ჭადრაკული იატაკი - საკულტო დიზაინი, რომელიც დახვეწილობის სიმბოლოდ იქცა

ჭადრაკული პატერნის „აფეთქება“ მე-20 საუკუნეში დაიწყო, თუმცა მარმარილოს ძვირადღირებული მასალის ალტერნატივად უკვე კერამიკული ფილების გამოყენება გახდა შესაძლებელი. თუ საუკუნეების განმავლობაში ასეთ დიზაინს ძირითადად დიდ დარბაზებსა და მისაღებ ოთახებში მიმართავდნენ, მე-20 საუკუნის ამერიკულ სახლებში ჭადრაკულმა იატაკმა სამზარეულოსა და აბაზანებში გადაინაცვლა. 1920-იან წლებში ძირითადად, შავ-თეთრი კერამიკული ფილები იყო ხელმისაწვდომი, 30-იანი წლებიდან კი უკვე ფერადი ალტერნატივაც გაჩნდა. 

მე-20 საუკუნეში დიზაინის ფართოდ გავრცელებასა და პოპულარობას ხაზს უსვამს აღნიშნული პერიოდის კინო ნამუშევრებში ნაჩვენები სახლებიც. მაგალითად, ფილმში „როგორ მოვიპაროთ მილიონი“, ოდრი ჰეპბერნის გმირის მდიდრულ საცხოვრებელ სახლში სწორედ ასეთი იატაკია. 

„როგორ მოვიპაროთ მილიონი“, 1966 წელი

სამშენებლო-მოსაპირკეთებელი მასალების არჩევანი სულ უფრო ფართოვდებოდა, თუმცა ჭადრაკული დიზაინის მიმართ ინტერესი უცვლელი დარჩა. მე-20 საუკუნის ამერიკულ თუ საბჭოთა სახლებში იატაკისთვის ძირითადად გამოიყენებოდა ლინოლეუმი, რომელიც  ფინანსურად ხელმისაწვდომი იყო, გამოირჩეოდა გამძლეობით და განსაკუთრებულ მოვლას არ საჭიროებდა. ლინოლეუმი ძირითადად ჭადრაკული პატერნით იწარმოებოდა და მისი დაგება შესაძლებელი იყო როგორც სამზარეულოში, ისე მისაღებ ოთახებში. თუმცა უნდა აღინიშნოს, რომ ლინოლეუმს ვერ ჰქონდა ისეთი ეფექტი, რომელსაც კერამიკული ფილები იძლეოდა. მისი ერა თითქმის დასრულებულია.

ჭადრაკული დიზაინი თანამედროვე ინტერიერში

ჭადრაკული პატერნი მუდმივ ტენდენციად რჩება. თანამედროვე საცხოვრებელი სახლის ინტერიერი მკვეთრად მინიმალისტური და პრაქტიკულია, თუმცა ელეგანტური შტრიხების შესატანად ჭადრაკული დიზაინის იატაკი თუ კედლები კვლავ აქტუალურია. დაბრუნდა კლასიკური კომბინაციები - შავი და თეთრი ან თეთრი და ნაცრისფერი. თუ პირველი მკვეთრ კონტრასტს ქმნის და აქცენტი სრულად იატაკზე გადააქვს, მეორე უფრო ორგანულად ერწყმის მინიმალისტურ ინტერიერს. 

თანამედროვე ინტერიერში ფართოდ გამოიყენება ისეთი ტონების კომბინაციაც როგორიცაა კრემისფერი და თეთრი, ნაცრისფერი და კრემისფერი, ყავისფერი და კრემისფერი, ტერაკოტა და კრემისფერი. მათი ერთობლიობა სახლში სიმყუდროვეს ქმნის. 

ჭადრაკული დიზაინის იატაკი შეიძლება დაიგოს ისეთი მასალებისგან, როგორიცაა ფაიფური, კერამიკული ფილები, ნატურალური ქვა, ვინილი თუ ლინოლეუმი. თითოეული მათგანი განსხვავდება ღირებულებით, ვიზუალითა და გამძლეობით. 

ფაიფური და კერამიკული ფილა გამოირჩევა გამძლეობით და იდეალურია სველი წერტილებისთვის - სამზარეულოსა და აბაზანისთვის, თუმცა საკმაოდ ცივია. ნატურალური ქვა შედარებით ძვირადღირებული, და ვიზუალურად ყველაზე ეფექტურია, თუმცა კერამიკასა და ფაიფურთან შედარებით მეტ მოვლას საჭიროებს. რაც შეეხება ვინილს, აქვს ხელმისაწვდომი ფასი, გამოირჩევა სირბილით და არ საჭიროებს განსაკუთრებულ მოვლას, თუმცა კერამიკულ ფილებთან შედარებით ნაკლებად გამძლეა და ნესტიან გარემოში შეიძლება მალევე გახდეს შესაცვლელი. ლინოლეუმი კი, თუ ნატურალური მასალისგან არის დამზადებული, ინარჩუნებს სითბოს და ამ მხრივ შეიძლება იდეალური იყოს აგარაკისთვის.

ოთახის ფუნქციურობისა და დიზაინის შესაბამისად უნდა შეირჩეს, იატაკი პრიალა იქნება თუ გლუვი. როგორც წესი, პრიალა ფილები მისაღებში გამოყენება, აბაზანასა და სამზარეულოში კი უკეთესი მოჭიდებისა და უსაფრთხოების გამო გლუვი ზედაპირია რეკომენდებული. 

საკულტო ჭადრაკული იატაკი ბოლო პერიოდში კიდევ უფრო აქტიურად ბრუნდება ინტერიერის დიზაინში.