რის მიხედვით შევარჩიოთ ბინა, როცა საცხოვრებელ ქალაქს ვიცვლით

შემოდგომის პერიოდში, სწავლის დაწყებასთან ერთად ქალაქის დატვირთვა იზრდება. ბევრი სტუდენტი ეძებს საცხოვრებელს, რომელიც ფინანსურად ხელმისაწვდომიც იქნება და ტერიტორიულადაც - ადვილად მისადგომი სასწავლო დაწესებულებასთან. იმ ადამიანებისთვის, ვინც საცხოვრებელ ქალაქს იცვლის, თავდაპირველად დამკვიდრება სირთულეს წარმოადგენს, რადგან მათ სჭირდებათ გაერკვიონ მნიშვნელოვანი ობიექტების ადგილმდებარეობაში, უბნების კავშირსა და საფასო კატეგორიებში. ამ ბლოგში გირჩევთ, თუ როგორ აარჩიოთ ხელსაყრელი ადგილმდებარეობა დედაქალაქში ბინის დასაქირავებლად, განსაკუთრებით, თუ ადგილობრივი არ ხართ.

სტუდენტური ცხოვრება

ყველაზე ხშირად საცხოვრებელი ქალაქის ცვლილება სკოლის დამთავრებისა და სტუდენტური ცხოვრების დაწყებას უკავშირდება. აბიტურიენტთა დიდი ნაწილი უმაღლესი განათლების მისაღებად დედაქალაქის უნივერსიტეტებს ირჩევს და შესაბამისად ბინების დამქირავებელთა რაოდენობა მნიშვნელოვნად იზრდება სტუდენტების ხარჯზე. თუ სტუდენტი ხართ და დამოუკიდებლად ქირით ცხოვრება გიწევთ, მრავალი ფაქტორის გათვალისწინებაა მნიშვნელოვანი. ყველაზე მთავარი ფასი და ლოკაციაა, თუმცა არანაკლებ მნიშვნელოვანია საცხოვრებელი პირობები. სტუდენტობის პირველ წლებში რთულია სწავლას სრულ განაკვეთზე მუშაობა შეუთავსოთ, რის გამოც ქირის გადასახადი ძირითადად მშობლების ბიუჯეტიდან ფინანსდება და შესაბამისად, ყოველდღიურ ხარჯებსა და სწავლის გადასახადთან ერთად, შედარებით ეკონომიური ბინის პოვნაა უპრიანი. დედაქალაქის ცენტრალურ უბნებში ბინის ქირაობა იმ შემთხვევაში შეიძლება იყოს ხელმისაწვდომი სტუდენტისთვის, თუკი რამდენიმე ადამიანი იყოფს ბინის ქირას. სხვა შემთხვევაში შედარებით გარეუბანში გირჩევდით ბინის შერჩევას, სადაც მეტრო ახლოს არის და სწრაფ გადაადგილებაში შეგიწყობთ ხელს, რითაც ქალაქის საცობებსაც თავს მეტნაკლებად აარიდებთ. თბილისის ყველა უბანში ხელმისაწვდომია 24 საათიანი სუპერმარკეტები, აფთიაქები და პოლიკლინიკები. ეს ის სამი ობიექტია, რომელიც გადაუდებელ შემთხვევაში და ყოველდღიურად შეიძლება დასჭირდეს ადამიანს.

გარდა ყოველდღიურად საჭირო ობიექტებისა, შესაძლოა სტუდენტებს თავისუფალი დროის გატარება სურდეთ სპორტდარბაზებსა თუ ქალაქის გამწვანებულ ტერიტორიებზე. სპორტდარბაზები თბილისის მასშტაბით ყველა უბანშია ხელმისაწვდომი, არჩევანი თქვენზეა უნივერსიტეტთან ახლოს შეარჩევთ თუ სახლთან ახლოს. რაც შეეხება გამწვანებას და სარეკრეაციო ზონებს, თბილისი არ არის გამორჩეული ამ თვალსაზრისით, თუმცა მაინც მოიძებნება რამდენიმე ლოკაცია, სადაც თავისუფალ დროს სეირნობას, სირბილს/ვარჯიშს ან მშვიდად დაჯდომას შეძლებთ - ასეთია მაგალითად ლისის ტბა, კუს ტბა, ახალი იპოდრომის ტერიტორია, მზიური, დედაენის ბაღი ან დიღმის ტყე-პარკი. ამ ზონების შესაბამისად შეგიძლიათ შეარჩიოთ თქვენი ბინის ლოკაცია მათ სიახლოვეს.

ბინა ოჯახისთვის

სტუდენტებისგან განსხვავებით, ოჯახური ცხოვრებისთვის შედარებით დიდი საცხოვრებელი სივრცეა საჭირო. სივრცის სიდიდე დამოკიდებულია ოჯახის წევრების რაოდენობაზე. თუკი თქვენი ოჯახის წევრები ბავშვებიც არიან, გასათვალისწინებელია მათი ბაღის ან/და სკოლის ადგილმდებარეობაც.

საუკეთესო გამოსავალი ასეთ შემთხვევაში არის საცხოვრებელი სახლის ისეთ უბანში შერჩევა, რომელიც ახლოს არის თქვენს  სამუშაო ადგილთან ან ისეთი გზით უკავშირდება მას, რომელსაც მეტროთი გაივლით ან მიწისზედა ტრანსპორტისთვის გზად სპეციალური ზოლებია დახაზული. თუ გავითვალისწინებთ, რომ ქალაქის საცობები ხშირად ხდება იმის საფუძველი, რომ სამსახურებში ხშირდება დაგვიანების ფაქტები, ბავშვები სკოლაში დროულად ვერ მიდიან ან პირიქით, მათი გამოყვანა აგვიანდება მშობელს, უმჯობესია სკოლა და ბაღი შეარჩიოთ თქვენს საცხოვრებელ სახლთან ახლოს, ფეხით სავალ მანძილზე. რთულია სამსახური შეარჩიოთ საცხოვრებელი უბნის მიხედვით, ვინაიდან მეტი შანსია უფრო მალე გამოიცვალოთ სამსახური, ვიდრე სახლი, თუმცა თუ გავითვალისწინებთ იმ ფაქტს, რომ საოფისე ფართები ძირითადად ქალაქის ცენტრალურ უბნებშია თავმოყრილი, შესაძლოა შედარებით ძვირი დაგიჯდეთ ცენტრში ბინის დაქირავება, თუმცა გზის ხარჯებს დაზოგავთ თუკი ფეხით სავალ მანძილზე შეარჩევთ საცხოვრებელს.

რაც შეეხება ზოგად რჩევებს, თავდაპირველად აწონ-დაწონეთ თქვენი მოთხოვნები მომავალი ბინის მიმართ, რა არის თქვენი პრიორიტეტები, რამდენია თქვენი ბიუჯეტი და ა.შ. შეისწავლეთ უბნები მაგალითად სოციალურ ქსელში გაზიარებული რჩევებისა და შთაბეჭდილებების მიხედვით, გაეცანით რას წერენ იქ მცხოვრებლები; გაიკითხეთ, რამდენად მშვიდი უბანია როგორც დღისით, ასევე ღამით; რა გამორჩეული ობიექტები აქვს ახლოს; რამდენად უსაფრთხო უბნად ითვლება მაგალითად საღამოს ან გვიან ღამით გადაადგილების თვალსაზრისით. შემდეგ გადადით უშუალოდ ბინის შეფასებაზე, რამდენად ახლო-ახლოს არის ერთმანეთთან კორპუსები და რამდენად პრივატულად და იზოლირებულად იგრძნობთ თავს კონკრეტულ ბინაში, არის თუ არა ნათელი და თბილი ბინა, მარტივია თუ არა ცენტრიდან თქვენს სახლამდე მოსვლა და ხომ არ შეგექმნებათ ხოლმე პრობლემა გადაადგილებისას. თქვენი პრიორიტეტები ჩამოწერეთ ყველაზე მნიშვნელოვანიდან ნაკლებად მნიშვნელოვანისკენ და შესაბამისად შეაფასეთ სახლი, რომელსაც შეარჩევთ საცხოვრებლად.

დედაქალაქში გასაქირავებელი ბინები შეგიძლიათ დაათვალიეროთ ss.ge-ზე და შეარჩიოთ თქვენთვის სასურველი მდებარეობისა და ფართის მიხედვით.