როგორ შევათავსოთ სწავლა და მუშაობა

სწავლის და მუშაობის ერთმანეთთან შეთავსება დღესდღეობით ბევრი ადამიანის რეალობაა, ზოგი მათგანი ამას თავად ირჩევს, რადგან სწავლის პარალელურად გამოცდილების დაგროვება და კარიერული ნიადაგის მომზადება სურს, ზოგს კი სხვადასხვა მიზეზების გამო უწევს, რომ სწავლის პარალელურად საკუთარი შემოსავლის წყარო ჰქონდეს მშობლებისგან ფინანსური დამოუკიდებლობისთვის. ორი მნიშვნელოვანი საქმის კეთება ნამდვილად რთული ამოცანაა ისეთ ასაკში, როდესაც ცხოვრების ახალ ეტაპზე გადადის ადამიანი, მოსწავლიდან სტუდენტის სტატუსს იძენს და განსხვავებულ საგანმანათლებლო სისტემასთან აქვს შეხება, თავს ნამდვილად გრძნობს დამოუკიდებელ და ზრდასრულ ადამიანად და მოთხოვნილებებიც ეზრდება, მაგალითად ფინანსური დამოუკიდებლობის სურვილი, საკუთარი საქმის ქონის სურვილი და სხვ. სირთულე კი იმაში მდგომარეობს, რომ ახალ გარემოსთან ადაპტაციის პარალელურად მან უნდა შეძლოს და თავი გაართვას სამუშაო ამოცანებსაც. ზოგ შემთხვევაში ეს საქმიანობა ფიზიკური რესურსის დახარჯვას უთანაბრდება, უფრო ნაკლებ შემთხვევაში კი ინტელექტუალურ სამუშაოს უკავშირდება.

იქიდან გამომდინარე, რომ საკმაოდ რთულია ნახევარ განაკვეთზე ანაზღაურებადი სამსახურების მოძიება ოფისებში, ან უნივერსიტეტში არჩეული სპეციალობის დარგებში, ხშირად ე.წ. „ჯიბის ფულის“ გამომუშავებისთვის, სტუდენტებს კვების სფეროში უწევთ მუშაობა, ცვლებში მუშაობენ სარესტორნო ქსელებში თუ სხვადასხვა კვებისა და გასართობ ობიექტებში, რაც ძალიან დიდი ფიზიკური რესურსის ხარჯვას მოითხოვს და მათი პროდუქტიულობა სწავლისთვის მცირდება. იმისთვის, რომ სწავლა და მუშაობა თავსებადი იყოს და ადამიანი არც გადაწვის ზღვარზე აღმოჩნდეს და საკმარისი რესურსი და მოტივაცია დარჩეს ორივესთვის, ზოგად რჩევებს გაგიზიარებთ:

დაგეგმეთ თქვენი დღე წინასწარ

ე.წ. To do list-ის გაკეთება დღის დასაწყისში ან წინა საღამოს, შედარებით პროდუქტიულს გახდის თქვენს სამუშაო/სასწავლო დღეს და მეტ მოტივაციას მოგცემთ, რომ რაც შეიძლება მეტი დასახული ამოცანის შესრულება მოახერხოთ დღის განმავლობაში. დაგეგმვა დაგეხმარებათ, რომ ორივე ნაწილს დაუთმოთ შესაბამისი ყურადღება და დრო გამონახოთ დასვენებისთვისაც, რათა არ გადაიღალოთ და რესურსები სწორად გადაანაწილოთ. ასევე გამორიცხავთ რაიმე მნიშვნელოვანი დავალების დავიწყებას.

განსაზღვრეთ პრიორიტეტები

მიუხედავად იმისა, რომ შეიძლება მაქსიმალურად ცდილობდეთ, რომ თანაბარი ყურადღება დაუთმოთ სამსახურსა და სწავლას,  დროდადრო შეიძლება ერთერთმა მათგანმა იმდენად გშთანთქოთ, რომ მეორისთვის მინიმალური ყურადღების გამოყოფაც ვერ შეძლოთ. ამის თავიდან ასაცილებლად, საჭიროა, რომ განსაზღვროთ პრიორიტეტები წინასწარ და დასახოთ, რომელია თქვენთვის წამყვანი და რომელი დამატებითი, მოცემული მომენტისთვის. ასევე მნიშვნელოვანია, რომ იმის გათვალისწინებით, რომ სრულ განაკვეთზე მუშაობა ფაქტობრივად გამორიცხავს ხარისხიან სწავლას და პირიქით, აუცილებლად ორივე მხარის წარმომადგენლები უნდა ჩააყენოთ საქმის კურსში თქვენი დატვირთული და მოძრავი გრაფიკის შესახებ. ასევე, უნდა გქონდეთ მზაობა, რომ სწავლისას შეთავსებული სამსახურების უმეტესობა, სხვადასხვა მიზეზების გამო არ არის იმდენად ფინანსურად სარგებლიანი, როგორც სწავლის დასრულების შემდეგ მოძებნილი და სრული განაკვეთის სამსახურები. ამის ერთერთი მიზეზი ისიცაა, რომ ამ ეტაპზე თქვენ გამოცდილების დაგროვების პროცესში ხართ და ორგანიზაციისთვის დამწყებ საფეხურზე განიხილებით.

დაისვენეთ საკმარისად

ორი მნიშვნელოვანი საქმის პარალელურად კეთებისას, გადაღლის და მოტივაციის დაკარგვის თავიდან ასაცილებლად, ყურადღება აუცილებლად უნდა მიაქციოთ თქვენს ენერგიას და პროდუქტიულობას. შეუსვენებელი მუშაობა შესაძლოა იმის საწინდარი გახდეს, რომ საბოლოოდ ვერცერთი შეასრულოთ ხარისხიანად და წინსვლის მაგივრად უკეთეს შემთხვევაში ადგილზე გაიყინოთ, უარესში კი - პროდუქტიულობა დაგიქვეითდეთ და უკან წახვიდეთ. ამიტომ ეცადეთ, რომ აუცილებლად გამოყოთ დასვენების დრო სწავლასა და მუშაობას შორის. აუცილებელია პატარა პაუზის აღება სანამ ერთი საქმიდან მეორეზე გადაერთვებით რომ გონებამ მოასწროს აღქმა, როდის ასრულებს ერთს და იწყებს განსხვავებულ საქმიანობას. დასვენება დაგეხმარებათ ძალების აღდგენაში, მისი პროდუქტიულად გამოყენება და საკუთარი თავისთვის დროის დათმობა საშუალებას მოგცემთ უფრო ეფექტურად გაუძღვეთ სამსახურში დაკისრებულ მოვალეობას და სასწავლო მასალა უკეთ აითვისოთ.