რა უნარებია საჭირო მომსახურების სფეროში დასაქმებისთვის?

კომპანიები, რომლებიც მომხმარებელს სთავაზობენ სხვადასხვა სახეობის მომსახურებასა და პროდუქტს, მომსახურების სფეროს წარმოადგენენ. აქ დასაქმებულ ადამიანებს ყოველდღიურად ვხვდებით სუპერმარკეტებში, კვების ობიექტებში, ბანკებსა თუ სავაჭრო ცენტრებში. მომსახურების სფეროში დასაქმებული ადამიანები არიან კონსულტანტები, მოლარეები, ოპერატორები, მოკლედ რომ ვთქვათ ის ადამიანები, რომლებიც პროდუქტის მახასიათებლებში გარკვევაში გვეხმარებიან და მომხმარებელთან უშუალო კონტაქტში არიან.

მომსახურების სფეროში მუშაობა საკმაოდ რთული და შრომატევადი საქმიანობაა. მიუხედავად იმისა, რომ არ არის რთული დასაქმდეთ აღნიშნულ სფეროში, სამსახურში სტაბილურობის შენარჩუნება და მდგრადობა ნამდვილად რთული ამოცანაა. ადამიანები, რომლებიც კომპანიის „წინა ხაზს“ (იგივე Front ოფისს) წარმოადგენენ, მუდმივად კომუნიკაციაში არიან მომხმარებლებთან, მათ უწევთ გაუმკლავდნენ პრეტენზიულ კლიენტებს, არ აყვნენ ემოციებს და ყველა ტიპის ადამიანს გაუწიონ ხარისხიანი და თავაზიანი მომსახურება. სირთულის მიუხედავად, არსებობს გარკვეული უნარები და ცოდნები, რომლებიც დასწავლადია და პრაქტიკაშიც გამოუმუშავდებათ თანამშრომლებს. მომსახურების სფეროში დასაქმებულ ადამიანთა უმეტესობას ახალგაზრდები წარმოადგენენ, ისინი ხშირად სწავლის პარალელურად მუშაობენ და შესაბამისად, ცვლებში მუშაობას თავიანთ სასწავლო განრიგს უთავსებენ. საქართველოში მომსახურების სფერო საკმაოდ დაბალანაზღაურებად სეგმენტად ითვლება და სწორედ აქედანაც გამომდინარეობს, რომ აქ ძირითადად პირველი სამუშაო გამოცდილების მიმღებ დასაქმებულებს ვხვდებით.

მუშაობის პერიოდში გამომუშავდება ისეთი უნარები, რომლებიც შემდგომ ყველა მიმართულებით შეიძლება გამოადგეს ადამიანს. მაგალითად, მკაფიო და ამომწურავი უკუკავშირის გაცემა, თავაზიანობა, სერვისულობა. „ფრონტის“ თანამშრომლებისთვის არსებობს „სერვის პლუსის“ ტრენინგიც, რომლის მიზანიც სოციალური კომუნიკაციისა და მომხმარებლების ეფექტურად მომსახურების ბაზისების სწავლებაა. მომსახურების ხარისხი ძალიან ხშირად სწორედ წინა ხაზის თანამშრომლებთან ურთიერთობის შედეგად იზომება მომხმარებლების მხრიდან. როდესაც შევდივართ ნებისმიერ ობიექტში და მომღიმარი თანამშრომლები თავაზიანად გვემსახურებიან, კეთილგანწყობილი ვხდებით მთლიანად ბრენდის მიმართ. „შთაბეჭდილებების წიგნსა“ თუ რევიუებში აუცილებლად დავუწერთ დადებით შეფასებას და ერთი კარგი კონსულტანტის დამსახურებით მთლიანად ბრენდზე იქმნება დადებითი შთაბეჭდილება.

უნარები, რომლებიც მომსახურების სფეროში მუშაობისას დაგჭირდებათ საკმაოდ მრავალფეროვანია, იქიდან გამომდინარე, რომ თავად მომხმარებელია მრავალფეროვანი. აუცილებელია კრიზისული სიტუაციების მართვის ცოდნა იმ შემთხვევებისთვის, თუ როგორ უნდა გაუმკლავდეთ უკმაყოფილო ან/და აგრესიულ კლიენტებს ისე, რომ არ აყვეთ ნეგატიურ საუბარში და ამავდროულად, დაიცვათ თქვენი და ბრენდის ინტერესები და პოზიცია. ამავე სიტუაციისთვის მნიშვნელოვანია ეფექტური კომუნიკაციისა და მოლაპარაკების წარმოების უნარი. სხარტი აზროვნება და სისწრაფე ასევე საკვანძო უნარებია კლიენტთა კმაყოფილებისა და სერვისის დროულად მიწოდების კუთხით. გარდა ვერბალური კომუნიკაციისა, არავერბალური კომუნიკაციაც საკმაოდ დიდ როლს თამაშობს მომხმარებლებთან ურთიერთობაში. შესაძლოა კეთილგანწყობილი სიტყვით ამყარებდეს კომუნიკაციას თანამშრომელი კლიენტთან, თუმცა მისი სხეულის ენა სრულიად საპირისპიროზე მეტყველებდეს. ამიტომაა მნიშვნელოვანი ღიმილიანი მომსახურება, ხმის შესაბამისი ტემბრი მომსახურების გაწევისას და არავერბალური მზაობა მომხმარებლის დახმარებისთვის.

გასათვალისწინებელია, რომ მომხმარებლის სიმრავლიდან გამომდინარე, მომსახურების სფეროში მუშაობა საკმაოდ დამღლელიცაა, თუმცა ადამიანებთან ურთიერთობის ჭრილში ნამდვილად უდიდესი შენაძენია აღნიშნულ დარგში სამუშაო გამოცდილების დაგროვება. ვინც მზად ხართ ამ გამოწვევებით სავსე და საინტერესო სფეროს შეუერთდეთ, შეგიძლიათ ss.ge-ს ვაკანსიები გადაათვალიეროთ და თქვენთვის სასურველ სფეროში მომსახურების ვაკანტურ პოზიციებს გამოეხმაუროთ.