როგორ გავარემონტოთ ბინა სწრაფად და იაფად?

ბინის გარემონტება დაკავშირებულია საკმაოდ დიდ ხარჯებთან და ხანგრძლივ პროცესთან. ყველა ადამიანს სურს, რომ მაქსიმალურად დაზოგოს ბიუჯეტი ისე, რომ ხარისხი შეინარჩუნოს და დროშიც ძალიან არ გაიწელოს რემონტის პროცესი. ორი კურდღლის ერთად დაჭერა, როგორიცაა სწრაფი და იაფი რემონტი, სულაც არაა იოლი საქმე, თუმცა არც შეუძლებელია.

რემონტის დაწყებამდე, მას შემდეგ რაც მიიღებთ გადაწყვეტილებას კონკრეტული ცვლილების თაობაზე, აუცილებლად ჩამოწერეთ რისი შეცვლა გჭირდებათ, აპირებთ კოსმეტიკურ რემონტს თუ კაპიტალურს, უპირატესობას რას მიანიჭებთ, რა სირთულის საქმესთან გექნებათ შეხება და დააზუსტეთ ყველა დეტალი. ერთი სიტყვით, მცირე მოკვლევა გააკეთეთ უშუალოდ სარემონტო სამუშაოების დაწყებამდე. დაიხმარეთ მეგობრები, დაზოგეთ დიზაინერის ხარჯები და ესტუმრეთ სხვადასხვა ვებგვერდებს დიზაინის შესარჩევად. სტატიების დახმარებით გაიგეთ მიმდინარე ტრენდებისა თუ ზოგადი რჩევების შესახებ ინფორმაცია. შეაფასეთ ფერების შეხამება სხვადასხვა საიტებზე. რაც შეეხება მასალას, დღესდღეობით ინტერნეტი ყველაფერში გვეხმარება, დასვით კითხვები სოციალური ქსელის შესაბამის ჯგუფებში, მოძებნეთ თქვენამდე კიდევ სხვასაც ხომ არ გასჩენია იგივე შეკითხვა და გაიზიარეთ სხვების გამოცდილებები. მასალის შერჩევის შემდეგ, როცა ჯერი მის ყიდვაზე მიდგება, არ დაიზაროთ და გაიგეთ ფასები სხვადასხვა ლოკაციებზე, შემდეგ კი არჩევანი შეაჩერეთ ბიუჯეტურ ვარიანტზე. ხშირად, ადამიანები დროის დაზოგვის მიზნით, პირველივე შემხვედრ ობიექტში იწყებენ ვაჭრობას, შემდეგ კი აღმოაჩენენ რომ იგივე ნივთი ან მასალა სხვაგან ბევრად იაფად შეეძლოთ რომ შეეძინათ. მართალია ჩვენც ამ სტატიაში სწრაფი პროცესის შესახებ რჩევებს უნდა გაძლევდეთ, მაგრამ იმისთვის რომ უშუალოდ სარემონტო სამუშაოები სწრაფად და ხარისხიანად შესრულდეს, ჯობს რომ ცოტა მეტი დრო პრე-სარემონტო პერიოდზე დახარჯოთ და კარგად შეისწავლოთ ბაზარი.

როდესაც ჯერი მიდგება ხელოსნის შერჩევაზე, აუცილებლად დადეთ მასთან კონტრაქტი, რათა თავიდან აირიდოთ დროში გაწელილი და გადავადებული სამუშაოები. ალბათ, ხშირად მოგისმენიათ თქვენი გარშემომყოფებისგან, რომ მაინც და მაინც სარემონტო სამუშაოების დროს გამოუჩნდებათ ხოლმე ხელოსნებს გადაუდებელი საქმეები რაიონში, რის გამოც 2 კვირის საქმე ზოგჯერ 2 თვის მანძილზეც კი ხანგრძლივდება. ამიტომ ყველაფერი კანონის ჩარჩოებში მოაქციეთ და ოფიციალურად დაუკვეთეთ მომსახურება ხელოსნებს დროში გაწერილად.

ეცადეთ ხარჯები დაზოგოთ ისეთი დეტალების გაკეთებაში, რაც თავადაც შეგიძლიათ, მაგალითად, დეკორაციებში. თუ მინიმალურად მაინც გამოგდით დეკორაციების გაკეთება, ინტერნეტში სხვადასხვა ვიდეოგაკვეთილების დახმარებით შეგიძლიათ ხელმარჯვე ოსტატად გადაიქცეთ. მონაწილეობა მიიღეთ სხვადასხვა საქმიანობაში თქვენს დამხმარე მუშებთან ერთად, ამით პროცესი დაჩქარდება კიდეც და უფრო სახალისოც გახდება. მაგრამ გახსოვდეთ, მათ საქმეში ჩარევა არ უნდა იყოს უხეში და საქმე აჩქარების ნაცვლად არ უნდა გააჭიანუროს.

სარემონტო მომსახურების მისაღებად შეგიძლიათ შესაბამისი კონტაქტები იპოვოთ ss.ge-ს მომსახურების რუბრიკაში.