რა როლს ასრულებს ორგანიზაცია თანამშრომლის თვითგანვითარებაში?

თვითგანვითარება პროცესია, როდესაც ადამიანი ცდილობს მუდმივად აიმაღლოს ცოდნა, დააგროვოს მეტი გამოცდილება და გაიუმჯობესოს თავისი უნარები და შესაძლებლობები, რათა გაიზარდოს როგორც პროფესიულად, ისე პიროვნულად. ადამიანებს სჭირდებათ, რომ თავიანთ სამუშაო სფეროში არსებულ სიახლეებს დაეწიონ და ფეხდაფეხ მიყვნენ განვითარების გზას.

ორგანიზაციის პირველი და ყველაზე მნიშვნელოვანი როლი არის, რომ თანამშრომლებს აგრძნობინოს თვითგანვითარების აუცილებლობა. სანამ თანამშრომელი თავად არ გაიაზრებს ამას, სხვისი გარჯა ვერანაირ შედეგს ვერ გამოიღებს. კომპანიებმა უნდა შეძლონ, რომ თანამშრომლებმა გააცნობიერონ, თუ რამდენ და რამხელა ახალ გამოწვევებთან მიიყვანს თვითგანვითარება, რამდენად მნიშვნელოვანი გადაწყვეტილებების მიმღებებად იქცევიან დროთა განმავლობაში. მათთვის თვითგანვითარებისა და საკუთარ თავზე მუშაობის მნიშვნელობის ახსნისა და შედეგების დანახვების გარეშე, მხოლოდ ტრენინგზე ან სემინარზე დასასწრები მოსაწვევის გაგზავნა შედეგიანი ვერ იქნება. ტრენინგ პროგრამების დაგეგმვა, მათი შინაარსის ახსნის გარეშე მხოლოდ დროის დაკარგვაა. ალბათ, იკითხავთ, მაშინ რა არის თვითგანვითარების პროგრამების დანერგვის აზრი, თუკი თანამშრომლები იმავე ბენეფიტს ვერ ხედავენ, რასაც დამსაქმებელი? დამსაქმებლებმა თავიანთ დასაქმებულებს ეს საკითხი ისე უნდა მიაწოდონ, რომ აუხსნან თუ რამდენად საჭიროა განვითარება პირველ რიგში სწორედ თვითონ თანამშრომლებისთვის, როგორ შეძლებენ უფრო პრესტიჟულ პროექტებზე მუშაობას და როგორ მიაღწევენ კარიერული წარმატების მწვერვალებს, ამის ინსტრუმენტად კი შესთავაზონ პროგრამები.

მიეცით თანამშრომლებს დამოუკიდებლობა

თანამშრომლებს არ სჭირდებათ, რომ მუდმივად თავიანთ მენეჯერებზე იყვნენ დამოკიდებულნი, რომ ახალი რაღაცები ისწავლონ. მივცეთ მათ მოტივაცია, რომ სხვადასხვა ვებგვერდების დახმარებით შეძლონ აღმოაჩინონ სიახლეები. დღევანდელ რეალობაში, ინტერნეტი ჩვენი საუკეთესო მეგობარია, საჭირო არ არის, რომ  ფიზიკურად მივიდეთ სადმე, თუ რაიმე ახლის შესწავლა გვსურს, ან რამე გვაინტერესებს. ახალი ინფორმაციის მისაღებად მაუსის ერთი დაწკაპუნებაც საკმარისია. პანდემიის პერიოდმა ისიც დაგვანახა, რომ ცოდნის მიღება სასურველ სფეროში დისტანციურადაც საკმაოდ ეფექტურია.

შექმენით ჯანსაღი სამუშაო გარემო, სადაც თანამშრომლები შეძლებენ, რომ მუდმივად გაიუმჯობესონ საკუთარი ცოდნა-უნარები, წაახალისეთ ისინი, რომ გაუზიარონ ერთმანეთს თავიანთი ცოდნა. დაეხმარეთ თანამშრომლებს, რომ გააანალიზონ, ცოდნა ისეთი რამ არის, რისი მოპარვა ან დაკარგვაც შეუძლებელია. მათი ცოდნა ყოველთვის მათთანაა, თუმცა მისი გაზიარებით, დროთა განმავლობაში ის გაიზრდება, შესაბამისად სხვების გამოცდილებების მოსმენით და საკუთარის გაზიარებით თვითგანვითარებისკენ კიდევ ერთ ნაბიჯს გადადგამენ. თუ ვინმე რაიმე საკითხში არაკომპეტენტურია, ჰკითხოს მეტად გამოცდილ და კომპეტენტურ თანამშრომელს, ვისაც შეუძლია მისი დახმარება და ეს გააუმჯობესებს როგორც თანამშრომლებს შორის ურთიერთობას, უფრო მეტად განამტკიცებს გუნდურობას და პროფესიულად გაზრდის თანამშრომლებს.

დააწინაურეთ თანამშრომლები, რომლებიც მუდმივად ზრუნავენ თვითგანვითარებაზე

თანამშრომელი აუცილებლად უნდა ხედავდეს, რომ მისი სწრაფვა თვითგანვითარებისკენ სწორად არის აღქმული და დანახული ორგანიზაციის მიერ და დამსაქმებელი ამას აფასებს. უნდა გვახსოვდეს, რომ ადამიანი, რომელიც მუდმივად სწავლობს ახალს, ნათლად ვხედავთ როგორ იხვეწება საქმიანობაში და ცდილობს მეტად განვითარდეს, ნამდვილად იმსახურებს ბენეფიტს. დააწინაურეთ ისინი მათი განვითარების შესაბამისად და შესთავაზეთ შესაფერისი სამუშაო პირობები. აგრძნობინეთ თავი განსაკუთრებულად და დაეხმარეთ იმის გაცნობიერებაში, რომ მათი მუდმივი ზრუნვა თვითგანვითარებაზე დაეხმარა არამხოლოდ თავიანთი ცოდნის და თვალსაწიერის გაფართოებაში, არამედ ორგანიზაციაში თავის დამკვიდრებასა და კარიერულ წინსვლაშიც. დაუბრუნეთ თქვენს თანამშრომლებს მუდმივი უკუკავშირი, მათ სჭირდებათ იმის ცოდნაც, თუ რა აქვთ მეტად დასახვეწი და რა ნაწილზე აქვთ სამუშაო. სწორი უკუკავშირი მათ სწორ განვითარებაში დაეხმარება.