როგორ მოვემზადოთ ონლაინ გასაუბრებისთვის

პოსტ-პანდემიურ პერიოდში როგორც ონლაინ სამსახურებმა დაიმკვიდრა ბაზარზე თავისი ნიშა, გასაკვირი სულაც არაა, რომ თუნდაც ოფისიდან სამუშაოს პირობებშიც, გასაუბრების პირველი ეტაპი მაინც დისტანციურად გაიმართოს. თითქმის სამწლიანმა პერიოდმა გვიჩვენა, რომ ოფისის გარეთ, ყველა საკუთარი სივრციდან სრულიად შესაძლებელია, რომ ერთმანეთს დაუკავშირდეს და საქმეც გაკეთდეს, თუმცა ოფისში სიარულს და საქმის სამსახურებრივი გარემოდან კეთებას მაინც თავისი დანიშნულება, პლუსები და ერთგვარი ხიბლიც აქვს და სწორედ ამიტომ, ბევრმა ორგანიზაციამ ისევ ოფისში დაბრუნება გადაწყვიტა სრულად ან ნაწილობრივ, ანუ ჰიბრიდულად მაინც.

ონლაინ გასაუბრების მიზეზი შესაძლოა იყოს კანდიდატის სხვა ქალაქში ან სხვა ქვეყანაში ყოფნა და სამსახურის დისტანციურად ძიების პროცესი, შემოთავაზების მიღების შემთხვევაში კი მზად იყოს, რომ კომპანიას შეუერთდეს უკვე ოფისშიც. ბევრი ადამიანი იმავე ქალაქშიც კი მიზეზად ასახელებს საცობებს და გზაში დროის დაკარგვას თუნდაც გასაუბრებაზე მისასვლელად. პირველ ეტაპზე, სანამ საბაზისო ინფორმაციის გაცვლა ხდება სამუშაოს მაძიებელსა და კომპანიის წარმომადგენელს შორის, ხშირად გასაუბრება ონლაინ ინიშნება. აღსანიშნავია, რომ მიუხედავად იმისა, რომ პირისპირ არ სხედან რეკრუტერი და კანდიდატი, ონლაინ გასაუბრებასაც აქვს თავისი ეტიკეტი და მასაც სჭირდება სპეციალური მომზადება.

შეამოწმეთ ინტერნეტის კავშირი

ალბათ, ყველას გვახსოვს, რომ ყველა ონლაინ შეხვედრა თუ ონლაინ გაკვეთილი/ლექცია დისტანციურად მუშაობის პერიოდში იწყებოდა შემდეგი ფრაზებით: „გესმით ჩემი ხმა? ისმის? ცოტა წყდება, აბა ადგილი შეიცვალე; თავიდან გადმოვრეკავ“ და ა.შ. ასეთი ხარვეზებისა და უხერხულობის აღმოსაფხვრელად, პირველ რიგში, შეამოწმეთ ინტერნეტის კავშირი და შეარჩიეთ სახლში (ან იმ გარემოში, სადაც იმყოფებით) ისეთი ადგილი, სადაც ინტერნეტიც კარგად იჭერს და თუკი მობილურით ერთვებით, მობილური კავშირიც მყარია.

შეარჩიეთ მყუდრო ადგილი

ონლაინ გასაუბრებისას ხშირად ხელისშემშლელი ფაქტორია გარე ხმების შემოსვლა, როგორიცაა მაგალითად ქუჩის ხმაური, ოჯახის წევრების საუბარი, ბავშვის ტირილი, შინაური ცხოველის ხმა და ა.შ. გასაუბრებაზე დისტანციურად დასწრება საქმიანი შეხვედრაა და გაითვალისწინეთ, რომ ამ პერიოდის განმავლობაში პარალელურად ხელმისაწვდომი არ უნდა იყოთ, სახლში ისეთი ადგილი შეარჩიეთ, საიდანაც პერიფერიული ხმაური არ შემოვა, დახურეთ ფანჯარა, დახურეთ იმ ოთახის კარი, სადაც იმყოფებით და თქვენი საქმეები დროებით ოჯახის სხვა წევრს მიანდეთ, სანამ თქვენ გასაუბრებით იქნებით დაკავებული. გარდა იმისა, რომ არასასურველი ხმების შემოსვლა შესაძლოა უხერხულობას იწვევდეს და კავშირის ხარისხისთვის იყოს ხელისშემშლელი ფაქტორი, ასევე გასათვალისწინებელია, რომ თქვენ უშუალოდ გასაუბრებაზე ვეღარ კონცენტრირდებით, გონება გაფანტულია და აზრობრივად შეიძლება შემოსულ ხმებზე რეაგირების სურვილი გქონდეთ.

ყურადღება მიაქციეთ ფონს

სრულიად ბუნებრივი და გასაგებია, რომ ყველა ადამიანს შესაძლოა სახლში არ ჰქონდეს ოფისივით თეთრი კედლები, საქმიანი გარემო და კედელზე ჩამოკიდებული „შთამაგონებელი ფრაზების პოსტერი“, რის ფონზეც დაჯდება და ონლაინ ჩართვებში უფრო საქმიანი იმიჯით წარდგება, თუმცა აუცილებლად მიაქციეთ ყურადღება, თუ რა არის თქვენს უკან. პირველ რიგში, თუკი არეულობაა, ან ისეთი პირადი ნივთები ჩანს, რამაც არ გსურთ რომ ყურადღება მიიქციოს, ონლაინ პლატფორმების ფუნქციონალის გამოყენებით, შეგიძლიათ რომ ფონი „დაბლაროთ“ ან შეცვალოთ განსხვავებული ინტერიერით. ასევე, ყურადღება მიაქციეთ თუ როგორ განათებაში ზიხართ, სასურველია ფონზე ფანჯარა არ იყოს თუკი მზიანი ამინდია, რადგან ასეთ შემთხვევაში თქვენ საერთოდ არ გამოჩნდებით და რეკრუტერი მხოლოდ თქვენს სილუეტს დაინახავს კონტრაჟურში.

დაბოლოს, მიუხედავად იმისა, რომ სახლიდან ერთვებით, ჩაიცვით საქმიანად, თქვენი მოწყობილობა- ეს იქნება მობილური ტელეფონი თუ კომპიუტერი- მოათავსეთ ისე, რომ პირდაპირ ჩანდეთ ცენტრში და არა ზედხედით ან ნიკაპზე ფოკუსით. გახსოვდეთ, პირველი შთაბეჭდილების მოხდენა ორჯერ შეუძლებელია, ამიტომ ძალიან მნიშვნელოვანია თუნდაც ონლაინ შეხვედრისას როგორ შთაბეჭდილებას დატოვებთ დამსაქმებელზე, რაზეც დიდწილად იქნება დამოკიდებული შემდგომი ეტაპების გავლა.