საქართველოში საშუალო ხელფასი გაიზარდა

საქართველოს სტატისტიკის ეროვნული სამსახურის ინფორმაციის მიხედვით, 2022 წლის პირველ კვარტალში საშუალოდ თვიური ხელფასი 1446.5 ლარს შეადგენს, რაც იმას ნიშნავს, რომ ბოლო ერთ წელიწადში საქართველოში ხელფასების ოდენობა საშუალოდ 190.3 ლარით (15.1%-ით) გაიზარდა. ხელფასის მოცულობა განსაზღვრავს მოსახლეობის ცხოვრების დონეს, შესაბამისად მნიშვნელოვანია ვიცოდეთ სტატისტიკა და ცვლილებებზე მოქმედი ფაქტორების შესახებ ინფორმაცია.

მაჩვენებლის ზრდაზე მნიშვნელოვანი გავლენა იქონია 2022 წელს საჯარო მოხელეების ხელფასის 10 %-იანმა ზრდამ და პირველ კვარტალში ქვეყანაში არსებულმა 13%-იანმა ინფლაციამ.

გამოიკვეთა სფეროებიც, რომელშიც დანარჩენ დარგებთან შედარებით მაღალი ხელფასები დაფიქსირდა. პირველ სამეულში შედის სადაზღვევო და საფინანსო საქმიანობები, სადაც საშუალო ხელფასმა შეადგინა 3037.5 ლარი; ინფორმაცია და კომუნიკაციები - 2339.9 ლარი და სამეცნიერო-ტექნიკური საქმიანობები - 1963.5 ლარი. სამივე დარგში შესაბამისად, წინა წელთან შედარებით 24, 8 და 9 პროცენტითაა გაზრდილი საშუალო შემოსავალი. საგულისხმოა ის ფაქტიც, რომ არაფორმალურად დასაქმებულთა და ე.წ. ფრილანსერთა სტატისტიკა ბოლო წლებში, პანდემიიდან და დისტანციურად მუშაობის შესაძლებლობიდან გამომდინარე გაიზარდა და დასაქმებულები საერთაშორისო ბაზარსაც დაუკავშირდნენ, რამაც მათი შემოსავლის გაზრდა გამოიწვია, ასევე პერსპექტიულობიდან გამომდინარე, გაიზარდა ინტერესი ტექნოლოგიური სფეროს მიმართ.

რაც შეეხება სქესის მიხედვით სახელფასო განაკვეთში განსხვავებას, საქსტატის მონაცემებით, 2022 წლის პირველ კვარტალში ქალების საშუალო ხელფასი 1184.8 ლარს შეადგენს, მამაკაცის საშუალო ხელფასი კი მას 510.6 ლარით უსწრებს  და 1695.4 ლარს უტოლდება, რაც თავისმხრივ, გენდერული უთანასწორობის ფაქტზე და მკვეთრ სახელფასო სხვაობაზე მიუთითებს. 

საქსტატმა ასევე გამოაქვეყნა რეგიონების მიხედვით სახელფასო სტატისტიკა სიდიდის მიხედვით. პირველ ადგილზეა თბილისი, სადაც საშუალო თვიური ხელფასი 1675 ლარია, მას მოჰყვება მცხეთა-მთიანეთი 1319 ლარით და შემდეგ ქვემო ქართლი 1231 ლარით.