როგორ ჩაიარა 2022 წლის ეროვნულმა გამოცდებმა?

2022 წლის ერთიანი ეროვნული გამოცდები დასრულდა და აბიტურიენტებმა უკვე მიიღეს შეტყობინებები იმის შესახებ, თუ რომელ უმაღლეს სასწავლებელში გაგრძელდება მათი სტუდენტური ცხოვრება. ცნობილი გახდა ინფორმაცია იმის შესახებ, თუ რა სპეციალობები იყო წელს ყველაზე მოთხოვნადი და რამდენი სტუდენტი განაგრძობს სწავლას სრული დაფინანსებით.

2021-2022 სასწავლო წლის ბოლოს ერთიან ეროვნული გამოცდებზე გავიდა 41000-ზე მეტი რეგისტრირებული აპლიკანტი, რომელთაგან 32000-ზე მეტი უკვე სტუდენტი გახდა. მათგან 5000-ზე მეტი ჩაირიცხა სახელმწიფოს მიერ დაფინანსებულ უფასო პროგრამებზე, რაც იმას ნიშნავს, რომ მათ უმაღლესში სწავლას სრულად სახელმწიფო დაფარავს. სახელმწიფო გრანტი მოიპოვა 6545-მა სტუდენტმა, რომელთაგანაც 100%-იანი დაფინანსებით სწავლას 1000-ზე მეტი სტუდენტი გააგრძელებს. გამსვლელი ქულის პროცენტული ზღვარი მიმდინარე წელს უცვლელი დარჩა. ყველა საგანში,  მაქსიმალური ქულის 25%-ზე მეტი იყო გადასალახი, ხოლო მათემატიკასა უცხო ენასში - 20%-ზე მეტი.

შეფასებისა და გამოცდების ეროვნული ცენტრის ინფორმაციით, მას შემდეგ, რაც აბიტურიენტებს ამოეწურათ სარეგისტრაციო გვერდზე სასურველი საგნის დამატება-ამოშლის საშუალება, საბოლოო შედეგებით ყველაზე მეტმა აბიტურიენტმა (21800-მდე აბიტურიენტი) ისტორია ამოირჩია, შემდეგი მოთხოვნადი საგანი იყო მათემატიკა (13800-ზე მეტი აბიტურიენტი) და შემდეგ ბიოლოგია (3400-ზე მეტი აბიტურიენტი). ყველაზე ნაკლებმა აბიტურიენტმა აირჩია სასურველ საგნად სახვითი და გამოყენებითი ხელოვნება (200-მდე აბიტურიენტი).

ცნობილი გახდა ასევე იმ მიმართულებების ჩამონათვალი, რომელიც აბიტურიენტებში ყველაზე მეტად სარგებლობდა პოპულარობით და სტუდენტთა კონკურენცია შესაბამისად, მაღალი იყო ამ დარგებში. ესენია ფსიქოლოგია, სამართალი, ბიზნესის ადმინისტრირება და ჯანდაცვის მიმართულებები. აღსანიშნავია, რომ გამოცდების პერიოდში გათვალისწინებული იყო კოვიდ 19-ით გამოწვეული ჯანმრთელობის პრობლემების საკითხებიც და იმ აბიტურიენტებს, რომლებსაც გამოცდების პერიოდში დაუდასტურდათ კორონა ვირუსი, შესაძლებლობა ჰქონდათ, რომ გამოჯანმრთელების შემდეგ დამატებით დანიშნულ გამოცდებზე მიეღოთ მონაწილეობა.

გამოცდების ეროვნულმა ცენტრმა ასევე ისაუბრა იმ დარღვევებზეც, რომელსაც ადგილი ჰქონდა გამოცდების მსვლელობის პერიოდში, კერძოდ, დაფიქსირდა ისეთი პრეცედენტები, როგორიცაა გამოცდაზე მობილური ტელეფონის შეტანის ან სხვის ნაცვლად შესვლის მცდელობები, ასევე დამხმარე მასალის შეტანის და სხვადასხვა მიზეზების გამო გამოცდიდან მოხსნის ფაქტები.