„ახალაშენებული ბინა უფრო ხელსაყრელი პირობებით ქირავდება“ - უძრავი ქონების აგენტის რჩევები ბინის მარტივად გასაქირავებლად

ბინების საინვესტიციო მიზნით შეძენა ქართული უძრავი ქონების ბაზარზე სულ უფრო პოპულარული ხდება.

აპარტამენტების კულტურა ქვეყნის მასშტაბით სხვადასხვა კურორტზე დაინერგა. ამავდროულად, მუდმივად იზრდება მოთხოვნა თბილისში ბინების ქირაობაზე. როგორც დღიურად, ისე საცხოვრებლად. კიდევ ერთი ტენდენცია, რაც პანდემიის პერიოდში დაფიქსირდა, გაქირავების ფასის 30%-მდე კლება იყო.

ბინის გაქირავების საკითხის განსაკუთრებული აქტუალობიდან გამომდინარე უძრავი ქონების აგენტ-კონსულტანტ ელენე მეჩიტოვას მივმართეთ კითხვებით, თუ როგორ ბინებზეა დღეს მოთხოვნა და რა კრიტერიუმებს უნდა აკმაყოფილებდეს ბინა, რომ მარტივად გაქირავდეს. ელენე მეჩიტოვა საკუთარი კომპანიის homesearch.ge-ის საშუალებით ძირითადად უცოეხელებთან მუშაობს და მათ საქართველოში გასაყიდ და გასაქირავებელ ბინებს სთავაზობს.

გასაქირავებლად როგორ ბინებზეა დღეს ყველაზე დიდი მოთხოვნა?

პანდემიამ არსებული ვითარება მეტ-ნაკლებად შეცვალა. დღეს ბაზარზე მოთხოვნაა „მაქსიმალური კომფორტი, მინიმალური გადასახადი“. ზოგადად, პანდემიის პერიოდში გაქირავების ფასებმა 30%-მდე იკლო. ეს ტენდენცია განსაკუთრებით პრემიუმ და ლუქსის კლასის ბინებს დაეტყო. მოსახლეობას პანდემიით გამოწვეული გარკვეული ნეგატიური მოლოდინი აქვს. ამიტომ სურთ, რომ ჩაკეტვის დროს ახლოს იყვნენ რეკრეაციულ ზონასთან ან ბინას დიდი აივანი ჰქონდეს. ამას ადრე ასეთ ყურადღებას არ აქცევდნენ. ასევე, ცდილობენ, თავი აარიდონ ისეთ ადგილებს, სადაც ხშირად არის საცობი.

რომელი უბანია ყველაზე მოთხოვნადი?

მე ძირითადად ვმუშაობ უცხოენოვან მომხმარებლებთან, რომლებიც, როგორც წესი, ირჩევენ ვერას. უბნების პრიორიტეტულობა შემდეგი თანმიმდევრობით ნაწილდება: ვერა, ვაკე, მთაწმინდა ,საბურთალო, ორთაჭალა, ისანი.

ვერას უპირატესობა განპირობებულია საერთო სამუშაო სივრცეების არსებობით, ასევე, პატარა კაფეებითა და მაღაზიებით. აქ შესაძლებლობაა, გამოიყენო ავტობუსები და იარო ფეხით. ექსპატების უმეტესობა ჯანსაღი ცხოვრების წესს ირჩევს, ამიტომ მათთვის მნიშვნელოვანია სახლთან სიახლოვეს იყოს სპორტდარბაზი, აუზი ან სხვა გამაჯანსაღებელი ობიექტი.

როგორ განსხვავდება მოთხოვნები გრძელვადიანი და დღიური გაქირავებისთვის?

დღიურად გასაქირავებლად მთავარია, იყოს ცენტრალური ადგილმდებარეობა და ძალიან ლამაზი. იქ 2-3 დღის გატარება უნდა გიხაროდეს და სოციალურ ქსელშიც უნდა შეძლო ფოტოების გამოქვეყნება. სწორედ ამიტომ დიზაინს ძალიან დიდი მნიშვნელობა აქვს. არ არის აუცილებელი, იყოს სრული სამზარეულო. საკმარისია მიკროტალღური ღუმელი და არასრული ქურა. ახლოს უნდა იყო ავტობუსის გაჩერებებთან. ასევე, მნიშვნელოვანია დახვდეს საკმარისი საყოფაცხოვრებო ტექნიკა.

გრძელვადიან გაქირავებას სხვა მოთხოვნები აქვს. აქცენტი კეთდება მეტ საცხოვრებელ კომფორტზე. უნდა ჰქონდეს ნორმალური ზომის სამზარეულო, პრაქტიკული ავეჯი და ბინის გეგმარება. ამ შემთხვევაში ტექნიკის შეძენა ხშრიდ მოლაპარაკების საკითხია ხოლმე.

აღსანიშნავია, რომ ვისაც უცხოელზე ბინის გრძელვადიანად გაქირავება უნდა, სჭირდება სრულად აღჭურვილი და კომფორტული სამზარეულო. ღუმელი და ჭურჭლის სარეცხი მანქანა გაქირავების შანსს 30%-ით ზრდის.

რა კრიტერიუმები განსაზღვრავს გასაქირავებელი ბინის ღირებულებას?

პირველ რიგში, ადგილმდებარეობა და გარშემო არსებული ინფრასტრუქტურა, ანუ ის, რასაც ვერ იყიდი ან ვერ შეცვლი. კეთილმოწყობილი ეზო და კონსიერჟის ან დაცვის სერვისი ასევე განსაზღვრავს გასაქირავებელ ფასს. პარკინგის არსებობა, რემონტი, ავეჯი და ტექნიკა - ეს ყველაფერი ფასის განმსაზღვრელი ფაქტორებია. რაც უფრო სადა და მინიმალისტურია ინტერიერის დიზაინი, მით უკეთესი. თუმცა ეს არ ნიშნავს არასაკმარის ავეჯს ან იაფფასიან შეუხამებელ ინტერიერს.

ხშირად ხდება, რომ ბინის გაქირავება მაღალ ფასად სურთ საუკეთესო რემონტისა და ინტერიერის გამო, მაგრამ სადარბაზო არის ძალიან მოუწესრიგებელი. ეს საკითხიც არ უნდა გამოგვრჩეს.

საინვესტიციო თვალსაზრისით, ახალაშენებული ბინა უფრო ხელსაყრელია?

ახალაშენებულ ბინებს ძველი აშენებული ბინების პრობლემები არ მოჰყვება. ახალ კორპუსებში მონტაჟდება ახალი და სწრაფი ლიფტები, უფრო ლამაზია ფასადი. ამიტომ მათზე მოთხოვნა უფრო მაღალია. თუმცა რიგ შემთხვევებში ძველი თბილისის ტერიტორიაზე ძველ შენობაში კარგად გარემონტებული კოლორიტული ბინებიც მოთხოვნადია.

ზოგადად, ახალაშენებული ბინა უფრო ხელსაყრელი პირობებით ქირავდება, რაც ინვესტორს მეტ მოგებას აძლევს.