როგორი უნდა იყოს ვაკანსიის ტექსტი, რომ მიიქციოს კანდიდატის ყურადღება

გამოცხადებულ ვაკანსიაზე შესაფერისი კანდიდატის მოძიება საკმაოდ რთული ამოცანაა. HR მენეჯერებს დიდი ძალისხმევის ჩადება უწევთ, რომ შესაბამისი თანამშრომელი შეარჩიონ ვაკანტურ პოზიციებზე. დამსაქმებელსა და კანდიდატებს თავიანთი მოთხოვნები აქვთ, რაც, ხშირად, თანხვედრაში არ არის ხოლმე და მედიატორისა და გამოსავლის მაძიებლის როლი სწორედ HR-ს ეკისრება.

ინფორმაცია კომპანიის შესახებ

იმისთვის, რომ დროითი რესურსი დაიზოგოს და არც კანდიდატებისთვის იყოს ხოლმე ბუნდოვანი კომპანიის მოთხოვნები და არც დამსაქმებელმა დახარჯოს დრო არარელევანტური კანდიდატების გასაუბრებაზე დაბარებით, უმჯობესია, რომ ვაკანსიის განთავსების ეტაპზევე ნათელი იყოს ის ფუნქცია-მოვალეობები, რაც შერჩეულ კანდიდატს დაეკისრება. ამისათვის განცხადების სწორად დადებაა საჭირო. არსებობს გარკვეული მონაცემები, რომლის ვაკანსიის ტექსტში დაკონკრეტებაც საკმაოდ მნიშვნელოვანი და აუცილებელია. მაგალითად, რეკომენდებულია, პირველი რამდენიმე ხაზი თქვენი ორგანიზაციის შესახებ ინფორმაციას დაუთმოთ. უფრო ზუსტად კი, კანდიდატს შეუქმნათ წარმოდგენა იმის შესახებ, თუ ვინ არის მისი პოტენციური დამსაქმებელი, რამდენად სტაბილურია ბაზარზე, რომელი წლიდან ფუნქციონირებს, რა სფეროშია და მხოლოდ ადგილობრივ ბაზარზე ოპერირებს თუ საერთაშორისო მასშტაბითაც. სტარტაპის შემთხვევაშიც, უმჯობესია, თუ ამ ინფორმაციას ვაკანსიის ტექსტში განათავსებთ. აუცილებლად მიუთითეთ ორგანიზაციის დასახელება, რადგან ამით ხაზს გაუსვამთ თქვენს სერიოზულ მიდგომას საქმის მიმართ და მეტად პრეზენტაბელური გამოჩნდებით კანდიდატის თვალში. არ გაუჩენთ ეჭვებს და შეკითხვებს ისე, როგორც დასახელების გარეშე, მხოლოდ „კომპანიები“ ეძებენ დასაქმებსთვის ადამიანებს.

ფუნქცია-მოვალეობები და კვალიფიკაცია

ასევე, მნიშვნელოვანი ნაწილია უშუალოდ ფუნქცია-მოვალეობების განთავსება ვაკანსიის ტექსტში. აუცილებელია, რომ კანდიდატს წარმოდგენა ჰქონდეს შექმნილი რა მოვალეობები დაეკისრება თანამშრომლობის შემთხვევაში და რეზიუმეს გაგზავნამდე აწონ-დაწონოს შეძლებს თუ არა თავის გართმევას. ფუნქცია-მოვალეობების ჩამონათვალის გაკეთებაში დაგეხმარებათ სამუშაო აღწერილობა, რომლის დოკუმენტიც პოზიციის შესაბამისად არის იურიდიულად შედგენილი. ამის შემდეგ მოდის კვალიფიკაციების ველი, სადაც უნდა ჩაიწეროს ის მოთხოვნები, რასაც ორგანიზაცია კანდიდატს უყენებს კვალიფიკაციის თვალსაზრისით. მაგალითად, თუკი კონკრეტული კვალიფიკაცია მოითხოვება კონკრეტულ პოზიციაზე, აუცილებელია, რომ ეს მიეთითოს. ასეთ შემთხვევაში, ისეთი კანდიდატები არ გამოეხმაურებიან ვაკანსიას, ვინც კონკრეტულ კვალიფიკაციას ვერ აკმაყოფილებს. ასევე, მნიშვნელოვანია სწორი სიტყვების შერჩევა განცხადებაში მოთხოვნების ჩამონათვალის შედგენისას.. მაგალითად, აუცილებლად დააკონკრეტეთ რა არის „სასურველი“ და რა - „სავალდებულო“ ან „აუცილებელი“. შეიძლება ტექსტი ფორმულირდეს შემდეგნაირად: „სავალდებულოა X წლიანი გამოცდილება, სასურველია მენეჯერულ პოზიციაზე“ და ა.შ. ამ ფორმულირებას საკუთარი დანიშნულება აქვს, რასაკვირველია.

ბენეფიტები

ფუნქცია-მოვალეობებისა და კვალიფიკაციების შემდგომ მოდის იმ დეტალების ჩამონათვალი, რომელშიც მითითებულია, თუ რას სთავაზობს კომპანიის დასამებულს, რა გრაფიკია გათვლილი მოცემული პოზიციისთვის, სად მდებარეობს სამუშაოს ლოკაცია/ოფისი, სასურველია, რიგ შემთხვევებში მითითებული იყოს ანაზღაურება ან ანაზღაურების დიაპაზონი. იმ შემთხვევაში, თუ ხელფასი ინდივიდუალური მოლაპარაკების საფუძველს წარმოადგენს, შესაძლოა მიუთითოთ, რომ გამოცდილებისა და კვალიფიკაციის გათვალისწინებით მოლაპარაკებადია. სასურველია, ასევე მიუთითოთ ის ბენეფიტები, რასაც რეალურად სთავაზობთ თანამშრომლებს. ეს შესაძლოა იყოს ჯანმრთელობის დაზღვევა, სხვადასხვა ტიპის კორპორატიული ფასდაკლებების ბარათები, ტრენინგების დაფინანსება და ა.შ.

განსაკუთრებით ყურადღება მისაქცევი საკითხია ტექსტის შედგენა ისე, რომ მასში არ იკვეთებოდეს დისკრიმინაციის ნიშნები. ამისთვის არასდროს დააკონკრეტოთ ასაკის ზედა ზღვარი, სქესი ან/და ოჯახური მდგომარეობა. აუცილებლად სწორად მიუთითეთ კომპანიის კორპორატიული ელ.ფოსტის მისამართი, სადაც დაინტერესებული კანდიდატები შეძლებენ გამოხმაურებას.