სამსახურის ხშირი ცვლილება

სამსახურის ხშირმა ცვლილებამ შეიძლება კარიერაზე უარყოფითად იმოქმედოს.  მნიშვნელოვანია ამ  ნაბიჯის ფრთხილად და სტრატეგიულად განხორციელება. თუ გრძნობთ, რომ ძალიან დიდი ხანია ერთსა და იმავე პოზიციაზე მუშაობთ, შეიძლება დაგჭირდეთ ცვლილებები. მაგრამ, რამდენად ხშირად უნდა შეცვალოთ სამსახური ისე, რომ არ იყოს საზიანო თქვენი კარიერისთვის?

რატომაა სამსახურის ხშირი ცვლილება პრობლემა:

• ხელს უშლის სწავლასა და განვითარებას.

1 წელზე მეტია საჭირო ახალი საქმის სრულყოფილად შესწავლის, საკუთარი როლის გაცნობიერების, გარემოზე მორგებისა და დამატებითი პასუხისმგებლობის აღებისათვის. 

თუ სერიოზულად ხართ დაინტერესებული თქვენი სამსახურით და მომავალშიც ამავე სფეროში აპირებთ კარიერის გაგრძელებას, მინიმუმ ერთი წელი უნდა გაატაროთ თქვენს თანამდებობაზე.  ამ პერიოდის განმავლობაში შეიტყობთ უფრო მეტს კომპანიისა და იმ ინდუსტრიის შესახებ, რომელში მოღვაწეობაც გადაწყვეტილი გაქვთ.

• ვერ ხდება პიროვნების რეალიზება და ორგანიზაციისათვის რეალური სარგებლის შექმნა;

ზოგჯერ, სამსახურების ხშირი ცვლილება ჩართულობის ნაკლებობასთან ასოცირდება. კომპანიები დროისა და რესურსების მნიშვნელოვან ნაწილს ინვესტირებენ თავიანთ თანამშრომლებში, მათ ტრენინგებსა და მიმდინარე მოვლენების ჩართულობაში.  შესაბამისად მათ სურთ რესურსები ჩადონ თანამშრომლებში, რომლებიც დაინტერესებულნი არიან გარკვეული წვლილი შეიტანონ კომპანიის განვითარებაში. პოტენციური თანამშრომლის მიერ სამსახურის ხშირი ცვლილება კი კომპანიისათვის არამომგებიანია.

ამის საპირისპიროდ, ერთ სამუშაო ადგილას მიღებული მრავალწლიანი გამოცდილება მიუთითებს პიროვნების ძლიერ ხასიათზე, პრობლემების გადაჭრის უნარზე, ზიანის გამოსწორებასა და რთული მდგომარეობის სასიკეთოდ შემობრუნებაზე.

• უარყოფითად მოქმედებს დამსაქმებელზე.

როგორც წესი, დამსაქმებლებს სურთ დაინახონ, რომ კანდიდატი შეძლებს სამსახურში დარჩენას გრძელვადიანი პერსპექტივით. მხოლოდ რამდენიმე თვით სამსახურის შენარჩუნება  მიუთითებს პასუხისმგებლობის ნაკლებობაზე, არასტაბილურობასა და  ახალ გამოწვევებთან გამკლავების უუნარობაზე-მიუხედავად იმისა, რომ ეს შეიძლება რეალობას არ წარმოადგენდეს.

მიუხედავად სამსახურის ცვლილების კარგი მიზეზებისა, ასეთი გამოცდილება პოტენციურ დამსაქმებელს გაუჩენს კითხვას-დარჩებით თუ არა სამსახურში მას შემდეგ, რაც ორგანიზაცია დიდ რესურსს ჩადებს თქვენში. ამიტომ მისაღებია 1-დან 3 წლამდე გამოცდილება, რათა აჩვენოთ დამსაქმებლებს, რომ შეგიძლიათ გრძელვადიანი თანამდებობის დაკავება. 

რა შემთხვევაშია კარგი სამსახურის ხშირი ცვალა?

მეორე მხირვ წლების განმავლობაში ერთსა და იმავე სამსახურში მუშაობა იშვიათად აძლევს ადამიანს ახალი უნარებისა  და ახალი გამოცდილების მიღების შესაძლებლობას. სამუშაოს ცვლილება ეხმარება ინდივიდს განვითარებაში. მისი ერთ-ერთი უპირატესობა ის არის, რომ გააფართოვოთ უნარები და გაზარდოთ თქვენი ღირებულება კომპანიისთვის.

როდესაც სამსახურის ხშირი ცვლილების მიზეზი არის უკეთესი თანამდებობა, ანაზღაურება და კომაპნია, დამსაქმებლისთვის ცხადი ხდება, რომ გაუმჯობესებული პოზიცია წინა გამოცდილებაზეა დამოკიდებული. ამ შემთხვევაში რეზიუმე მიღწევების სტრატეგიას წააგავს. 

თითოეული ადამიანის გარემოებები განსხვავებულია და ის, რაც ერთისთვის მუშაობს, შესაძლოა მეორესთვის საუკეთესო არჩევანი არ იყოს. დამამთავრებელი კურსის სტუდენტებისა და ახალ კურსდამთავრებულთათვის დამსაქმებლები შედარებით ლმობიერები არიან, როდესაც საქმე წინა გამოცდილებებს ეხება. სტაჟირება  და  მოკლევადიანი სამსახურები ერთი ტიპის არის, რომლებსაც შედარებით მოკლე ვადები აქვთ. ასეთ შემთხვევაში დამსაქმებლები მიესალმებიან ძალისხმევას-მიიღოს პიროვნებამ რაც შეიძლება მეტი გამოცდილება.

რა თქმა უნდა, არის გარემოებები, რომლებიც ამართლებს სამსახურის დატოვების მიზეზებს. ეს შეიძლება იყოს: ნებისმიერი სახის შევიწროება, მოულოდნელი ცვლილებები, სახიფათო სამუშაო გარემო... 

ყოველგვარი ექსტრემალური გარემოებების გამოკლებით, სამუშაოს ცვლილების საიდუმლო იმაში მდგომარეობს, რომ საკმარისად დიდხანს დარჩეთ ერთგულების საჩვენებლად, მაგრამ ასევე მალე დატოვოთ ახალი გამოცდილებისა და უნარების მისაღებად.

ახალი რეალობა

პანდემიამ გარკვეულწილად შეცვალა დასაქმების ტენდენციები. არსებობს გარკვეული ნიშნები, რომ ერთი წლის წესი აღარ არის ისეთივე შეუვალი, როგორც წარსულში. დღესდღეობით დასაქმებულთა უმეტესობა მზად არის სამუშაო ადგილის რამდენჯერმე შეცვლისათვის წინსვლის, ახალი უნარების შეძენისა და უკეთესი სამუშაო გარემოსათვის. მაშინ, როდესაც წინა თაობები, როგორც წესი, თავიანთი კარიერის დიდ ნაწილს ერთ ორგანიზაციაში ატარებდნენ. 

,,სამსახურის ცვლილება გახდა თავისუფალი არჩევანი და ის ხშირად უფრო მეტს ამბობს დამსაქმებლებზე”. (მაიკლ სმეტსი ) 

ადამიანებს ცუდ დამსაქმებელთან დარჩენას ურჩევნიათ ეძებონ ახალი სამუშაო ადგილი, სადაც პრიორიტეტულია თანამშრომლების კეთილდღეობა და დაფასებულია მათი საქმიანობა. ეს ცვლილება დააჩქარა პანდემიამ მომატებული მგრძნობელობისა და არაჯანსაღი სამუშაო პრაქტიკის ფონზე. ამჟამად ნაკლები სტიგმა ენიჭება სამსახურის ხშირ ცვლილებასა და ხანმოკლე სამუშაო გამოცდილებას. პანდემია არის მიზეზი რის გამოც უამრავი ადამიანი უმუშევარი დარჩა ჯანმრთელობაზე ზრუნვის, სამუშაო ადგილის გაუქმების, სამსახურიდან დათხოვნისა და სხვა მიზეზების გამო. ამიტომ დამსაქმებლებს კარგად ესმით შრომით ბაზარზე არსებული ცვლილებები. 

მიუხედავად იმისა, რომ ერთი წლის წესი თანდათან იცვლება მნიშვნელოვანია დაამტკიცოთ თქვენი სტაბილურობა. ახალი დამსაქმებლისათვის გარანტიის მისაცემად, რომ დარჩებით სამსახურში გრძელვადიანი პერსპექტივით უნდა აუხსნათ ძველი ორგანიზაციის დატოვების მიზეზები. განმარტოთ, რომ სამსახურის დატოვების თარიღი დამსაქმებელთან შეათანხმეთ და თქვენ მიერ დაწყებული საქმეები თქვენვე დაასრულეთ.