მომავლის პროფესიები — როგორი ტენდენციები და პროგნოზებია შრომის ბაზარზე

საუკუნეების განმავლობაში პროფესიები ხშირად ქრებოდა, მათ ადგილს კი ახალი საქმიანობები იკავებდა. ასეთი ცვლილებები დღევანდელი შრომის ბაზრისთვისაც დამახასიათებელია, თუმცა პრინციპული განსხვავება ის არის, რომ ეს პროცესები ძალიან სწრაფად მიმდინარეობს. ცხოვრების აჩქარებულ ტემპს ტექნოლოგიური პროგრესი განაპირობებს, რომელიც შრომის ბაზარზეც დიდ გავლენას ახდენს. დღევანდელი ტენდენციებიდან გამომდინარე, სავარაუდოა, რომ სამომავლოდ შემდეგი 5 პროფესია მოთხოვნადი გახდება:

1. AI-ის შემსწავლელი

AI უკვე ყველა სფეროში შემოიჭრა და იმ ინსტრუმენტად იქცა, რომელიც ჩვენი საქმიანობის გასაუმჯობესებლად შეგვიძლია გამოვიყენოთ. ეს კი დიდწილად იმაზეა დამოკიდებული, რამდენად კარგად შეგვიძლია AI-თან კომუნიკაცია. დღეს AI გვპასუხობს კითხვებზე,  გვთავაზობს ალტერნატივებს, ქმნის ვიზუალურ გამოსახულებებს, რთულ ამოცანებს თავს წარმატებით ართმევს და ა.შ.  სამომავლოდ კი, AI-ის შემსწავლელი ის ადამიანი იქნება, რომელსაც AI-ის შესაძლებლობები ყველაზე კარგად ეცოდინება და ხელოვნურ ინტელექტს დავალებების შესრულებას სწორი ფორმულირებით მოსთხოვს, რაც შედეგზეც აისახება. სამომავლოდ, AI-ის გამოყენება თითქმის ყველა სფეროს წარმომადგენელს დასჭირდება,  ხელოვნურ ინტელექტთან ადაპტაციაში კი, მათ სწორედ  AI-ის შემსწავლელი დაეხმარება.

2. კრიპტოვალუტის ექსპერტი

ბოლო რამდენიმე წელია, რაც კრიპტოვალუტა გამოჩნდა და მის მიმართ ინტერესი სულ უფრო იზრდება. მსოფლიოს მასშტაბით, ნახევარ მილიარდზე მეტი ადამიანი ციფრული ვალუტის მფლობელია, ეს ტენდენცია კი გლობალურად მზარდია. კრიპტოვალუტის ბაზრის გაფართოებასთან ერთად, ჩნდება მოთხოვნა კრიპტოვალუტის ექსპერტებზე, რომლებსაც გამოწვევები კარგად ესმით და სხვებისთვის ცოდნის გაზიარებაც შეუძლიათ. თუ ადრე მხოლოდ რამდენიმე კრიპტოვალუტა არსებობდა, დღეს სიტუაცია გაცილებით კომპლექსურია და ციფრული ვალუტის შეძენამდე ბაზრის ტენდენციების ცოდნა არის საჭირო. ასე რომ, მათ, ვინც სამომავლოდ კრიპტოვალუტის შეძენას გადაწყვეტს, კონსულტირებას სწორედ კრიპტოვალუტის ექსპერტი გაუწევს, რომელსაც რისკების შეფასება და სტრატეგიების შემუშავება შეეძლება.

3. Big Data ანალიტიკოსი

ინფორმაციის სიჭარბე ტექნოლოგიების განვითარების თანმდევი მოვლენაა. ჩვენი რუტინა ციფრული ტექნიკის გარეშე აღარ არსებობს, რაც კიდევ უფრო ზრდის ე.წ. Big Data-ს და შესაბამისად, მოთხოვნას Big Data ანალიტიკოსებზე. მონაცემთა ანალიტიკას ბიზნესები ახლაც აქტიურად იყენებენ, რათა მომხმარებლებს მათ საჭიროებებზე მორგებული პროდუქტი შესთავაზონ. Big Data კი უფრო მრავალმხრივ ინფორმაციას მოიცავს, რომელსაც  დეტალური შესწავლა სჭირდება. რაც უფრო კომპლექსური ხდება Big Data, მით უფრო მოთხოვნადი იქნებიან Big Data ანალიტიკოსები, რომლებმაც მონაცემზე დაყრდნობით რეალურ დროში გადაწყვეტილებები უნდა მიიღონ და სამომავლო სტრატეგიები დაგეგმონ. Big Data ანალიტიკოსები შეძლებენ როგორც, მაგალითად, დაავადებათა გავრცელების წინასწარ პროგნოზირებას, ისე განათლებაში საუკეთესო მეთოდების იდენტიფიცირებას, რაც საზოგადო კეთილდღეობაში ამ პროფესიის ადამიანების როლს მნიშვნელოვნად ზრდის.

4. კიბერუსაფრთხოების ექსპერტი

ტექნოლოგიურ პროგრესს საფრთხეებიც თან ახლავს. კერძოდ, ჩვენი თითოეული ტრანზაქცია ან თუნდაც სოციალურ ქსელებში განთავსებული ფოტო პერსონალურ მონაცემებს შეიცავს, რაც კიბერდამნაშავეების მთავარ სამიზნედ შეიძლება იქცეს. იმისათვის, რომ ჩვენი პერსონალური მონაცემები დაცული იყოს, კიბერუსაფრთხოების ექსპერტებზე მოთხოვნა სამომავლოდ კიდევ უფრო გაიზრდება. სწორედ კიბერუსაფრთხოების ექსპერტებმა უნდა უზრუნველყონ იმ სერვერებისა თუ მოწყობილობების უსაფრთხოების ზომების შემუშავება, რომლებსაც პერსონალურ ინფორმაციას ვუზიარებთ. ამ პროფესიის ადამიანებზე იქნება დამოკიდებული კიბერშეტევების გამოვლენა, ფინანსური თუ სხვა ტიპის ზიანის პრევენცია და დიდი ბრენდების რეპუტაციის შენარჩუნებაც კი, რომლებიც უმეტესად კიბერთაღლითებისთვის მთავარ სამიზნეს წარმოადგენს.

5. მენტალური ჯანმრთელობის კონსულტანტი

მენტალური ჯანმრთელობის პრობლემებთან დაკავშირებული სტიგმის გადააზრებას საკმაოდ დიდი დრო დასჭირდა. საბედნიეროდ, დღეს საზოგადოებას ესმის, რომ მენტალურ კეთილდღეობაზე ზრუნვა ისეთივე მნიშვნელოვანია, როგორც ფიზიკურ ჯანმრთელობაზე. ასე რომ, მენტალურ ჯანმრთელობასთან დაკავშირებულ პროფესიებს გაქრობა სულაც არ უწერია. პირიქით, დღეს თამამად შეგვიძლია ვისაუბროთ სტრესის, დეპრესიის თუ პროფესიული გადაწვის შესახებ. შედეგად, მენტალური ჯანმრთელობის კონსულტანტები სამომავლოდ კიდევ უფრო მოთხოვნადები გახდებიან. ამ პროფესიის წარმომადგენლები ფოკუსირდებიან როგორც სტრესის მართვასა და პრობლემების გადაჭრის გზების ძიებაზე, ისე პერსონალურ განვითარებაზე. დიდი შანსია, ცხოვრების ხარისხის გაუმჯობესებისა და პროფესიული ზრდის გზაზეც სანდო პარტნიორებად სწორედ მენტალური ჯანმრთელობის კონსულტანტები იქცნენ.