როგორ მოვამზადოთ მიწის ნაკვეთი სახლის ასაშენებლად

სახლის აშენება ცხოვრებაში ერთერთი საუკეთესო გადაწყვეტილებაა, თუმცა ასევე, გასათვალისწინებელია, რომ ის გარკვეულ სირთულეებსაც უკავშირდება და დიდი დროის დათმობას მოითხოვს. სახლის აშენებამდე კარგად უნდა მოემზადოთ და დაიგროვოთ ის ცოდნა, რომელსაც შემდგომში გამოცდილებაც დაემატება და დაგეხმარებათ, რომ სწორად გაართვათ თავი ყველაფერს.

სანამ უშუალოდ სახლის აშენებამდე გადახვალთ, მნიშვნელოვანია, რომ წესრიგში მოიყვანოთ ყველა ის დოკუმენტაცია, რომლის საფუძველზეც, თქვენი მშენებლობა კანონიერი და ნებადართული იქნება კონკრეტულ ლოკაციაზე. პირველ რიგში, დააზუსტეთ რა ტიპის მიწის ნაკვეთს ფლობთ და მასზე მშენებლობა კანონით ნებადართულია თუ არა, დადებითი პასუხის შემთხვევაში კი ისიც გადაამოწმეთ, შეზღუდული ხომ არ არის შენობა-ნაგებობის კვადრატულობა. თუ მიწის ნაკვეთის ტიპი უპრობლემოდ იძლევა მშენებლობის შესაძლებლობას, გადაიფორმეთ ის თქვენ ან თქვენი ოჯახის წევრის სახელზე, რათა რეესტრში მესაკუთრის ვინაობა, ნაკვეთის ზუსტი ადგილმდებარეობა და ფართობი ფიქსირდებოდეს. იმისთვის, რომ ფურცელზე დატანილი საზღვრები რეალურად მიწაზე გადმოიტანოთ, რომ განსაზღვროთ საიდან სადამდეა თქვენი ტერიტორია, საჭიროა მიწის აზომვა, აზომვითი სამუშაოების ჩატარება, ნახაზის მომზადება. მისი დახმარებით განსაზღვრავთ იმ 4 წერტილს, საიდან სადამდეც თქვენი მომავალი სახლის ღობე თუ გალავანი ამოშენდება. მშენებლობამდე დააზუსტეთ თქვენი ნაკვეთის ტერიტორიაზე ან მის სიახლოვეს მოყვანილია თუ არა კომუნიკაციები: ელექტროენერგია, ბუნებრივი აირი, წყალ-კანალიზაცია. ამ ჩამონათვალის მოგვარება ეტაპობრივადაა შესაძლებელი. უპირველეს ყოვლისა, დაწერეთ განცხადება თქვენს არეალში ელექტროენერგიის მომწოდებელ კომპანიასთან, რათა უზრუნველყონ ელექტროენერგიის დისტრიბუცია და ე.წ. „გამრიცხველიანება“. აბონენტის ნომრის მინიჭების და მრიცხველის დამონტაჟების შემდეგ თქვენ უკვე შეძლებთ, რომ ნაკვეთზე ისეთი სამუშაოები ჩაატაროთ, რაც შეიძლება დენის წყაროს მოითხოვდეს.

სახლის აშენებამდე, ასევე, არსებითად მნიშვნელოვანი ფაქტორია წყალი. წყალი არამხოლოდ დასალევად, არამედ მშენებლობის პროცესშიც საჭირო „ატრიბუტია“. არსებობს სხვადასხვა გზები, თუ როგორ შეიძლება შეიყვანოთ თქვენს ნაკვეთში წყალი, ყველა მათგანს განსხვავებული ფასი და ფორმა აქვს და ინდივიდუალურად გადასაწყვეტია. მაგალითად, თუ თქვენთან ახლოს არის სოფელი, რომელიც უარს არ აცხადებს რომ წყალი გიწილადოთ, შესაძლებელია სპეციალური მილების დახმარებით მეზობელი სოფლიდან გადმოიყვანოთ წყალი. მეორე ვარიანტია ე.წ. ბაკი. ცისტერნა რომელიც სახლის სახურავთან მაგრდება ძრავზე მუშაობს და მისი დახმარებით ონკანში წყალი მოედინება, თუმცა გასათვალისწინებელია, რომ აღნიშნულ ცისტერნებს სხვადასხვა მოცულობა აქვს და ამის შესაბამისად სჭირდებათ შევსება. მესამე და შედარებით ძვირიანი, თუმცა ყველაზე ხარისხიანი და უტყუარი ვარიანტი არის ჭა. სპეციალური აპარატურის დახმარებით, შესაძლებელია თქვენი მიწის ნაკვეთის ზედაპირის სკანირება და იმის გაგება, თუ რომელი წერტილი შეესაბამება ყველაზე მეტად ჭის ლოკაციას. წინასწარ პროგნოზირებადი არ არის, თუ რამდენ მეტრზე იქნება საჭირო მიწის გათხრა, სწორედ ამიტომ შეიძლება იყოს ეს ვარიანტი საშუალო ფასიანი ან ძვირიანი. წყალი შესაძლოა ამოვიდეს როგორც 30-35 მეტრზე, ისე - ნაკლებად გამართლების შემთხვევაში - 70 მეტრის გათხრაც კი დაგჭირდეთ. ამ მომსახურების საფასური კი ყოველი მეტრის მიხედვით ითვლება და ყოველი მეტრის დამატება ფასსაც ზრდის. მიწიდან ამოსული წყალი შესაბამის ლაბორატორიულ შემოწმებაზე უნდა გაგზავნოთ, რომ დაადგინოთ მისი დასალევად ვარგისიანობის საკითხი. ჭის მოცულობა დამოკიდებულია ასევე იმაზე, ინდივიდუალურად მხოლოდ თქვენ გამოიყენებთ თუ საზიარო იქნება რამდენიმე მეზობლისათვის.

ბუნებრივი აირის შეყვანაც ელექტროენერგიის მსგავსად, ახალი საყოფაცხოვრებო მომხმარებლის ქსელზე მიერთების განცხადების დაწერით ხდება. აბონენტის მინიჭების საკითხი განხილვაში შედის და ქსელზე მიერთების საკითხი საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკი) მიერ რეგულირდება.

კომუნიკაციების შეყვანის დასრულების შემდეგ მნიშვნელოვანია, რომ თქვენი ეზოსა და სახლის გეგმა გქონდეთ შემუშავებული, რაც იმას გულისხმობს, რომ წინასწარ იცოდეთ ნაკვეთის რომელ მხარეს აპირებთ სახლის აშენებას, სად გაქვთ გათვალისწინებული აუზი, ხეები, პატარა ბოსტანი, ბაღი (რა თქმა უნდა, მათი არსებობის და სურვილის შემთხვევაში) და ამის მიხედვით დაყოთ თქვენი ნაკვეთი მცირე ზომის სეგმენტებად, რაც გაგიადვილებთ საბოლოო შედეგის ვიზუალურ აღქმას.

ასევე, გასათვალისწინებელია, რომ წინასწარ იცოდეთ რა მასალები დაგჭირდებათ და გადახედოთ ამ მასალების და ხელობის ფასებს, რათა თქვენი ბიუჯეტის განსაზღვრა სწორად შეძლოთ და დარწმუნებული იყოთ, რომ დაწყებული საქმის ბოლომდე მიყვანა შესაძლებელი იქნება ფინანსური შეფერხებების გარეშე.

თუ მზად ხართ, რომ სახლის შენებას შეუდგეთ და ამ პროცესში ჩაერთოთ, მაგრამ ეს ჯერ მხოლოდ სურვილია და მიწის ნაკვეთი ჯერ შერჩეული არ გაქვთ, მთელი საქართველოს მასშტაბით შეგიძლიათ სასურველი ლოკაცია და ფართობი ss.ge-ს განცხადებების მიწის ნაკვეთების კატეგორიაში შეარჩიოთ და მშენებლობისთვის მოემზადოთ.