როგორ შევადგინოთ რეზიუმე სამუშაო გამოცდილების გარეშე

რეზიუმეს შედგენა პირველი მნიშვნელოვანი ნაბიჯია სამსახურის ძიების დასაწყებად. სასურველ ვაკანსიაზე გამოხმაურება სწორედ რეზიუმეს დახმარებით ხდება და აუცილებელია, რომ მასში თავმოყრილი ინფორმაცია რეკრუტერისთვის ამომწურავი, დასამახსოვრებელი და სწორად მიწოდებული იყოს.

ხშირად, ისეც ხდება, რომ პირველი სამუშაოს მაძიებლებს აფერხებთ სამუშაო გამოცდილების არქონა და ამის გამო თავს იკავებენ სასურველ ვაკანსიაზე გამოხმაურებისგან, ან ნერვიულობენ იმის გამო, რომ მათი რეზიუმე ზედმეტად მწირ ინფორმაციას მოიცავს. იმისთვის, რომ სამუშაო გამოცდილების არქონა არ გახდეს შემაფერხებელი ფაქტორი, რომ სასურველ ვაკანსიებს გამოეხმაუროთ, ან არ გამოიწვიოს თქვენში დემოტივაცია მაღალი კონკურენციის შიშმა, გირჩევთ, რომ თქვენს რეზიუმეში ყურადღება გაამახვილოთ თქვენს განათლებაზე, სხვადასხვა აქტივობებში ჩართულობასა და პიროვნულ მახასიათებლებზე.

განათლება

პირველი სამსახურის დაწყებამდე, მნიშვნელოვანია, რომ თქვენი განათლების ნიადაგი მოამზადოთ და შესაბამისი ცოდნები დაიგროვოთ თქვენთვის საინტერესო სფეროში. ფორმალური განათლების გარდა, რომელსაც საშუალო სკოლა და უმაღლესი ან პროფესიული სასწავლებლები უზრუნველყოფს, ასევე, შეგიძლიათ ტრენინგებისა და კურსების გავლა სხვადასხვა სფეროში. თეორიული ცოდნა პრაქტიკული გამოცდილების დაგროვების აუცილებელი წინაპირობაა და შესაბამისად, რეზიუმეში განათლების ველში მსუყე ინფორმაციის მითითების საშუალება გექნებათ, თუკი მრავალფეროვანი განათლება გაქვთ მიღებული, მაგალითად სემესტრულ გაცვლით პროგრამებში მონაწილეობა საზღვარგარეთ, ტრენინგებში ჩართულობა და ა.შ. ყველაზე მოთხოვნადი ტრენინგების შესახებ ინფორმაციის მოძიებაში ჩვენი წინა სტატიაც დაგეხმარებათ.

აქტივობებში ჩართულობა

გარდა საგანმანათლებლო აქტივობებისა, ასევე მნიშვნელოვანი ნაწილია მოხალისეობრივ აქტივობებში ჩართულობა, სხვადასხვა ახალგაზრდულ პროექტებში მონაწილეობის მიღება, რაც ინტერპერსონალური უნარების დახვეწაში დაგეხმარებათ, სანაცნობო წრეს გაგიფართოვებთ, სოციალიზაციის საშუალებას მოგცემთ და გაგიფართოვებთ თვალსაწიერს. ასევე, დამსაქმებლისთვის მანიშნებელი იქნება, რომ განვითარებაზე ორიენტირებული, აქტიური ადამიანი ხართ და სიახლეებისკენ ისწრაფვით. სხვადასხვა აქტივობების ქვეშ შეგიძლიათ მოკლე წინადადებებად ჩამოწეროთ ის კონკრეტული საქმიანობები, რასაც ამა თუ იმ პროექტში ახორციელებდით და ეს შეუქმნის დამსაქმებელს მკაფიო წარმოდგენას, თუ რისი გაკეთება შეგიძლიათ, რა უნარები გაქვთ განვითარებული და შეესაბამებით თუ არა ვაკანსიას, რომლითაც დაინტერესებული ხართ. პირველი სამსახურის ძიებისას მეტ თავდაჯერებულობას შეგმატებთ თქვენი საპროექტო გამოცდილებები.

პიროვნული მახასიათებლები

პიროვნული მახასიათებლები ასევე ძალიან მნიშვნელოვანი ფაქტორია სამუშაო გარემოსთვის. ხშირად, თვისებები და ღირებულებები განსაზღვრავს, თუ რამდენად მოერგებით ან ვერ მოერგებით კომპანიის კულტურას, რამდენად თანხვედრაში ხართ მის ღირებულებებთან და ა.შ. შესაბამისად, თქვენი თავის აღწერისას შეგიძლიათ გამოიყენოთ ისეთი დამახასიათებელი ნიშან-თვისებები, როგორიცაა სტანდარტული უნარები (მაგ: გუნდურად და ინდივიდუალურად მუშაობის უნარი, დროის მენეჯმენტი, დეტალებზე ორიენტირებულობა და სხვ.), ასევე თქვენი ისეთი მახასიათებლები, რითაც ხაზს გაუსვამთ თქვენს ინდივიდუალიზმს. რაც ყველაზე მნიშვნელოვანია, აუცილებლად გულწრფელად დაწერეთ თქვენი მახასიათებლები და არავითარ შემთხვევაში არ გამოიყენოთ შაბლონური სიები. თუკი მარტივად, საძიებო სისტემის დახმარებით ნახავთ, რომ ყველა შაბლონურ სიაში „სტრესულ გარემოში მუშაობის უნარი“ არის მითითებული, თუკი თქვენზე სტრესი უარყოფითად მოქმედებს და მშვიდ გარემოში მუშაობაა კომფორტული, ან რამდენიმე ამოცანაზე ერთდროულად კონცენტრირება გიჭირთ, არ მიუთითოთ გადამეტებული ინფორმაცია იმ მიზნით, რომ პირველადი შთაბეჭდილება მოახდინოთ რეკრუტერზე, ვინაიდან ფაქტის წინაშე რომ აღმოჩნდებით, მაშინ გააანალიზებთ, რომ თქვენ მიერ გაზვიადებული ინფორმაციის გამო, შესაძლოა მეტ სტრესში ჩაიგდოთ თავი, ვიდრე ბუნებრივად შეიძლება ყოფილიყო.

დიზაინი

ასევე მნიშვნელოვანი ასპექტია რეზიუმეს დიზაინი, ვინაიდან სანამ შიგნით თავმოყრილი ინფორმაციის კითხვას დაიწყებ, პირველ ეფექტს ვიზუალური მხარე ახდენს. ამიტომ აუცილებლად მიაქციეთ ყურადღება რომ ნაწერი იყოს გამართული გრამატიკულად, ვიზუალურად გამოიყენეთ შესაფერისი ფონტი და ერთი ზომის ასოები, სათაურები გამოყავით განსხვავებული შრიფტით, დოკუმენტი შეინახეთ PDF ფორმატში და აუცილებლად დაარქვით თქვენი სახელი და გვარი, რათა რეკრუტერმა ფაილების დაორგანიზებისას მარტივად იპოვოს თქვენი რეზიუმე.

რეზიუმეს შედგენა შესაძლებელია SS.GE-ს ვებგვერდის დახმარებით. დასაქმების კატეგორიაში მსურველებს შეუძლიათ შექმნან თავიანთი რეზიუმე, ატვირთონ და გამოიწერონ სასურველი სფეროს ვაკანსიები.