როგორ გავხადოთ ზაფხული პროდუქტიული?

სტუდენტებისთვის და სკოლის მოსწავლეებისთვის ზაფხული ის პერიოდია, რომელიც გამოცდების დასრულებასა და დასვენებასთან ასოცირდება, თუმცა ზაფხულის ცხელი დღეების პროდუქტიულად გამოყენებაც შეიძლება, რაც თვითგანვითარებაში, კარიერული ბილიკის აწყობასა და „ჯიბის ფულის“ გამომუშავებაშიც კი შეიძლება დაგეხმაროთ.

შესაძლებელია წინასწარ განსაზღვროთ, თუ როგორ გამოიყენოთ ზაფხულის პერიოდში გამოჩენილი თავისუფალი დრო, როგორც ლოკალურად, ისე ქვეყნის ფარგლებს გარეთ არსებულ პროგრამებზე. ყველანაირი აქტივობა დაგეხმარებათ როგორც ახალი ინფორმაციის და გამოცდილების მიღებაში, ასევე გაგიზრდით სანაცნობო წრეს, რაც შემდგომ თქვენი კარიერის მშენებლობაში ნამდვილად დიდ როლს ითამაშებს.

სწავლა

თუ თქვენი მოტივაცია სრულად სწავლისკენაა მიმართული და დასვენების პერიოდიც ახალი უნარების შესწავლისთვის, ახალი ცოდნების შეძენისა და არსებულის განმტკიცებისთვის გსურთ რომ გამოიყენოთ, მაშინ შეგიძლიათ მოკლევადიანი კურსები გაიაროთ, ვორქშოფებსა და სემინარებს დაესწროთ პირისპირ და ონლაინ შეხვედრებზე. ასეთი სასწავლო პროგრამებია მაგალითად უცხო ენების შემსწავლელი კურსები, საოფისე პროგრამები, პროგრამირება, გრაფიკული დიზაინი, ფინანსური აღრიცხვის ბაზისები და ა.შ. შეგიძლიათ სწავლა და მოგზაურობა ერთმანეთს შეუთავსოთ და ისეთ კურსებზე დარეგისტრირდეთ, რაც სხვადასხვა პროგრამების დახმარებით საზღვარგარეთ ორკვირიან ან ერთთვიან ინტენსიურ სწავლებას მოიაზრებს. ქვეყნის ფარგლებს შიგნით ტრენინგების და კურსების არჩევა კი ss.ge-ს დახმარებითაც შეგიძლიათ.

მოხალისეობრივი პროგრამები

საერთაშორისო ორგანიზაციები ხშირად აცხადებენ ხოლმე მოხალისეობრივ გაცვლით პროგრამებს, სადაც სტუდენტებს აქვთ შესაძლებლობა ზაფხულის პერიოდი ახალ ქვეყანაში გაატარონ, სხვადასხვა აქტივობებში ჩაერთონ და ახალ გამოცდილებებთან ერთად მრავალეროვანი ნაცნობები და მეგობრები შეიძინონ. მოხალისეობრივი პროგრამების ფარგლებში ხშირად არის ისეთი სამუშაოები, როგორიცაა დაწყებითი სკოლის ასაკის ბავშვებისთვის ინგლისური ენის სწავლება, სტაჟირების პროგრამები სხვადასხვა სფეროებში 6-დან 12 კვირამდე ვადით. ხშირად შუამავალი კომპანიები აღნიშნულ პროგრამებში ჩართვის ორგანიზებაში სრულად ეხმარებიან მსურველ კანდიდატებს, ზოგიერთი პროგრამა სრულად ფარავს ყველა ტიპის ხარჯს, ზოგჯერ კი კანდიდატს მხოლოდ გზის ხარჯების დაფარვა უწევს თავად, საცხოვრებელ და კვების ხარჯებს კი ორგანიზაცია უზრუნველყოფს.

საზაფხულო დასაქმება

საზაფხულო დასაქმების პროგრამებით, ძირითადად, მომსახურების სფერო გამოირჩევა, განსაკუთრებით დასასვენებელ კურორტებზე სეზონური კაფე-ბარების პერსონალის დაკომპლექტების მიზნით. მსგავსი ტიპის სამუშაო იმ ადამიანებს მოეწონებათ, ვისაც მცირე დანაზოგის გაკეთება სურს და ადამიანებთან კომუნიკაცია უყვარს. მომსახურების სფეროს გარდა, შესაძლოა მოკლევადიან პროექტებში ასისტირების საჭიროება ჰქონდეთ ორგანიზაციებს, სადაც კონკრეტული პროექტის განხორციელებაში დაეხმარებით ან სტაჟირებას გაივლით. ამ შემთხვევაში არსებობს იმის ალბათობა, რომ თქვენი მომავალი პროფესიის ჭრილში მოხვდეთ ისეთ კომპანიაში, სადაც მიღებული ცოდნა დაგეხმარებათ სამომავლოდ კარიერულ ზრდაში და საჭირო გამოცდილების მიღებაში. გარდა იმისა, რომ შესაძლოა თქვენ ეძებდეთ დასასაქმებელ ადგილს, შესაძლოა დამსაქმებელი თავად ეძებდეს თქვენნაირ კანდიდატს. იმისთვის, რომ შესაბამისმა დამსაქმებელმა თქვენ შესახებ ინფორმაცია მიიღოს, შეგიძლიათ შექმნათ თქვენი სტუდენტური პროფილი მარტივად, ან შექმნათ სამუშაოს მაძიებლის ფორმა.

სხვადასხვა ბანაკებში, აქტივობებსა და პროგრამებში მონაწილეობა ზოგიერთ შემთხვევაში 16 წლიდან შესაძლებელია, თქვენი სანაცნობო წრის გაზრდა და გამოცდილებების დაგროვება სკოლის მაღალი კლასებიდანვე შეგიძლიათ დაიწყოთ, რაც რეალურად სამომავლო პროფესიის განსაზღვრასა და საკუთარი უნარების აღმოჩენაში დაგეხმარებათ.