როგორ დავეუფლოთ სხეულის ენას გასაუბრებისთვის

ამბობენ, რომ პირველი შთაბეჭდილების მოსახდენად ლიფტში შეხვედრა ანუ 2-3 წუთიც საკმარისია. ამ დროში, შესაძლოა, ადამიანმა მხოლოდ ერთი სიტყვა  თქვას, თუმცა სხეული მის შესახებ იმაზე მეტს იტყვის, ვიდრე თავად. 

არავერბალური კომუნიკაციის ცოდნა საკუთარი თავის ფლობის ინსტრუმენტია. ნებისმიერი ტიპის ოფიციალურ თუ არაოფიციალურ შეხვედრაზე, სხეული მკვეთრ სიგნალებს აგზავნის და შესაძლოა, ამან მოსაუბრეს თქვენ მიმართ დამოკიდებულება რადიკალურად შეაცვლევინოს. 

ამ ბლოგში სწორედ იმ დეტალებს გაგანდობთ, რაც გასაუბრებაზე უნდა გაითვალისწინოთ. აქვე გახსოვდეთ, რომ ხელოვნური ქმედება შესამჩნევია და თუ გააკეთებთ იმას, რასაც კომფორტის ზონიდან გამოჰყავხართ, ჩათვალეთ, რომ ეს მინუს ქულაა. ამიტომ, სანამ ქვემოთ მოყვანილ მეთოდებს მნიშვნელოვან შეხვედრაზე გამოიყენებთ, უმჯობესი იქნება, თუ საკუთარ შესაძლებლობებს ახლობლების გარემოცვაში გამოსცდით და დახვეწაზე იმუშავებთ. 

1. სანამ ოთახში შეხვალთ, გაითავისუფლეთ მარჯვენა ხელი
ითვლება, რომ ხელის ჩამორთმევის ინიციატორი არის ის, ვინც სტატუსით უფრო მაღლა დგას. ამიტომ, თუ ხელს არ გამოგიწვდიან, ნურც თქვენ შეიწუხებთ თავს, მაგრამ მზად იყავით ამისთვისაც და უხერხულობის თავიდან ასაცილებლად, მარჯვენა ხელში არ დაიჭიროთ ჩანთა, პიჯაკი ან სხვა ნივთი. 

2.  როგორ უნდა დავჯდე გასაუბრებაზე?

ა. გასწორდით წელში.

ბ. ოდნავ გადაიხარეთ მოსაუბრისკენ.

გ. ფეხების პოზიცია შეარჩიეთ ისე, როგორც D და E ფოტოებზეა. A, B C პოზები მიუღებელია. 

დ. ნუ გადააჯვარედინებთ ხელებს. ეს ჩაკეტილი პოზაა და მოსაუბრეს ნეგატიურად განაწყობს.

3. მოერიდეთ ხელით სახის შეხებას

ადამიანი დღეში 2500-ჯერ ეხება სახეს და ამის კონტროლი რთულია, თუმცა ნებისმიერი ჟესტი, რომელიც სახის რომელიმე ნაწილთან ხელის მიტანით სრულდება, თქვენზე კარგს არაფერს ამბობს.

4. არ შეეხოთ თმას 

თუ კაცი ხელით ეხება თმას, ეს მის ღელვაზე მიანიშნებს.  ქალისთვის კი, თმა ქალურობის სიმბოლოა და როცა ის ხელით თმებს აწვალებს, ეს ფლირტად აღიქმება. 

5. არ გაიკეთოთ ბეჭედი, სამაჯური ან საყურე, თუკი ჩვევად გაქვთ აქსესუარების წვალება ნერვიულობის დროს

ბევრ ადამიანს ეს ახასიათებს. ამიტომ აქსესუარებმა რომ „არ გაგყიდონ“, უბრალოდ არ გაიკეთოთ ის. 

ჰმ… და მაშინ, რა ვუყოთ ხელებს?

ისაუბრეთ გაშლილი ხელისგულებით ეს თქვენს ღიაობაზე მიანიშნებს. 

ან დაიწყევთ ხელები მიჯრილი ხელისგულებით მუხლებზე ან სკამის სახელურებზე

6. გაიღიმეთ 

ღიმილი გადამდებია. შესაძლოა, გასაუბრებაზეც გადამდები აღმოჩნდეს. ნებისმიერ შემთხვევაში, ეს მოსაუბრეს თქვენდამი პოზიტიურად განაწყობს. 

7. პერიოდულად, მოსაუბრეს შეხედეთ თვალებში
თვალის გუგა არის ერთადერთი ორგანო, რომელიც ყველა ადამიანს ერთნაირი აქვს. როცა ადამიანს თვალებში უყურებთ, თქვენ უგზავნით სიგნალს, რომ ერთნაირები ხართ. ამიტომ უყყურეთ მოსაუბრეს თვალებში, თუმცა ეს არ უნდა ჰგავდეს გამაღიზიანებელ, დაჟინებულ მზერას. 

8. დამშვიდობებისას, ნუ გაიქცევით ოთახიდან
მშვიდად აიღეთ ნივთები, ნუ იჩქარებთ და ნუ შექმნით უხერხულობას პიჯაკის მოცმით ან ჩანთაში რაიმეს ჩალაგებით. 

გახსოვდეთ, გამსაუბრებელი მანამ გაკვირდებათ, სანამ კარს გაიხურავთ.