის ფასთან დაკავშირებით?

უძრავი ქონების სააგენტოები ქირის ფასის მნიშვნელოვან ცვლილებებს არ ელოდებიან. იგივე ტენდენცია ფიქსირდება ჩვენი მომხმარებლების განცხადებების მიხედვითაც.

მოთხოვნის შემცირების მიუხადავად, ნაკლებად სავარაუდოა, რომ ფასმა დრამატული ცვლილებები განიცადოს.

უძრავი ქონების ფასები მიბმულია ფისკალურ პოლიტიკაზეც. ინფლაცია აგვისტოში 29-თვიან მაქსიმუმზე იყო, მომდევნო თვეებში შედარებით შემცირდა. გაძვირება კი ძირითადად სამომხმარებლო/სასურსათო პროდუქტებს შეეხო. საინტერესოა, ინფლაციის როგორი ტენდენცია გაგრძელდება და როგორ აისახება ეს უძრავი ქონების ბაზარზე, თუმცა ექსპერტები ფასების თვალსაზრისით მნიშვნელოვან ცვლილებებს არ ელიან.