Profect Folie-ს გუნდი გენდერული სტერეოტიპების პირისპირ - როგორ ნერგავს კომპანია ლესვის პროფესიონალურ ტექნიკას საქართველოში

2023 წელს დეკორატორმა თაკო კამკამიძემ დააფუძნა კომპანია Project Folie, რომელიც მომხმარებლებს რემონტს სთავაზობს.

Project Folie-ს წამყვანი მიმართულება არის დეკორატიული ლესვა, რომელიც პროფესიონალურ დონეზე საქართველოში სწორედ კომპანიის გუნდმა შემოიტანა. თაკო კამკამიძე, რომელსაც მანამდე პროექტების მართვის 15-წლიანი გამოცდილება ჰქონდა, თავად დაინტერესდა ლესვით, შეისწავლა ის და მალევე შეკვეთების მიღებაც დაიწყო. დღეს, კომპანია აერთიანებს გუნდს, რომელმაც ბევრი გამოწვევის მიუხედავად სრულიად ახალი სიტყვა თქვა თავის სფეროში. 

უფრო დეტალურად, რას გულისხმობს ვაბი-საბის  ტექნიკა და როგორ ნერგავს Project Folie-ს  გუნდი რემონტისა და ინტერიერის დიზაინის პროფესიონალურ და თანამედროვე მიდგომებს საქართველოში, ამის შესახებ კომპანიის დამფუძნებელი თაკო კამკამიძე გვიამბობს: 

• როგორ დაინტერესდით ლესვის პროფესიონალური ტექნიკით?

Project Folie-ს ნამუშევრები ხასიათდება იაპონური ესთეტიკის მქონე ვაბი-საბის სტილით, რომელიც ყოველთვის მაინტერესებდა. პანდემიის პერიოდში გადავწყვიტე, ჩემს სახლში სწორედ ამ სტილში გამეკეთებინა კედლები. 

რამდენიმე ხელოსანს მივმართე, თუმცა საბოლოოდ სასურველი შედეგი მაინც ვერ მივიღე. გადავწყვიტე, თავად მომეძიებინა ინფორმაცია ლესვის ამ ტექნიკასთან დაკავშირებით. დავიწყე მისი შესწავლა ინტერნეტით, გავიარე კურსები და პარალელურად, პრაქტიკაში გადამქონდა მიღებული ცოდნა. მეუბნებოდნენ, რომ ტყუილად ვწვალობდი, რომ ქალისთვის რთულია ლესვა, თავი დამენებებინა და ისევ ხელოსნებისთვის მიმენდო ეს საქმე, თუმცა იმდენად მაინტერესებდა, მინდოდა, დაწყებული ბოლომდე მიმეყვანა. ალბათ ვგრძნობდი, რომ ეს საქმე ჩემი იყო, მაგრამ ჯერ არ ვიცოდი, რომ ამ სფეროში სერიოზულ ნაბიჯს გადავდგამდი. 

თავიდან ძალიან რთული იყო, რადგან საქართველოში ხელმისაწვდომი რესურსებით დავიწყე ამ საქმიანობის შესწავლა. მაშინ საერთოდ ლესვა არ ვიცოდი რა იყო, არათუ დეკორატიული ლესვა. ყველა მეუბნებოდა, რომ ეს არ არის გოგოს საქმე, რატომ იტანჯავ თავს, ვინმე ავიყვანოთ და მას გავაკეთებინოთ. რეალურად, დასაწყისში ასე იყო, რომ 8-9 საათი ვლესავდი და შემდეგი 2 დღე ვერცერთ კუნთს ვეღარ ვგრძნობდი, ლოგინიდან ვეღარ ვდგებოდი, ისე  ცუდად ვიყავი. 

საბოლოოდ, გავაკეთე ჩემი კედლები ისე, როგორც მომწონდა. შემდეგ ერთ მეგობარს გავუკეთე იგივე, შემდეგ მეორეს. მირჩიეს, რომ დაკვეთაც მიმეღო და ასე დაუგეგმავად შემოვედი ამ სფეროში. ნელ-ნელა გამიჩნდა ინტერესი მასალების მიმართ. ინტერნეტის საშუალებით ვეცნობოდი, როგორ იყენებდნენ მათ, ვტესტავდი რაღაცებს. ჩემი საყვარელი პროცესი დღესაც ახალი მასალებისა თუ ინსტრუმენტების შეძენა და შემდეგ მათი დატესტვა და დაკვირვებაა.   დამატებით გავიარე არაერთი კურსი, ასევე მასტერკლასი იტალიაში, ვისწავლე ახალი ტექნიკები, დავტესტე ახალი მასალები და ცოდნა გავიღრმავე.

• რამ განაპირობა ახალი პროფესიის ძირითად საქმიანობად ქცევა და როგორ შეიქმნა Project Folie, რომელიც მსურველებს უკვე რემონტის შემსწავლელ კურსებსაც სთავაზობს?

არქიტექტურა, რემონტი და დეკორი სულ მაინტერესებდა, ამიტომ გადავწყვიტე, Instagram-ზე გამეკეთებინა გვერდი, რომლითაც აუდიტორიას სხვადასხვა შთამაგონებელ დეკორსა და რჩევას გავუზიარებდი. ამ იდეის განხორციელება დიდი ხნის განმავლობაში მინდოდა. დავიწყე ფოტოების განთავსება, პარალელურად შევისწავლე დეკორატიული ლესვა და საერთო ჯამში თავისით შეიქმნა ჩვენი გვერდი და კომპანია.

კომპანიის სახელს  - Project Folie-ს რაც შეეხება, მის უკან სახალისო ისტორია დგას:  Folie ფრანგულიდან ქართულად ნიშნავს „სიგიჟეს“.  ეს სახელი პირველად დავარქვი ჩემს ძაღლს, რომელსაც ჩემი მსგავსი ხასიათი აქვს.  

ვფიქრობდი, რომ კომპანიის სახელი უნდა იყოს დადებითი ემოციის მომტანი. ამავდროულად, იმავე პერიოდში პარალელურად გავდიოდი ძალიან კარგი ლექტორის პროექტის მართვის კურსებს და იქაც დავალებები გვქონდა, სადაც ერთ-ერთ პროგრამაში პროექტის სახელი თავად უნდა აგერჩია. პროექტს Folie ვუწოდე იმ პერიოდში ჩემს ცხოვრებაში მიმდინარე მოვლენებისა და დადებითი ემოციების გამო. საბოლოოდ, ეს სახელი დაერქვა ჩემს კომპანიასაც. 

რეალურად,  კომპანიაში ძირითადად ყველაფერი არის  ინტუიციითა და შეგრძნებებით გაკეთებული, რაც მგონია, რომ უფრო ბუნებრივს ხდის პროცესს და ვფიქრობ, ამის დამსახურება იყო, თავიდანვე რომ ძალიან დიდი გამოხმაურება რომ მოჰყვა ჩვენს საქმიანობას. 

სოციალურ ქსელში არსებული მოთხოვნიდან გამომდინარე, ჩვენ მალევე გავაკეთეთ კურსები და გამოხმაურებაც საკმაოდ დადებითი გვქონდა. პირველი იყო დეკორატიული ლესვის კურსი, რადგანაც ძალიან დიდი გამოხმაურება მოჰყვა მას. 

დღეს რამდენიმე კომპანია ცდილობს, ჩვენი საქმიანობის კოპირება გააკეთოს. ჩემი მოლოდინი ასეთია, რომ კიდევ გაიზრდება იმ კომპანიების რაოდენობა, ვისაც ჩვენი მიმართულებით მოუნდება მუშაობა. 

ვფიქრობ, რომ ამ სფეროს განვითარებაში, ასევე ქალების პროფესიულ მხარდაჭერაში დიდი წვლილი შევიტანეთ, რადგან სანამ ჩვენს გვერდს ნახავდნენ, მანამდე ეგონათ, რომ ამგვარად საქართველოში კედლები საერთოდ არ მუშავდებოდა. მხოლოდ „პინტერესტზე“ ჰქონდათ ნანახი ნიმუშები და ძალიან უხაროდათ ჩვენი აღმოჩენა, შემდეგ შედეგითაც კმაყოფილები რჩებოდნენ.