5 შეცდომა რომელიც უნდა აირიდოთ, როდესაც ახლადაშენებულ კორპუსში ყიდულობთ ბინას.

  გსურთ რომ ახლადაშენებულ კორპუსში შეიძინოთ ბინა, თუმცა არ იცით რას უნდა მიაქციოთ ყურადღება მისი შერჩევის დროს? საცხოვრებელი ბინის შეძენა გრძელვადიანი და საკმაოდ ძვირადღირებული ინვესტიციაა, რაც ნიშნავს იმას, რომ იგით ქვენგან სათანადო ყურადღებასა და გეგმაზომიერ მოქმედებას მოითხოვს.

მოდი განვიხილოთ ის 5 შეცდომა, რომელიც თავიდან უნდა აირიდოთ მანამ, სანამ ახლადაშენებულ კორპუსში იყიდით ბინას.

1. დაშვება, რომ ახლადაშენებული  ბინა კონსტრუქციულად უნაკლოა

კარგად შეისწავლეთ სამშენებლო პროექტი, ახლადაშენებული კორპუსი არ მიანიშნებს მის უნაკლოობაზე, ისევე, როგორც ძველი სამშენებლო პროექტი არ გულისხმობს, რომ ის ნაკლულია. ყურადღება მიაქციეთ როგორც ბინების განლაგებას, ასევე ბინაში ოთახების გადანაწილებას. 

რა მასალაა გამოყენებული კედლის დათბუნებისთვის? იზოლაციისთვის? ოთახების განლაგებისას გათვალისწინებულია თუ არა მზის დაცემის კუთხე? ქარის მოძრაობის მიმართულება? როგორ არის აგებული საკომუნიკაციო სისტემა? იძლევა თუ არა სამშენებლო პროექტი ინდივიდუალური მოთხოვნილებების დაკმაყოფილების შესაძლებლობას ?

ნუ შეიკავებთ თავს კრიტიკული კითხვების დასმისგან, საჭიროების შემთხვევაში გაიარეთ კონსულტაცია სპეციალისტთან.

2.  სამართლებრივი დეტალების უგულებელყოფა.

"თუ გინდათ მშვიდობა, მოემზადეთ ომისთვის", უმჯობესია ყოველთვის დაუშვათ, რომ კომპანია ვისგანაც ბინას ყიდულობთ სამაგალითო კეთილსინდისიერებით არ გამოირჩევა. ხშირად, ახლადაშენებული კორპუსის მესაკუთრეები წარმოშობილი ფინანსური ვალდებულებების დაფარვის მიზნით, აჩქარებულ ტემპებში ცდილობენ ბინების რეალიზაციას.   გაიარეთ კონსულტაცია იურისტთან, დარწმუნდით, რომ ახლადაშენებული კორპუსის სამართლებრივი სტატუსი შეესაბამება კანონმდებლობის მოთხოვნებს.

დეტალურად გაეცანით ხელშეკრულებას, განსაკუთრებული ყურადღება მიაქციეთ ხელშეკრულების საგნის (ბინის) აღწერასა და მხარეთა ვალდებულების პუნქტს. თუკი ხელშეკრულებაში გამოყენებული რომელიმე ტერმინი ბუნდოვანი და ორაზროვანია, ნუ მოაწერთ მას ხელს მანამ, სანამ კონტრაქტორთან არ დააზუსტებთ მის მნიშვნელობას. 

3. კორპუსის მიმდებარე ტერიტორიის არასათანადოდ შესწავლა

 საცხოვრებელი ბინის ღირებულებაზე გავლენას ახდენს არა მხოლოდ მისი ადგილმდებარეობა, დიზაინი და პროექტის ნაირსახეობა, არამედ ის ნიშან-თვისებები, რომელიც მიმდებარე ტერიტორიას ახასიათებს. ახლადაშენებული კორპუსთან ადაპტაციას განიცდიან, არამხოლოდ ბინის ახალი მესაკუთრეები, არამედ ის პირები, რომლებიც წლების განმავლობაში ცხოვრობენ ან საქმიანობენ მის მიმდებარე ტერიტორიაზე. ობიექტურად გაანალიზეთ მათი განწყობა და დამოკიდებულება ახლადაშენებული კორპუსის მიმართ. ხშირია შემთხვევა, როდესაც მიმდებარე ტერიტორიაზე მყოფ პირებს მიაჩნიათ, რომ კორპუსის აშენებით შეილახა მათი ინტერესები.

ასევე, ეცადეთ განსაზღვროთ ბინის ღირებულების ცვლილებასთან დაკავშირებული სამომავლო პერსპექტივები - მიმდებარე ტერიტორიაზე ხომ არ იგეგმება ისეთი ინვესტიციის განხორციელება, რომელიც არსებით გავლენას იქონიებს ბინის ღირებულების ცვლილებაზე ?

4. ბიუჯეტის არასწორი განაწილება.

ახლადაშენებულ კორპუსში ბინის შეძენა, ხშირ შემთხვევაში, გაძლევთ უნიკალურ შესაძლებლობას, თავად განსაზღვროთ ბინის ინტერიერი და დიზაინი. თუმცა უნდა აღინიშნოს ისიც, რომ ეს გარკვეულ სირთულეებსაც წარმოშობს ბიუჯეტის გადანაწილების თვალსაზრისით. 

პირველ რიგში, ბინის ყიდვამდე, უნდა დარწმუნდეთ, რომ გაქვთ საკმარისი თანხა მისი კეთილმოწყობისთვის. ნუ დაიწყებთ ბინის კეთილმოწყობას იქამდე სანამ არ გაქვთ სრული წარმოდგენა მისგან მომდინარე ხარჯებზე. ხარჯთაღრიცხვაში აუცილებლად ასახეთ "გაუთვალისწინებელი ხარჯის" პუნქტი. სანამ შეიძენთ  ბოლო მოდელის აქსესუარებსა და სამშენებლო პროდუქტს კარგად დაფიქრდით ნამდვილად გჭრიდებათ თუ არა ის -  საუკეთესო დასაკიდი ბუხრის ძებნის დროს არ დაგავიწყდეთ, რომ სააბაზანოც უნდა მოაწყოთ.

5.  სამშენებლო კომპანიის შესახებ არასაკმარისი ინფორმაციის მოძიება.

მიუხედავად იმისა, რომ სამშენებლო ინდუსტრია ყოველწლიურად ვითარდება, 

მხედველობაში უნდა იქონიოთ ის გარემოება, რომ ნებისმიერი კომპანია ხარჯების შემცირებისა და მოგების მაქსიმიზაციისკენ მიისწრაფის. მოიძიეთ ინფორმაცია სამშენებლო კომპანიის მიერ უკვე  განხორციელებული პროექტების თაობაზე, გაანალიზეთ თქვენი პოტენციური მეზობლების (ანუ ის ადამიანები, რომლებმაც უკვე შეიძინეს ბინა ახლადაშენებულ კორპუსში) განწყობები და უკუკავშირი კომპანიისგან მიღებულ მომსახურებასთან დაკავშირებით.

მშენებლობის პროცესში შეცდომებისგან არავინ არის დაზღვეული, ექსპლუატაციის დროს შეიძლება აღმოაჩინოთ, რომ თქვენს ბინას რაიმე წინასწარ განუსაზღვრელი დეფექტი გააჩნია. ამიტომ უმჯობესია თუკი წარმოდგენა გექნებათ კომპანიის გადახდისუნარიანობაზე.