ისტორიები უბნებზე - ვაზისუბანი, თბილისი

თბილისის, ერთ-ერთი ტიპური საბჭოთა საცხოვრებელი რაიონია - ვაზისუბანი. ამ პერიოდში, საცხოვრისზე გაზრდილი მოთხოვნის, ეკონომიკური კრიზისის და შეზღუდული ბიუჯეტის გამო არ მოხდა უბნების კეთილმოწყობა, ამიტომ ქალაქის ასეთ ნაწილებს შერჩა მხოლოდ ე.წ. საძილე უბნის ფუნქცია.

იმდროინდელ დასახლებებში ფუნქციები ერთმანეთისგან მკვეთრად იყო გამიჯნული. ადამიანებს სხვაგან უნდა ემუშავათ, სხვაგან უნდა ეცხოვრათ, სხვაგან უნდა დაესვენათ. მაშინ შერეული ფუნქციების მქონე დასახლებები არ არსებობდა. მაცხოვრებლები ყოველ დილით სხდებოდნენ საზოგადოებრივ ტრანსპორტში, მიდიოდნენ სამსახურში და მხოლოდ საღამოს ბრუნდებოდნენ უკან. მოგვიანებით, ასეთ რაიონებს „საძილე რაიონები“ უწოდეს. გარდა ვაზისუბნისა, „საძილე რაიონები“ იყო გლდანი და ვარკეთილიც.

ვაზისუბნის განაშენიანება განლაგებულია მახათას მთის ფერდზე. ამ უბანს ჩრდილოეთით ესაზღვრება თბილისის რეზერვუარი, აღმოსავლეთით – ვარკეთილი, დასავლეთით – ელიას და კუკიას უბნები, ხოლო სამხრეთით – მეტრომშენის და სამგორის დასახლებები. მსგავსი საცხოვრებელი რაიონების მშენებლობა ფაქტობრივად, ცარიელ ტერიტორიებზე იგეგმებოდა, ძირითადად ისეთ პერიფერიულ ადგილებში, რომლებსაც არ ჰქონდათ ურბანული მემკვიდრეობა და უბრალოდ, ესაზღვრებოდნენ ქალაქს. ასეთ ტერიტორიაზე სულ ტრიალი მინდორი იყო. ასე იყო ვაზისუბნის შემთხვევაშიც. იგი ცარიელ ტერიტორიაზე, ვაზების გაჩეხის შემდეგად, 70-ანი წლების ბოლოს და 80-იანი წლების დასაწყისში აშენდა. საუკუნეების წინ აქ თითქმის ყველა ადგილას, ვაზი იყო გაშენებული, რის გამოც შიძინა უბანმა თავისი სახელი.

ვაზისუბანს აქვს მშენებარე მეტრო, რომლის მშენებლობა 1980-იან წლებში დაიწყო, მაგრამ ის დღემდე შეჩერებულია. ვაზისუბანში ვარკეთილის მეტროდან ორი ძირითადი ქუჩა ადის. ვაზისუბანი იყოფა ოთხ მიკრორაიონად და ვაზისუბნის დასახლებად. საზღვრების ფუნქციას ასრულებს ბუნებრივი ლანდშაფტი, დახრილი რელიეფი, ქუჩები და ცარიელი ტერიტორიები.

ვაზისუბნის ცენტრში დგას შუშის პირამიდა – გამჭვირვალე, თანამედროვე ტექნიკით აღჭურვილი პოლიციის შენობა, რომელიც ნავიგაციისას ერთ-ერთ მთავარ როლს ასრულებს.

ვაზისუბანში 2015 წელს აშენდა ოლიმპიური ქალაქი "თბილისი 2015" - სადაც ჩატარდა 2015 წლის ახალგაზრდული ოლიმპიადა.

აშენდა ამიერკავკასიაში ყველაზე დიდი სავაჭრო ცენტრი "ჰუალინგი". აგრეთვე შენდება ბიზნესცენტრები, სავაჭრო ობიექტები, მოთხოვნადი ადგილია საცხოვრებელი კორპუსების მშენებლობისთვის.