რას ნიშნავს კომპანიების შემოთავაზებული შიდა განვადება და რა უპირატესობები აქვს მას?

  ბინის შეძენის გადაწყვეტილების მიღების შემდეგ, ძირითად შემთხვევებში, მესაკუთრე იმ არჩევანის წინაშე დგება, თუ რა ფორმით გადაიხადოს შერჩეული უძრავი ქონების საფასური. ხშირად, იპოთეკასა და კომპანიის მიერ შემოთავაზებულ შიდა განვადებას შორის უწევთ არჩევანის გაკეთება.

განვადება გადახდის საშუალებაა, როდესაც შესაძლებელია თანხა ნაწილ-ნაწილ გადავიხადოთ და გადახდის პროცესშივე გავხდეთ ქონების მფლობელი. ანგარიშსწორებისას შიდა განვადების შეთავაზება უკვე თითქმის ყველა სამშენებლო კომპანიას აქვს, ვინც საქართველოს ბაზარზე ოპერირებს. შიდა განვადება გაიცემა მშენებლობის დასრულებამდე მოკლე ვადით, ფინანსური ორგანიზაციების ჩართულობის გარეშე. დეველოპერთა მიერ გამოცხადებულ აქციებში ხშირად შევხვდებით, რომ შიდა უპროცენტო განვადებას გვთავაზობენ, რაც თავისმხრივ ნიშნავს იმას, რომ განვადების პროცენტი ნულის ტოლია, თუმცა მომხმარებელმა უნდა გაითვალისწინოს ის დამატებითი ხარჯები, რაც სესხის გაცემისა და დამტკიცების საკომისიოს დროს ემატება. ეს ხარჯი საწყის ფასს აძვირებს და შესაბამისად მომხმარებელი უფრო მეტს იხდის, ვიდრე ქონების თავდაპირველი ღირებულებაა.

  განვადების პირობები კომპანიის მიერ არის წინასწარ დადგენილი, ძირითად შემთხვევებში საჭიროა წინასწარი შენატანის გაკეთება, რაც კომპანიების მიხედვით, საშუალოდ ქონების ღირებულების 20-დან 50 %-მდე მერყეობს. შიდა განვადებას მიმზიდველს ხდის ის ფაქტიც, რომ წინასწარი შენატანის შემდეგ ქონების ღირებულება თანაბარ ნაწილად იყოფა და გადახდისას მომხმარებელს შეუძლია გადაიხადოს როგორც ყოველთვიურად, ასევე მაგალითად სამ თვეში ერთხელ, უშუალოდ დეველოპერთან შეთანხმებისა და გაფორმებული ხელშეკრულების საფუძველზე.

  უპროცენტო შიდა განვადების მინუსად შეიძლება განვიხილოთ ის, რომ იპოთეკასთან შედარებით მისი გადასახადი ყოველთვიურად უფრო მაღალია. ამის მიზეზს წარმოადგენს მისი მოკლევადიანობა. თუმცა აღნიშნულს აბალანსებს შიდა განვადების ის პირობა, რომ მომხმარებელს შეუძლია ბანკის გვერდის ავლით შეიძინოს უძრავი ქონება, არ მიიღოს უარი იმის გამო, რომ ფორმალური შემოსავალი არ აქვს (მაგალითად დასაქმებულია არაფორმალურად - კერძო რეპეტიტორად, ძიძად და ა.შ.) და არ უფიქსირდება ყოველთვიური ხელფასი ამონაწერში, თუმცა პროფესიიდან და დასაქმების სფეროდან გამომდინარე სტაბილური შემოსავალი აქვს.