განათების როლი ინტერიერის დიზაინში

ინტერიერში განათება ერთერთ საკვანძო როლს ასრულებს არამხოლოდ საჭირო სინათლის წყაროს დანიშნულებით, არამედ დიზაინისთვის სწორად შერჩეული განათების ფერითა და ტიპით. ალბათ, ბევრ თქვენგანს გაუგია და უნახავს თბილი, ცივი და ნეიტრალური განათების შესახებ. გემოვნების მიხედვით ზოგიერთ ადამიანს ცივი განათება უფრო მოსწონს, ზოგიერთს კი - თბილი. ისეთი დამოკიდებულებაც კი აქვთ, რომ მაგალითად ცივი განათება თავს ატკიებთ, თბილი კი სიმყუდროვის განცდას იმდენად იწვევს, რომ მოთენთილობაშიც კი გადასდით. რეალურად ყველა განათებას თავისი ადგილი აქვს და სწორად შერჩეული ფერისა და ფორმის დახმარებით, ყველაფერი თავის ადგილზე დალაგდება.

სინათლე მოქმედებს ყველა დეტალზე, დაწყებული განწყობით, დამთავრებული სივრცის აღქმით. ცივ განათებას აქვს მოთეთრო-მოლურჯო ფერი, უმეტესად სამუშაო სივრცეებში გამოიყენება, რადგან საოფისე ატმოსფეროს ქმნის. ასევე, კარგად ერწყმის დღის ბუნებრივ შუქს და ფანჯრის მხარეს განთავსებულ ოფისებში ცივი და ბუნებრივი ნათება იდეალურ კომბინაციას ქმნის. სახლში კი ცივი განათების გამოყენება რეკომენდებულია სააბაზანოში, სამზარეულოში (თუკი ის  თეთრ ან ვერცხლისფერ ფერებში გაქვთ გადაწყვეტილი) და სამუშაო ოთახში, რათა ისეთივე განწყობა შეგიქმნათ, როგორიც ოფისში მუშაობისას გაქვთ.

თბილ ნათებას აქვს მოწითალო და მოყვითალო ფერის ტონები. უმეტესად გამოიყენება სახლში მყუდრო გარემოს შესაქმნელად, მაგალითად საძინებელში, სადაც მშვიდი გარემოს მოწყობა მნიშვნელოვანია და ამავე დროს, სინათლის ტონებს ავეჯის, შპალერის, ფარდებისა და სხვა დეტალების ფერებიც უნდა უწყობდეს ხელს. უმჯობესია, თუ ისინიც თბილ და ნეიტრალურ ფერებში იქნება გადაწყვეტილი. ასევე, აღსანიშნავია, რომ საძინებელში ძირითადი განათების გარდა, დამატებითი ფუნქციური განათების საჭიროებაც დგას, როგორიცაა მაგალითად საწოლთან ტუმბოზე მცირე ზომის სანათი, სარკეზე მაკიაჟისთვის განკუთვნილი სპეც. განათება და ა.შ. თბილი განათება გარდა საძინებლისა, შეგიძლიათ გამოიყენოთ მისაღებ ოთახშიც, სადაც ოჯახური თავყრილობები იმართება და სტუმრებს იღებთ. თბილი განათება კარგი ცვლილება იქნება დღის განმავლობაში ოფისის ცივი განათებიდან ოჯახურ შეკრებაზე გადმოსართავად და შესაბამისი განწყობის შექმნაში დაგეხმარებათ.

მისაღებ ოთახში თუ ტელევიზორიც გაქვთ განთავსებული, ასეთ შემთხვევაში აქაც შეგიძლიათ ფუნქციური განათება გამოიყენოთ მთლიანად ჭაღი რომ არ აანთოთ, მაგალითად აანთეთ კედლის ბრა, ტორშერი ან ჭერის წერტილოვანი განათება. ასევე, მსგავსი დამხმარე განათებისთვის შეგიძლიათ გამოიყენოთ შუქის სიმკვეთრის მარეგულირებელიც. მაგალითად, LED განათება გაძლევთ საშუალებას, რომ ეკოლოგიური სისუფთავის დაცვით განათების სხვადასხვა ფორმები და ეფექტები შექმნათ.

ჭერის წერტილოვანი განათება გარდა დამხმარე ფუნქციისა, შესაძლოა მთავარ განათებად გამოყენებული იყოს სააბაზანოში, სადაც ჭაღის დაკიდება მეტისმეტია, ამავდროულად კი თავის ფუნქციას იდეალურად ასრულებს წერტილოვანი განათება, მთელს აბაზანაში ნაწილდება შუქი და იზოგება სივრცე. განსაკუთრებით კი თუ აბაზანა პატარა ზომისაა. გარდა ძირითადისა, აბაზანაშიც შევხვდებით მეორეხარისხოვან, კოსმეტიკურ განათებას, რომელიც სენსორულია და აბაზანის სარკის ირგვლივ არის დამონტაჟებული. თავის მოწესრიგება კი საძინებლისა და სააბაზანოს სარკეებში საკმაოდ ხშირად ხდება, სწორედ ამიტომ, მნიშვნელოვანია, რომ არც ძალიან გადანათებული იყოს კოსმეტიკური განათების წყარო და არც ძალიან მშვიდი ნათება ჰქონდეს. მთავარია ჩრდილები სახეზე ნაკლებად გადანაწილდეს, რათა სახის ბუნებრივი მდგომარეობა განათებული სარკის დახმარებით სწორად აღიქვათ.