რა უნდა იცოდე ქობულეთის შესახებ?

რეგიონი საკმაოდ მდიდარია ქვის ხანის ადრეფეოდალური და ანტიკური არქეოლოგიური ძეგლებით. შესაბამისად, შეგვიძლია ვივარაუდოთ, რომ ქობულეთის ისტორია ათასწლეულებს ითვლის. ასევე, ზემოაღნიშნული ძეგლების არსებობით დასტურდება, რომ ძველ კოლხეთსა და საერთოდ აღმოსავლეთ შავიზღვისპირეთის ერთ-ერთი მნიშვნელოვანი საქალაქო ცენტრი, სწორედ ქობულეთი იყო. აქ ნაპოვნია ძველი წელთაღრიცხვის V საუკუნის ოქროს ისეთი ნაკეთობები, როგორიცაა ჭურჭელი, სამკაულები, ლარნაკები და ა.შ. ნაპოვნია ასევე ოქროს ფიგურიანი კრატერი, რომელიც მსოფლიოში სულ რამდენიმე ცალია.

ვიზიტორების განსაკუთრებულ აღფრთოვანებას იწვევს ფიჭვნარისა და სოფელ კოხის ნასახლარები, სოფელ ზენითის საწნახელი, პეტრას, თეთროსნის, ეკლიასა და ალამბრის ციხეთა ნანგრევები და შუა საუკუნეების თაღოვანი ხიდები.

თავის მხრივ, არქეოლოგიური ძეგლის სტატუსის მატარებელია ქობულეთის ფიჭვნარი. აქ აღმოჩენილია სხვადასხვა პერიოდის არქეოლოგიური ძეგლთა დიდი ჯგუფი. უძველესია ისპანის ტორფქვეშა ნამოსახლარი, რომელიც ადრინდელი ბრინჯაოს ხანას მიეკუთვნება.

ქობულეთი, კურორტად XIX საუკუნის მეორე ნახევრიდან ყალიბდება. მაშინ, როცა რუსეთის იმპერატორ ალექსანდრე II-ის განკარგულებით ქობულეთის ზღვისპირა ზოლი იმ მთავარსარდლებს გადაეცათ, რომლებმაც რუსეთ-თურქეთის ომის დროს თავი გამოიჩინეს. საკმაოდ გავლენიანმა მაღალჩინოსნებმა სათანადოდ შეაფასეს ნაჩუქარი მიწის მნიშვნელობა და დაიწყეს ქობულეთის ზღვისპირა ზოლის განაშენიანება მდიდრული აგარაკებით, სადაც ოჯახის წევრებთან ერთად ზაფხულისა და ზამთრის შვებულებებს ატარებდნენ.

ქობულეთის გამაჯანსაღებელმა კლიმატმა სულ რამდენიმე წელიწადში გაითქვა სახელი მთელს იმპერიაში. საქართველოს გასაბჭოების შემდეგ არისტოკრატთა აგარაკები წითელი კომისიების მფლობელობაში გადავიდა. ერთ-ერთი საუკეთესო აგარაკი, რომელსაც სამედიცინო თვალსაზრისით იდეალური ადგილმდებარეობა ჰქონდა, ლავრენტი ბერიას საკუთრება გახდა. მოგვიანებით ის სანატორიუმ "საქართველოდ" გადაკეთდა. დღეს კი ამ ადგილას თანამედროვე ხუთვარსკვლავიანი სპა-სასტუმრო Georgia Palace Hotel მდებარეობს.

გასაქირავებელი ბინები ქობულეთში, იხილეთ ბმულები:

·      ქირავდება დღიურად: https://bit.ly/43CRz1k

·      ქირავდება თვიურად: https://bit.ly/44P7ivp

ქობულეთი სახელმწიფო მნიშვნელობის კურორტად 1923 წლიდან გამოცხადდა. საინტერესო ფაქტია ასვე ისიც, რომ ქობულეთში მდებარე აღმაშენებლის ქუჩა, ყველაზე გრძელი ქუჩაა საქართველოში. მისი სიგრძე 15 კმ-ია.