როგორ შევინარჩუნოთ სამზარეულო სულ მოწესრიგებული?

გიგრძვნიათ ქაოსი სამზარეულოში? თუ კი, ესე იგი რაღაც გაკლიათ, ისეთი ნივთი, რომელიც მის მოწესრიგებაში დაგეხმარებათ, თან ისე, რომ დიდ ყურადღებასაც არ მოითხოვს. სამზარეულოს ყველაზე გავრცელებული არეულობა, ძირითადად გამოწვეულია ჭურჭლისა და პროდუქტების სათავსოების უკმარისობით, ან მათი არასწორად განაწილების გამო. ინტერიერის სილამაზის შენარჩუნებისთვის, დეკორატიული ნივთების გარდა, სულ მოწესრიგებული სამზარეულოსთვის, თქვენ აუცილებლად დაგჭირდებათ:

თარო, დამატებითი საკიდებით - ყველა სამზარეულოში გამოიძებნება ადგილი კედელზე, სადაც შესაძლებელია მიამაგროთ ჭურჭლის თარო, დამატებითი საკიდებით.

საკიდი თაროები ნაკლებად ტვირთავს სამზარეულოს და იდეალურად გეხმარებათ, რომ მარტივად გაათავისუფლოთ მაგიდის ზედაპირი ზედმეტი ჭურჭლისგან.

ჭურჭლის საშრობი თარო ნიჟარასთან ახლოს - ყოველდღიური მოხმარების ჭურჭლისთვის, რომელიც შეიძლება იყოს რამდენიმე ცალი თეფში, ჭიქა ყავისთვის და ჩაისთვის, რამდენიმე ცალი სუფრის კოვზი, ჩანგალი და დანა, რაც სავსების საკმარისია არეულობის შესაქმნელად. მოწესრიგებულობისთვის სამზარეულოს განუყოფელ ნაწილს წარმოადგენს საშრობი თარო, ნიჟარასთან ახლოს.

საშრობი თარო გეხმარებათ, რომ გაგიმარტივოთ ყოველდღიური მოხმარების თეფშების და ჭიქების „დაბინავების“ პროცესი. რის შედეგადაც, სამზარეულოს ნიჟარაში,  დაურეცხავი ჭურჭელიც არ დაგიგროვდებათ.

კოვზების და დანა-ჩანგლის უჯრის ორგანაიზერი - გარდა ზედაპირებისა, წესრიგი აუცილებელია სამზარეულოს სათავსოებსა და უჯრებში, რათა საჭიროების შემთხვევაში, ნებისმიერმა სტუმარმა, მარტივად და ლოგიკურად შეძლოს სასურველი ნივთის პოვნა და თქვენც, გაგიმარტივდეს დალაგების პროცესი.

დანა-ჩანგალი და კოვზები, ერთ-ერთი სახის ჭურჭელია, რომელიც უხვად გვიგროვდება და ამიტომაც, მათი შენახვა დახურულ სივრცეში უმჯობესია. ამისათვის, გამოიყენეთ მრავალგანყოფილებიანი უჯრის ორგანაიზერი, რომელიც დაგეხმარებათ მათ სწორად განაწილებაში.

კედლის მაგნიტი დანებისთვის - ერთ-ერთი ყველაზე პრაქტიკული ნივთი სამზარეულოში, კედლის მაგნიტია, რომელზეც დანების მიმაგრება და მოხსნა, მოსახერხებელი და მარტივია.

მაგნიტით შეგიძლიათ ჩაანაცვლოთ ტრადიციული, დანების ხის ჩასადები, რომელიც არც თუ ისე პატარა ადგილს იკავებს მაგიდის ზედაპირზე, გარდა ამისა, ის რთულად იწმინდება და დროდადრო, მის სიღრმეებში შესაძლოა გარკვეული ბაქტერიებიც დაგროვდეს. ხის ჩასადებისგან განსხვავებით, სამზარეულოს მაგნიტი, უმარტივესად იწმინდება და თან, მიმაგრებული დანები, ჰაერთან კონტაქტს არ კარგავენ.