სკანდინავიური სტილი ინტერიერის დიზაინში

ინტერიერის მოწყობა სკანდინავიურ სტილში ისეთ ადამიანებს მოეწონებათ, ვისაც ღია ფერები, ნათელი ოთახები და კლასიკურისგან მკვეთრად განსხვავებული სტილი მოსწონთ.

სკანდინავიური სტილის შექმნა და დამკვიდრება განაპირობა გეოგრაფიულმა მდებარეობამ და კლიმატმა. უფრო კონკრეტულად კი, სკანდინავიის ქვეყნებში გრძელი ზამთრისა და სუსხიანი კლიმატის გამო შედარებით გვიან მიაღწია ინდუსტრიალიზაციამ, ადგილობრივებს ძირითადად თავად უწევდათ მშენებლობაში მონაწილეობა. ამან განაპირობა ისიც, რომ მათი სახლები ბუნებრივი მასალებითაა შექმნილი, ინტერიერში შერწყმულია ბუნება, ავეჯი მკვეთრად განსხვავდება კლასიკურისგან, წამყვანი სტილი მინიმალიზმი,  ნათელი ფერები და სიმყუდროვეა. მორგებულია  ადამიანის კომფორტზე და არა მოდაზე, თუმცა თავისთავად გახდა მოდურიც და ტრენდულიც არამხოლოს სკანდინავიაში, არამედ მთელი მსოფლიოს მასშტაბით.

ფერის არჩევანი

სკანდინავიურ სტილში წამყვანი ფერი თეთრია, თუმცა შევხვდებით ღია ცისფერ, ნაცრისფერ და პასტელურ ფერებსაც. ვინაიდან სკანდინავიაში გრძელი და ბნელი ზამთარი იცის, დიდი ფანჯრების დახმარებით მაქსიმალურად უშვებენ შინ ბუნებრივ სინათლეს, ღია ფერები მას ირეკლავს და უფრო ნათელს აჩენს ოთახებს. სუფთა ხაზები და სივრცულობა ამ სტილის კიდევ ერთი დამახასიათებელი ნიშანია. მკვეთრ ფერებს რაც შეეხება, მაქსიმუმ ორი მკვეთრი ფერის გამოყენებაა დასაშვები და ისიც მხოლოდ დეტალებში - აქსესუარებში ან გაფორმების მიზნით.

ავეჯი და მასალები

სკანდინავიური სტილისთვის მინიმალიზმი და პრაქტიკულობაა დამახასიათებელი. შესაბამისად, ყველა ნივთი, რასაც კი სახლში შეხვდებით, ფუნქციური უნდა იყოს და თავისი დანიშნულება ჰქონდეს. ზედმეტი ნივთებისგან დაცლილი ინტერიერი კი უფრო დიდ სივრცეს გვაძლევს. ავეჯი განსხვავებულია კლასიკური სტილისგან, ძირითადი მასალა გამოიყენება ხე და მეტალი. დიდი რაოდენობით გამოიყენება ასევე ქსოვილები (ხალიჩები, გადასაფარებლები), რაც სიმყუდროვის განცდას ქმნის ინტერიერში. ბინა არასდროსაა გადატვირთული, ხის ავეჯიც ძირითადად ღია ფერისაა, რაც კიდევ ერთხელ უსვამს ხაზს სივრცულობას. გარდა ავეჯისა, დეკორატიული ნივთები ამავდროულად ფუნქციურიცაა და კერამიკკისგან დამზადებული ულამაზესი ჭურჭელი თუ ლარნაკები არამხოლოდ თვალის მოსატაცებლად არის ბინაში, არამედ პრაქტიკული დანიშნულებაც აქვს. ხისა და მეტალის შერწყმაც საკმაოდ გავრცელებულია სკანდინავიურ დიზაინში და ეს კომბინაციაც უახლეს ტერენდს ქმნის მსოფლიოს მასშტაბით.

განათება

განათების თვალსაზრისით, როგორც ზემოთ უკვე აღვნიშნეთ, დიდ როლს თამაშობს დიდი ფანჯრები და ბუნებრივი განათება ფერების თამაშის დახმარებით. თუმცა, გარდა ამისა, თითბრის ჭაღები და მეტალის შანდლებიც გავრცელებული დეტალებია სკანდინავიურ დიზაინში. სამზარეულოსა და სააბაზანოში უპირატესობა ენიჭება საკიდ განათებას, ხოლო მისაღებ ოთახში შეგიძლიათ კედლის განათების ალტერნატივაც თამამად განიხილოთ.

საბოლოოდ, შეიძლება თამამად ითქვას, რომ სკანდინავიური დიზაინის ხიბლი სწორედ ბუნებასთან სიახლოვით და ბუნებრივი ელემენტებით გაჯერებულ დიზაინში მყუდრო და სადა ელემენტებით გაწყობილი ბინის ინტერიერშია.