რა გავითვალისწინოთ უცხოელ დამსაქმებელთან ფრილანსერად მუშაობისას?

დისტანციური და ციფრული უნარების მქონე ადამიანებისთვის საკმაოდ ხელსაყრელია ფრილანს პლატფორმაზე დარეგისტრირება და უცხოელი დამკვეთებისგან შეკვეთების მიღება, მით უფრო, თუკი დამატებითი შემოსავალი  გსურთ და პროექტების შესრულება საკუთარი ცოდნა-გამოცდილებების მიხედვით შეგიძლიათ.

როგორც წესი, მსგავს პლატფორმებზე რეგისტრაცია უფასოა. მართალია, პირველი შეკვეთის მიღება შესაძლოა დროში ცოტა გახანგრძლივდეს, თუმცა ეს ნორმალურია, შეგიძლიათ თქვენს უნარებთან და ინტერესებთან შესაბამის პროექტებზე თავად გამოეხმაუროთ დამსაქმებელს და იმისთვის, რომ მათი არჩევანი თქვენზე შეჩერდეს, საშუალოზე ოდნავ დაბალი ფასი შესთავაზოთ პირველ ეტაპზე. თუმცა გაითვალისწინეთ, რომ არაადეკვატურად იაფ მომსახურებასაც ნუ გასწევთ, რადგან ამ შემთხვევაში შესაძლოა თქვენ მიერ შესრულებული საქმიანობის ხარისხში ან კომპეტენტურობაში ეჭვი შეიტანონ. დამკვეთების „შესაგროვებლად“ და თქვენი რეიტინგის ასამაღლებლად დაიწყეთ მცირედით ნაკლები ფასით და შემდეგ ნელ-ნელა გაზარდეთ მომსახურების საფასური. ასევე, მნიშვნელოვანია, რომ თქვენი პროფაილი რეგისტრაციის შემდეგ შეავსოთ დეტალურად, რისი მეშვეობითაც დამქირავებელს ექნება საშუალება, რომ თქვენი გამოცდილების შესახებ ნახოს ინფორმაცია მარტივად. ასევე გაქვთ შესაძლებლობა, რომ დოკუმენტების სახით ატვირთოთ თქვენი ცოდნის დამადასტურებელი სერთიფიკატები და შესაბამისი დოკუმენტაცია.

შეკვეთის მიღების შემდეგ იწყება ის ნაწილი, სადაც უნდა გამოიჩინოთ სიფრთხილე და დაკვირვებულობა, რათა დადასტურებულად იცოდეთ, რომ თქვენი დამკვეთი სანდო და კეთილსინდისიერი გადამხდელია. ინტერნეტში თაღლითობის შემთხვევები სულ უფრო და უფრო მატულობს, განსაკუთრებით დიდი სიფრთხილე გმართებთ, როდესაც დამკვეთს პირადად არ იცნობთ და მის მიმართ ნდობის ფაქტორი ჯერჯერობით არ გაქვთ ჩამოყალიბებული. ამიტომ, აუცილებელია, რომ მიმართოთ ისეთ გზებს, რომელიც უსათუოდ დაგეხმარებათ იყოთ მეტად დაცული. მაგალითად, დააკვირდით დამკვეთის პროფაილს და კარგად შეისწავლეთ ის, გადაამოწმეთ მის მიერ გამოქვეყნებული სხვა პროექტები, რამდენი აქტიური სამუშაო უდევს პარალელურად, არის თუ არა მისი გადახდები ვერიფიცირებული, როგორი შეფასებები აქვს და ა.შ. ასევე, ძალიან მნიშვნელოვანია კონტაქტის ფორმა. ფრილანსინგ გვერდებს გარანტირებული უსაფრთხოების მიზნით ჩაშენებული აქვთ საკონტაქტო პლატფორმა და ზოგადად ყველა აქტივობა ერთ სივრცეში ხდება, რათა არ მოხდეს მისი გვერდის ავლით დამატებითი კომუნიკაცია დამკვეთსა და შემსრულებელს შორის. შესაბამისად, აუცილებლად გაითვალისწინეთ, რომ თუკი დამკვეთი გთავაზობთ რომ საუბარი გააგრძელოთ სხვა საკომუნიკაციო არხში, არ დათანხმდეთ, რადგან დიდი ალბათობით არაკეთილსინდისიერ „დამსაქმებელთან“ გაქვთ საქმე.

მას შემდეგ, რაც დააზუსტებთ ყველა დეტალს დამკვეთის თაობაზე და დააპირებთ გაუგზავნოთ შეთავაზების ტექსტი მომსახურების შესრულებაზე, აუცილებლად აწონ-დაწონეთ, რომ ნამდვილად შეესაბამება თქვენს უნარებს და თქვენ სხვაზე უკეთ შეძლებთ თავი გაართვათ მოვალეობას. რაც შეეხება ანგარიშსწორებას, ფრილანს პლატფორმებს ძირითადად ჩაშენებული აქვთ საფულეები, რომლიდანაც თანხის გადატანა შესაძლებელია ფეიფალზე და შემდეგ პირად ბარათზე, განაღდებისთვის. თითოეული წარმატებით აღებული პროექტიდან გარკვეული პროცენტი რჩება თავად პლატფორმას მოგების სახით, რაც მნიშვნელოვანი წილი არ არის დასაქმებულისთვის.

გარდა ტექნიკური დეტალებისა, გასათვალისწინებელია უცხოელ დამსაქმებელთან კომუნიკაციის თავისებურებებიც. შეთავაზების გაგზავნისას იყავით დამაჯერებელი, მიესალმეთ პოტენციურ დამსაქმებელს, დეტალურად, თუმცა ამავდროულად, მოკლედ დაწერეთ მთავარი სათქმელი, თუ რატომ გსურთ ამ კონკრეტული პროექტის აღება და შესრულება, აღნიშნეთ თქვენი უნარების და გამოცდილების შესახებ, ასევე კარგი იქნება თუ საკუთარ წარმატებებზეც ეტყვით რამდენიმე სიტყვას, რათა დაარწმუნოთ, რომ მსგავსი საქმისთვის წარსულშიც გაგირთმევიათ თავი. დაემშვიდობეთ ასევე თავაზიანად და აღნიშნეთ, რომ მათგან უკუკავშირს ელოდებით. სამუშაოს მიღების შემდეგ კი მასთან დააზუსტეთ ყველა დეტალი, რაც უკავშირდება პროექტს, ყურადღებით მოისმინეთ მისი მოთხოვნები და საჭიროებები და შეუდექით მუშაობას.