რა განსხვავებაა დისტანციურ მუშაობასა და ფრილანსს შორის

ბოლო პერიოდში სიტყვა ფრილანსერი ალბათ ხშირად გსმენიათ, ახალ თაობაში სულ უფრო მეტად პოპულარული ხდება ფრილანსერობა და ის თითქმის ყველა სფეროს ერგება. ფრილანსერები დამოუკიდებელი კონტრაქტორები არიან, რომლებიც თავისუფალი განაკვეთით რამდენიმე კომპანიასთან და რამდენიმე პროექტზე ერთდროულად მუშაობენ, სამუშაო დროს თავად ანაწილებენ და, ფაქტობრივად, თვითდასაქმებულებად ითვლებიან. დისტანციურად მუშაობა კი კომპანიების უმრავლესობამ პანდემიის დროს გამოუვალი მდგომარეობის გამო შემოიღო და ვინაიდან თანამშრომლები დისტანციურადაც ახერხებდნენ პროდუქტიულობის შენარჩუნებას და საჭირო შედეგებზე გასვლას, ბევრმა ორგანიზაციამ შეარბილა პოლიტიკა და თანამშრომლებს პანდემიის შემდგომაც მისცა დისტანციურად დარჩენის ან ჰიბრიდულად მუშაობის ალტერნატივა. ჩვენს ბლოგში იმ მახასიათებლებზე ვისაუბრებთ, რითაც ერთმანეთისგან განსხვავდებიან ფრილანსერები და დისტანციურად მომუშავე ადამიანები.

ფრილანსერებს შეუძლიათ იმუშავონ სასურველი ლოკაციიდან და სასურველ დროს, მათ დამკვეთებისგან მიღებული აქვთ კონკრეტული დავალება და ამ დავალების შესასრულებლად კონკრეტული დრო, რაც პროექტის სიდიდიდან გამომდინარე შეიძლება განსხვავდებოდეს. ფრილანსერმა შეიძლება იმუშაოს დღეში იმდენი საათით, რამდენსაც თავად ჩათვლის საჭიროდ. იმუშაოს დღისით, საღამოს ან შაბათ-კვირას, მთავარია დასრულებული პროექტი დამკვეთს ჩააბაროს დათქმულ დროს, მუშაობის პროცესში კი მას არ აქვს გაწერილი სამუშაო საათები ისე, როგორც საოფისე საქმიანობის დროს ხდება ხოლმე, მაგალითად 09:00 - დან 18:00-მდე. ფრილანსერები თავად წარმართავენ საკუთარ სამუშაო პროცესს, სრულ განაკვეთზე მომუშავე ადამიანებისგან განსხვავებით, თავად ირჩევენ თუ ვისთან ითანამშრომლონ და რომელ დამკვეთს დათანხმდნენ სამუშაოს შესრულებაზე და ხშირ შემთხვევაში თავადვე განსაზღვრავენ ანაზღაურების ტარიფს შესასრულებელი სამუშაოსთვის.

დისტანციურად მომუშავე ადამიანები არიან კვლავ კომპანიაში სრულ განაკვეთზე დასაქმებული ადამიანები, რომლებიც უბრალოდ ოფისის გარეთ ასრულებენ სამუშაოს - სახლიდან ან სასურველი ლოკაციიდან. მათი სამუშაო საათები და ანგარიშვალდებულებები უცვლელია მიუხედავად იმისა, რომ ოფისში არ სხედან. არაერთმა კომპანიამ შესთავაზა თავის თანამშრომლებს ჰიბრიდულად მუშაობის შესაძლებლობა, რაც ნიშნავს იმას, რომ გარკვეულ დღეებში ოფისში სიარულის ვალდებულება აქვთ, ხოლო გარკვეულ დღეებში თავისუფალი არიან თავიანთ არჩევანში, იმუშაონ სახლიდან ან სასურველი ლოკაციიდან. ამ შემთხვევაში ხელფასი ისევ დამსაქმებლის მიერ არის განსაზღვრული და უცვლელია, სამუშაო საათები ისევ დილიდან საღამომდე სტანდარტული გრაფიკით არის და სამუშაო ჯაჭვი დაკავშირებულია სხვა თანამშრომლებთან, შესაბამისად დისტანციურად მუშაობა არ იძლევა იმის საშუალებას, რომ მაგალითად საღამოს საათებში გადაწყვიტოს ადამიანმა საქმის გაკეთება ან თვითონ დაგეგმოს სამუშაო და დასვენების დროები.

ფრილანსერსა და სრულად დისტანციურად მომუშავე ადამიანებს შორის მსგავსებას რაც შეეხება, ორივეს შეუძლია, რომ იმუშავოს საერთაშორისო დამკვეთთან/კომპანიაში თავისი ქვეყნის გარეთ. ფრილანსერები სწორედ უცხოელ დამკვეთებს ანიჭებენ უპირატესობას უკეთესი ანაზღაურების გამო. სხვადასხვა ქვეყნის წარმომადგენლებთან თანამშრომლობა საშუალებას იძლევა, რომ მათი სპეციფიკური მოთხოვნების შესახებ წარმოდგენა შეგექმნათ და ასე თუ ისე, სამომავლოდაც გაითვალისწინოთ, რომელ ქვეყანაში როგორი სამუშაო კულტურაა. ორივე სახის მუშაობას თავისი შეზღუდვებიც აქვს, მაგალითად მომსახურების სფეროში დისტანციურად მუშაობა თითქმის შეუძლებელია, ასეთი ორგანიზაციებია ბანკები, სუპერმარკეტები, აფთიაქები. ასეთი კომპანიების წინა ხაზის (ფრონტის) თანამშრომლები ფიზიკურად ვერ იმუშავებენ დისტანციურად, რადგან მომხმარებელი უშუალო ვიზიტს ახორციელებს ადგილზე. სრულად დისტანციურად ან ჰიბრიდულად მუშაობის საშუალება აქვთ უფრო ბექ-ოფისის თანამშრომლებს, რომლებსაც სტრატეგიული და ანალიტიკური სამუშაო აქვთ და ერთმანეთთან შეხვედრების დაორგანიზება ელექტრონული პლატფორმების დახმარებითაც შეუძლიათ. ფრილანსერობა შესაძლებელია შეუთავსოთ სხვადასხვა პროფესიებსა და სფეროებს, ძირითადად, ფრილანსერებად მუშაობენ გრაფიკული დიზაინერები, UI/UX დიზაინერები, დეველოპერები, IT სფეროს სხვადასხვა მიმართულებით მომუშავე ადამიანები. უმეტესწილად, ციფრულ პლატფორმებთან მუშაობა ამარტივებს ფრილანსერობას, თუმცა არატექნიკურ მიმართულებებშიც დროთა განმავლობაში ინერგება ფრილანსინგის კულტურა, თუ გავითვალისწინებთ იმას, რომ რიგ შემთხვევებში არსებობს საშუალებები, რომ ესა თუ ის მომსახურება (მაგ. HR, იურიდიული) აუთსორსზე გაიტანონ კომპანიებმა და ასეთ დროს სპეციალისტებს შეუძლიათ რამდენიმე კომპანიას ერთდროულად გაუწიონ მომსახურება ინტერესთა კონფლიქტის არარსებობის შემთხვევაში.