პატარა ბინის დიზაინი: როგორ გავზარდოთ სივრცე?

როდესაც ბევრი საჭირო ნივთი და პატარა სახლი გვაქვს, სივრცის დიზაინის დაგეგმვისას სიფრთხილის გამოჩენა გვმართებს. პატარა სივრცეში უნდა მოვახერხოთ, რომ საყოფაცხოვრებო ნივთები და თავისუფლად გადაადგილების საშუალება ერთნაირად საკმარისი გვქონდეს. ოპტიკური ილუზია მხოლოდ ინტერნეტში ნანახ სურათებში როდი არსებობს, სახლშიც შეგვიძლია ისეთი ავეჯი და ინვენტარი გამოვიყენოთ, რომელიც დიდი სივრცის ილუზიას შექმნის. ამის გაკეთება კი რამდენიმე ხერხის დახმარებითაა შესაძლებელი.

ფერები

სახლის მოწყობისას ფერების შერჩევა ერთერთი ყველაზე მნიშვნელოვანი ეტაპია. ნათელი ფერები სივრცეს ვიზუალურად აფართოებს, ამიტომ, პატარა ბინაში რეკომენდებულია, თუკი ღია ფერებს გამოიყენებთ, თუმცა დიზაინის მთლიანად თეთრ ფერში გადაწყვეტა არ იქნება მართებული, რადგან თეთრი ფერის ჭარბი რაოდენობა სიცივის განცდას ქმნის. უმჯობესია თუ თეთრ ფერთან რომელიმე ღია ფერის დეკორაციას შეურევთ ჩანართების ან სხვადასხვა დიზაინის სახით. ნათელი ფერები შექმნის ინტერიერში დიდი სივრცის ილუზიას.

მრავალფუნქციური ავეჯი

მრავალფუნქციური ავეჯი დაგეხმარებათ, რომ ერთ მათგანს რამდენიმე დანიშნულება შეუსაბამოთ და თქვენს ბინაში ზედმეტი ადგილი გამოათავისუფლოთ. მაგალითად პატარა კომოდი არ დაგჭირდებათ იმ შემთხვევაში, თუკი თქვენს საწოლს ექნება საკმარისი რაოდენობის სათავსო. თუ მაღალჭერიან მაგრამ ვიწრო ბინაში ცხოვრობთ, შეგიძლიათ ე.წ. ანტრესოლი გააკეთოთ და ზედა სართულზე დასაძინებელი სივრცე მოაწყოთ, კიბის ქვეშ არსებული სივრცე კი დახურული და ღია თაროებით შეავსოთ და რაც შეიძლება მეტი სათავსო ჩააშენოთ. კრეატიული გადაწყვეტილებების დახმარებით შესაძლოა სივრცის დაზოგვამდე და ბინაში ადგილის გამოთავისუფლებამდე მარტივად მიხვიდეთ. შეგიძლიათ, ასევე ე.წ. „დამალული საწოლი“ გამოიყენოთ, რომელიც ალაგებულ მდგომარეობაში იკეცება და კედელშიან კარადაში შედის. ასევე, პატარა სივრცისთვის ზედგამოჭრილი ვარიანტია „ტრანსფორმერი“ მაგიდა, რომელიც ორ სხვადასხვა ზომას ითავსებს, დაკეცილ მდგომარეობაში ჟურნალების მაგიდას ემსგავსება, რომელზეც წახემსება ან ყავაზე მეგობრების დაპატიჟებაც შესაძლებელია, გაშლილ მდგომარეობაში კი 8-10 ადამიანს იტევს და მასზე ტრადიციული სუფრის გაშლაც შესაძლებელი ხდება. ასევე, მნიშვნელოვანია ისეთი ავეჯის ქონა-არქონის საკითხი, როგორიცაა, მაგალითად, ტელევიზორის სადგამი. რატომ უნდა დავდგათ ზედმეტი ავეჯი ისედაც პატარა ბინაში, როცა შესაძლებელია, რომ ტელევიზორი კედელზე დავკიდოთ და ამით მნიშვნელოვანი სივრცე გამოვათავისუფლოთ?!

სარკეები და განათება

სარკეების დახმარებით, პატარა სივრცე იზრდება და შედარებით დიდი სივრცის ილუზიას ქმნის. მათი განთავსება სწორ ადგილებში, დაგვეხმარება, რომ პატარა ოთახში ბევრი ნივთისგან ჩახუთულობის შეგრძნება არ დაგვეუფლოს და ბევრად გაზრდილს მოგვაჩვენებს რეალურ სივრცეს. ასეთივე ილუზიაა ხოლმე ლიფტებში, თუკი ძველი აშენებული კორპუსების ლიფტებს დაკვირვებიხართ, სარკიან ლიფტებში ნაკლებად კლაუსტროფობიული გარემოა, ვიდრე სარკის გარეშე ლიფტებში, მით უმეტეს, რომ ლიფტები თანაბარი ზომისაა და ერთადერთი განსხვავება სარკეა.

ასევე მნიშვნელოვანი ფაქტორია განათება, პატარა სივრცეს ნუ გადატვირთავთ ჭაღებითა და ბრებით. უპირატესობა მიანიჭეთ ჭერში ჩამონტაჟებულ ან ჭერზე მიბჯენილ განათებებს, განსაკუთრებით, თუ თქვენს ბინაში ჭერიც დაბალია. რაც შეეხება ბუნებრივ განათებას, დიდი ფანჯრები სივრცეს გაზრდის თქვენს ბინაში და თუ სართულიც ხელს გიწყობთ, უმჯობესია თუ ღია ფერის ფარდებზე შეაჩერებთ თქვენს არჩევანს.