8 ყველაზე საჭირო უნარი თვითდასაქმებულებისთვის

ყველა ადამიანისთვის მოწოდება არ არის თვითდასაქმება, ბევრი მათგანი უფრო კომფორტულად გრძნობს თავს ტრადიციულ სამსახურში სადაც ყოველდღიური დავალებები და განსაზღვრული სამუშაო აღწერილობა აქვს. თუმცა არიან ადამიანები, რომლებსაც არ სურთ რუტინული სამსახური, სხვებისგან მიღებული დავალებების მიღება და ამოცანების გადაჭრაზე ფიქრი, მათ უფრო მეტი გამოწვევა ურჩევნიათ ცხოვრებაში და კარიერის შექმნა-შენებაც თავად სურთ. საკუთარი საქმეში რომ მოწოდების სიმაღლეზე იდგეთ, საკმარისი არ არის რომ გიყვარდეთ ის საქმე რასაც აკეთებ, საჭიროა განვითარებული გქონდეთ ის უნარებიც, რაც საქმის უკეთ შესრულებაში და ბიზნესის სწორად წარმართვაში დაგეხმარებათ.

ცოდნა

თვითდასაქმებულებისთვის პირველი ყველაზე მნიშვნელოვანი მეგზური ცოდნაა. ვიდრე საქმეს წამოიწყებთ, კარგად უნდა იცოდეთ რის გაკეთებას აპირებთ, ასევე კარგად უნდა იცნობდეთ იმ ინდუსტრიას, რომელშიც აპირებთ საქმიანობას. დაგჭირდებათ დიდი გამოცდილების დაგროვება და მუდმივად საქმის უკეთესობისკენ წარმართვის დაუოკებელი სურვილი.

კომუნიკაცია

წარმატებული თვითდასაქმებულის სტატუსისთვის, დარწმუნდით რომ თქვენი  ვერბალური და წერილობითი კომუნიკაცია მოწოდების სიმაღლეზეა. ბიზნესი წინ ვერ წავა ეფექტური კომუნიკაციის გარეშე. მოგიწევთ მუდმივად და ბევრ ადამიანს ესაუბროთ, რომელთა შორისაც იქნებიან თქვენი ბიზნესპარტნიორებიც, კონკურენტებიც და კლიენტებიც. შესაბამისად, ძალიან მნიშვნელოვანია, რომ გქონდეთ დამარწმუნებელი კომუნიკაციის, გამართული მეტყველებისა და კარგი წერილობითი უნარები.

პრობლემის გადაჭრის უნარი

დამსაქმებლებს თანამშრომლები თავიანთი პრობლემების გადასაჭრელად აჰყავთ. თვითდასაქმების შემთხვევაში კი თქვენთვითონვე ხართ ის ადამიანი, რომელიც „აყვანილია“ და შესაბამისად თქვენვე მოგეთხოვებათ გამონახოთ პრობლემების გადასაჭრელი გზები, დრო, კომპეტენცია და უნარები. თქვენი დროის უდიდესი რესურსი კომპლექსური პრობლემების გადაჭრისკენ იქნება მიმართული, ასე რომ, გამოიჩინეთ ინიციატივა და აიღეთ პასუხისმგებლობა, რომ საკითხები სიღრმისეულად შეისწავლოთ და ეფექტური გამოსავალი მოძებნოთ, კრიტიკული და კრეატიული აზროვნება კი ამ კუთხით სასიცოცხლოდ მნიშვნელოვანია.

ორგანიზებულობა

თქვენ პასუხისმგებელი იქნებით თავდაპირველად ყველა იმ საკვანძო მხარეზე, რაც ნებისმიერ სფეროში მოღვაწე ორგანიზაციას ან ბიზნესს აქვს: ადმინისტრაცია, გაყიდვები, მარკეტინგი, პროდუქტი, ხარისხის კონტროლი... მოგიწევთ ერთდროულად გაუმკლავდეთ რამდენიმე საქმეს. შესაბამისად, თუ საკმარისად სხარტი და ორგანიზებული არ ხართ, რომ სწრაფად გადაერთოთ ერთიდან მეორე საკითხზე ან რამდენიმე ამოცანაზე ერთდროულად იმუშაოთ, დროის მენეჯმენტი კი თქვენი ძლიერი მხარე არ არის, მაშინ ნამდვილად გაგიჭირდებათ.

თვითმოტივაცია

საკუთარი ბიზნესის წამოწყება, სუსტი გულის ადამიანებისთვის არ არის. გამოწვევებით სავსეა და ყოველდღიურ რეჟიმში, გამოუცდელობისგან გამოწვეული პატარა მარცხებიდან წამოდგომა და მოტივაციის პოვნა მიზნის მისაღწევი გზის გასაგრძელებლად, მარტივი სულაც არაა. განსაკუთრებით კი დასაწყისში, ბიზნესის წამოწყების ადრეულ დღეებში. როცა თვითდასაქმებული ხართ, არ გყავთ ხელმძღვანელი, რომლისგანაც იღებთ დავალებებსა და დედლაინებს, ასეთ დროს საკუთარი თავის უფროსი ხართ და მნიშვნელოვანია, რომ მიზანზე იყოთ ფოკუსირებული.

მოქნილობა

თვითდასაქმებულებისთვის უმნიშვნელოვანესია მოქნილობა და ადაპტურობა. თქვენი ბიზნესი, კლიენტები და პროექტები შესაძლოა მუდმივად ცვალებადი იყოს და ყოველთვის დაგჭირდებათ ახალი გზა, რომ მათ მოთხოვნებს უპასუხოთ. თუ არ გიყვართ ცვლილება, არ შეგიძლიათ მოთხოვნების მიმართ მოქნილი იყოთ და აყვეთ ცვლილებებს, შესაძლოა ბიზნესის წამოწყება სათქვენო საქმე სულაც არ იყოს.

კონტაქტების დამყარება

კონტქატების დამყარება, ე.წ. ნეთვორქინგი სასიცოცხლოდ მნიშვნელოვანია თქვენი ბიზნესისთვის, კლიენტებსა და სხვადასხვა ადამიანებთან ურთიერთობების ჩამოყალიბებისა და გამყარებისთვის. თვითდასაქმებული ადამიანები, რომლებიც საკუთარი ბიზნესის განვითარებაზე, სახელის მოხვეჭასა და ცნობადობის გაზრდაზე მუდმივად ზრუნავენ, აუცილებლად ესწრებიან ონლაინ და პირისპირ შეხვედრებს, ღონისძიებებს, არ უშვებენ ხელიდან შანსს, რომ გამოელაპარაკონ და დაუკავშირდნენ იმ ადამიანებს, რომლებთანაც საერთო ინტერესები აქვთ და თავიანთი ბიზნესის სფერო რაიმე მხრივ მათ ინტერესებს ერგება.

„რისკის აპეტიტი“

ცნება „რისკის აპეტიტი“ - რისკების ის რაოდენობაა, რომლის ასაღებადაც კომპანია მზად არის. ბიზნესის დაწყება კი ბევრ რისკზე წასვლას უკავშირდება. არ არსებობს გზა, რომელიც ზუსტად გიჩვენებთ თქვენი იდეა გაამართლებს თუ არა, კლიენტებისთვის მოსაწონი და მისაღები იქნება თუ არა, ან თუ მოგიტანთ იმდენ შემოსავალს, რომ ჩადებული ფინანსური ინვესტიცია გადაფაროს და მოგებაზე გაგიყვანოთ პირველ რამდენიმე თვეში. თუ რისკიანი არ ხართ და ყოყმანობთ სარისკო გადაწყვეტილებებზე, მაშინ ნუ იჩქარებთ თვითდასაქმებას.

თუ ფიქრობთ, რომ ამ უნარებიდან უმეტესეობა გაქვთ, ან დროთა განმავლობაში შეძლებთ მათ გამომუშავებას, დროა საკუთარ ბიზნესიდეებს ხორცი შეასხათ და საქმეს შეუდგეთ