რა უნდა იცოდე გომისმთის შესახებ?

გომისმთა მაღალმთიანი, საზაფხულო კურორტია ოზურგეთის მუნიციპალიტეტში. რელიეფიდან გამომდინარე, მისი სიმაღლე სხვადასხვა ადგილებში განსხვავებულია და ზღვის დონიდან 2100-იდან 2755 მეტრამდე მერყეობს. გომისმთის სპეციფიკური ჰავიდან გამომდინარე, მას "ნისლების სამეფოსაც" კი უწოდებენ ხოლმე და ეს, ერთ-ერთი მნიშვნელოვანი, მიმზიდველი ფაქტორია დამსვენებლებისთვის.

ტურისტებს იზიდავთ, ასევე, ჭინჭაოს ტბა, რომელიც ზღვის დონიდან 2500 მეტრზე მდებარეობს. კურორტიდან ტბამდე მანძილი 11 კმ-ია. ტბამდე მიდის სამანქანო გზა, თუმცა გადაადგილება მხოლოდ მაღალი გამავლობის ტრანსპორტითაა შესაძლებელი.

გომისმთაზე ზამთარი უხვთოვლიანია და ცივი, ზაფხული ზომიერად გრილი. ზამთრის საშუალო ტემპერატურაა -5 გრადუსი, ხოლო ზაფხულში, საშუალო ტემპერატურაა 13–18 გრადუსია. აქ საკურორტო სეზონი, ისევე როგორც ბახმაროში, მხოლოდ ზაფხულის სამი თვის განმავლობაში გრძელდება. ადგილი გარშემორტყმულია ნაძვისა და სოჭის ტყეებით, მდიდარია მინერალური წყლებითა და სხვა ბუნებრივი რესურსებით.

გომისმთაზე, ბახმაროს მსგავსად, პოპულარულია ტიპური ხის სააგარაკო სახლები, რომლის დაქირავებაც შესაძლებელია. კურორტზე არ არის სასტუმრო, მაღაზიები, აფთიაქი, ბავშვთა გასართობი პარკი, კაფე ან სხვა გართობის საშუალება. იმ შემთხვევაში თუ აქ დასვენებას გადაწყვეტთ, საჭიროა ყველაფერი თან წაიღოთ და ცივილიზაციისგან მოწყვეტილმა, სიმშვიდეში, სუფთა ჰაერზე, ბუნებაში გაატაროთ დრო. დამსვენებლებისთვის, კურორტის ერთგვარ ტრადიციას წარმოადგენს საღამოობით კოცონის დანთება და მის გარშემო შეკრება. აგვისტოს თვეში, აქ იმართება დღესასწაული „გომისმთობა“ და ეწყობა სხვადასხვა სპორტული შეჯიბრი. იმართება დოღი. 

აგარაკები გომისმთაზე. იხ. ბმული: https://bit.ly/3rp8OpZ

მიწის ნაკვეთები გომისმთაზე. იხ. ბმული: https://bit.ly/3reXn4e

გზა და მგზავრობა გომისმთამდე

ოზურგეთიდან გომისმთამდე მანძილი 33 კმ. თბილისიდან ოზურგეთის მიმართულებით გადის ყოველ დღე, როგორც ავტობუსი ისე მიკროავტობუსი და მატარებელი. ოზურგეთიდან გომის მთის მიმართულებით ხშირად არ არის საზოგადოებრივი ტრანსპორტი, რის მიზეზიც მგზავრობის მსურველთა სიმცირეა. ამ შემთხვევაში დაგჭირდებათ ტაქსის დაქირავება ან „ავტოსტოპი“. გომისმთამდე მისვლა შესაძლებელია ნებისმიერი ტიპის ავტომობილით.

ზღვისა და მთის ჰაერის შერწყმის კლიმატური პირობები, კურორტის სამკურნალო თვისებებს განაპირობებს და ადგილს, უნიკალურობას სძენს.