რა სურს Gen Z-ს სამუშაო ადგილზე?

ზეტ თაობა 1995-2000 წლებში დაბადებული თაობაა, რომელიც მისი წინამორბედებისგან განსხვავდება რიგი თვისებებით. ყოველ ახალ თაობას განსხვავებული შეხედულებები აქვს ცხოვრებაზე, თუმცა ბოლო პერიოდში „ჯენ ზის“ მიდგომები გამოწვევად იქცა დამსაქმებლებისთვის სამუშაო ადგილზე. მათ განსხვავებულობასა და სამუშაო ადგილის მიმართ დამოკიდებულებაში დიდი როლი ითამაშა რამდენიმე კომპონენტმა, ესენია:

·       ტექნოლოგიური წინსვლა, რამაც შესაძლებლობები გაზარდა და სამუშაო პოზიციების  ტრანსფორმაცია გამოიწვია, მეტი რამის ავტომატიზაცია გახდა შესაძლებელი;

·       შეიქმნა ახალი პროფესიები, რომლებიც სრულიად განსხვავდება ძველისგან და გამოცდილი პროფესიონალები ფიზიკურად არ არსებობენ ამის გამო;

·       გლობალიზაციამაც საკუთარი როლი ითამაშა, რადგან წარსულისგან განსხვავებით, დღესდღეობით შესაძლებელია მსოფლიოს სხვადასხვა ქვეყნის გამოცდილებების უფრო მარტივად გაზიარება და სწავლა;

·       პანდემიის პერიოდში დასაქმდა ზეტ თაობის ბევრი წარმომადგენელი და სახლიდან მუშაობის გამოცდილებამ მათ ასწავლათ დისტანციურად მუშაობის სიკეთეები, აქედან გამომდინარე, ჩვეულ რიტმში დაბრუნების შემდეგ რთულია „ჯენ ზი“ ოფისში სიარულზე დაითანხმოთ.

ყველაზე რთული ნაწილი სწორი კომუნიკაციის ფორმის შერჩევა და წარმართვაა, რადგან ჯენ ზის წარმომადგენელთა დიდი ნაწილი ბუნებით სიახლეების და კომფორტის მაძიებელია, როგორც კი სამუშაო ადგილზე რაიმე დისკომფორტს ან გაურკვევლობას წააწყდებიან, მის მოსაგვარებლად მოლაპარაკებასა და დიალოგს სამუშაო ადგილის დატოვება და ახლის ძება ურჩევნიათ. დამსაქმებლებისთვის კი გადინების მაჩვენებელი იზრდება და სტატისტიკასთან ბრძოლას დასაქმებულ ჯენზისთან საერთო ენის გამონახვით ცდილობენ.

საერთო ენის გამონახვა გამჭვირვალეობის პოლიტიკის დანერგვით უნდა დაიწყოთ. მათთან თანამშრომლობისას კლასიკური ვერტიკალური იერარქია ნაკლებად გამოგადგებათ, რადგან მათ არ ხიბლავთ უფროსების სტანდარტული დამოკიდებულება და დედლაინებში ჩასმული ისეთი შესასრულებელი ამოცანები, რომელთა დანიშნულება და მიზნობრიობაც გამჭვირვალე და ნათელი არ არის. აუხსენით რას რატომ აკეთებთ, რა არის საბოლოო მიზანი, რა როლი აქვს მათ მიერ შესრულებულ სამუშაოს საერთო საქმეში და რა სარგებელს იღებენ ისინი პირადად ამ ყველაფრისგან. კომუნიკაციის სტილი გაამარტივეთ შეძლებისდაგვარად მაქსიმალურად და გამოხატეთ მზაობა მათი უკუკავშირისა და იდეების მოსმენის მიმართ. ასევე, გაითვალისწინეთ რომ ყველა მათგანი ექსტროვერტი არ იქნება, მიუდექით ინდივიდუალურად და მხედველობაში გქონდეთ თითოეული მათგანის ინტერესები და მოთხოვნილებები და არ შეხედოთ ყველას ერთნაირად როგორც ერთნაირი ადამიანების გუნდს. ისინი ყოველთვის ცდილობენ საკუთარ თაობაშიც კი ერთმანეთისგან განსხვავდებოდნენ და ინდივიდუალიზმი არ დაკარგონ.

მნიშვნელოვანია დაეხმაროთ მკაფიოდ დაინახონ თვენთან მუშაობის ბენეფიტები, კერძოდ კარიერული წინსვლისა და ანაზღაურების ნაწილი. კონფიდენციალურობის პოლიტიკა და ხელფასზე ჩურჩულით საუბარი ამ თაობას ნამდვილად არ ახასიათებს, იცნობენ საერთაშორისო ბაზარსაც და დასაქმებულთა უფლებებსაც, შესაბამისად, ყოველთვის მოითხოვენ იმას, რაც ეკუთვნით კანონით და ყოველთვის დაიწყებენ უკეთესი ანაზღაურების ძებნას სხვადასხვა კომპანიებში. ზემოთ როგორც ვახსენეთ, ტექნოლოგიურმა წინსვლამ და გლობალიზაციამ ხელი შეუწყო მსოფლიოს სხვადასხვა წერტილში კომპანიების გამოცდილებების ხელმისაწვდომობას და სწორედ ამის წყალობით ჯენზიმ იცის, მათ მიერ არჩეულ პროფესიას ან შესრულებულ საქმიანობას რამდენად დააფასებდნენ სხვადასხვა ქვეყნებში და თქვენს ოფისში კვირაში 5 დღე სრულ განაკვეთზე სიარულს, აუცილებლად დისტანციურად ფრილანსერად მუშაობას ამჯობინებენ. სწორედ ამიტომ უნდა დაანახოთ თქვენთან მუშაობის ყველა ბენეფიტი, თუმცა მანამდე, ნამდვილად შექმნათ კომფორტული გარემო და შრომის პირობები.

პროფესიული უნარებისა და პროფესიული ურთიერთობების განვითარების მიზნით მოაწყვეთ გუნდური შეხვედრები, თუნდაც ონლაინ. ხელი შეუწყვეთ მათ ინტეგრაციას გუნდში და ხშირად ჰკითხეთ აზრი, რას როგორ გააუმჯობესებდნენ, რას ისურვებდნენ და რას შეცვლიდნენ. ლოგიკურია, რომ ბევრი მათგანის სურვილები შესაძლოა თვენი კომპანიის ბიუჯეტს აღემატებოდეს და დაკმაყოფილება ვერ შეძლოთ, მაგრამ ეს უკუკავშირები მოგცემთ მიმართულებას მათ საჭიროებაზე და მცირე კვლევის შედეგებად გექნებათ გამოთვლილი მათი ინტერესების შესახებ ინფორმაცია და შესაბამისად დაგეგმავთ შემდგომ ნაბიჯებს. მოუწყვეთ შეხვედრები არამხოლოდ კოლეგებთან, არამედ მათი მიმართულების გურუებთან, ადამიანებთან, რომლებიც მათი ინსპირაციის წყაროები არიან ან პოტენციურად გახდებიან.

გარდა პროფესიული განვითარებისა, იზრუნეთ მათ მენტალურ ჯანმრთელობასა და work-life ბალანსის ზრუნვაზე. ჯენ ზი ის თაობაა, რომელიც მენტალურ ჯანმრთელობას სერიოზულად უყურებს და თუკი დადგებიან იმ ფაქტის წინაშე, რომ მათ ტვინს გადაწვა ემუქრება, ან სამუშაო შფოთვა უწევთ, აუცილებლად დატოვებენ სამუშაო ადგილს დაუყოვნებლივ. ამიტომ შესთავაზეთ მათ სხვადასხვა აქტივობები და სესიები მენტალურ ჯანმრთელობაზე ზრუნვისათვის, დაანახეთ რომ ღირებული რესურსი არიან თქვენთვის და მათი კეთილდღეობა თქვენთვის მნიშვნელოვანია.

სულ მალე დასაქმებულთა უმეტესი ნაწილი სწორედ ჯენ ზი იქნება. სწორედ ამიტომ არის მნიშვნელოვანი იცოდეთ მათი საჭიროებები და თქვენი კომპანია თანამშრომლების გარეშე არ დარჩეს.