როგორ შევაფასოთ საკუთარი უნარები

როდესაც ახალი სამსახურის ძებნას იწყებთ, პირველი რაც უნდა გააკეთოთ, არა რეზიუმეს განახლება, არამედ საკუთარ უნარებზე კიდევ ერთხელ დაფიქრება და მათი შეფასებაა. გონებაში თქვენი შესაძლებლობების „დალაგება“ დაგეხმარებათ, რომ რეზიუმე უფრო სტრუქტურირებულად გამართოთ და გასაუბრებისთვისაც თავდაჯერებულად მოემზადოთ. სტატიაში ნახავთ, რა გზებითაა შესაძლებელი საკუთარი უნარების შეფასება:

განსაზღვრეთ თქვენი უნარები

დაფიქრდით იმ უნარებზე, რაც თქვენი სამუშაოს ეფექტურად შესრულებაში გეხმარებათ. შეადარეთ ერთმანეთს ორი ისეთი ადამიანი, ვინც ერთსა და იმავე საქმეს აკეთებს ძალიან კარგად და შედარებით სუსტად და იპოვეთ განსხვავება მათ მიდგომებსა და  უნარებს შორის, დაფიქრდით ძლიერი თანამშრომლის უნარებიდან რომელი შეგესაბამებათ თქვენ, ამ უნარებთან ერთად, ასევე, გაიხსენეთ ყველა ის შემთხვევა, სადაც თქვენი განსაკუთრებულობა გამოგივლენიათ. დაფიქრდით, რა გამოგდით კარგად და რომელი უნარის გამოყენება განიჭებთ სიამოვნებას? გაიხსენეთ ორი-სამი ისეთი შემთხვევაც, სადაც თქვენი უნარების დემონსტრირება მოახდინეთ. თუ კარგად დააკვირდებით, თითოეული მაგალითის გახსენებისას, წამყვანი ქცევის მიღმა თქვენს სხვა, მონათესავე უნარებსაც დაინახავთ. მაგალითად, თუ მოლაპარაკების უნარი თქვენი ძლიერი მხარეა, თუ ჩავუღრმავდებით, შესაძლოა დეტალიზდეთ კონფლიქტის მოგვარების უნარზე და თანამშრომლობის უნარზეც.

ასევე დააკვირდით იმ უნარების ჩამონათვალს, რომელიც ვაკანსიების ტექსტშია ხოლმე მოცემული და ეცადეთ მოძებნოთ შესაბამისობა თქვენს უნარებს შორის. თუკი პირდაპირ ვერ ერგება, შესაძლოა აქაც თქვენი რომელიმე მონათესავე უნარი გაიხსენოთ და მოთხოვნებს შესაბამისად მოერგოთ.

შეაფასეთ თქვენი ცოდნა

კანდიდატები ზოგჯერ ეჭვქვეშ აყენებენ საკუთარ ცოდნას, რადგან არ იციან როგორ გამოიყენონ თეორიული ცოდნები პრაქტიკაში სამუშაო ადგილზე. თუ ფიქრობთ, რომ ნებისმიერ მიმართულებაში - როგორც ტექნიკურში, ასევე პროდუქტის შესახებ - ინფორმაცია არასაკმარისად გაქვთ და ეს თქვენში საკუთარ თავში დაურწმუნებლობის განცდას იწვევს, დაისახეთ მიზნად კონკრეტულ სფეროში ცოდნის გაღრმავება და ამ მიზნისკენ გზას შეუდექით. გარდა ამისა, შეგიძლიათ თქვენ გარშემომყოფებს ჰკითხოთ რეკომენდაციები და აზრი თქვენი კომპეტენციების შესახებ, რაც დაგეხმარებათ, რომ თქვენი თავი განსხვავებული პერსპექტივიდან დაინახოთ, საუკეთესო შემთხვევაში ეჭვები გაფანტოთ და დარწმუნდეთ თქვენს კომპეტენტურობაში, ხოლო სხვა შემთხვევაში - სწორად ამოიცნოთ რა მიმართულებით გჭირდებათ განვითარება.

დააფასე სარგებელი, რომელიც მოგაქვს

გაიხსენე ყველა ის შემთხვევა, როდესაც შენს ორგანიზაციას დაეხმარე პრობლემების გადაჭრაში, ხარისხის გაუმჯობესებასა თუ სიახლის დანერგვაში. შენი წვლილი შეიძლება ინდივიდუალური ყოფილიყო, შეიძლება გუნდთან ერთად დახმარებოდი ორგანიზაციას. ეს კიდევ ორი უნარია, რომელიც გაქვს: გუნდურად და ინდივიდუალურად მუშაობის უნარები. ასევე, კონკრეტულ შემთხვევაზე მუშაობისას, შესაძლოა რესურსებისა და ინფორმაციის მოძიების პროცესში ბევრი საკონტაქტო პირი გაიცანი, კონტაქტებზე წვდომის მქონე კანდიდატი კი ნებისმიერი დამსაქმებლისთვის ბენეფიტია. შენი გამოცდილებიდან გამომდინარე, დაამტკიცე, რომ შენში ჩადებული ინვესტიცია კომპანიას წაადგება.

გაიაზრე, რა გსურს

საკუთარი სურვილების გააზრება დაგეხმარება, რომ სწორ ადგილას მოხვდე. სურვილებში, რა თქმა უნდა, იგულისხმება როგორც სასურველი ანაზღაურება, ისე ნებისმიერი დეტალი, რასაც გსურს, რომ სამსახური გაძლევდეს: განვითარების შესაძლებლობა, ახალი გამოცდილება, წინა დამსაქმებლისგან განსხვავებული მიდგომები თუ პირიქით, მსგავსი და უფრო დახვეწილი; მოქნილი სამუშაო გრაფიკი და ა.შ. ეს სურვილები ყველა ადამიანისთვის ინდივიდუალურია, ჩამოწერე როგორი სამუშაო გარემო გსურს, ისე, რომ შენი სურვილები რეალისტური იყოს და შენი სამომავლო კარიერა და ახალი შესაძლებლობები შენს სურვილებზე დაყრდნობით უფრო მარტივად ხელმისაწვდომი გახდეს. როდესაც ვიცით, რა გვსურს, ჩვენს დროით რესურსს მხოლოდ იმ მხარეს მივმართავთ, რომელი გზითაც ჩვენს კარიერულ დანიშნულების ადგილს მივაღწევთ.

მას შემდეგ, რაც ზემოთ ჩამოთვლილ საფეხურებს გაივლით და თქვენს ცოდნა-უნარებს შეაფასებთ, გახსენით თქვენი რეზიუმეს დოკუმენტი და დაიწყეთ მისი განახლება.