რომელი პროფესიები იქნება აქტუალური 2023 წელს?

დროთა განმავლობაში, ჩნდება პროფესიები, რომლებიც რამდენიმე ათეული წლის წინ არც კი არსებობდა და ვერავინ წარმოიდგენდა, რომ პირველ რიგში, ისინი საერთოდ გაჩნდებოდა, მათი საჭიროება და მოთხოვნა გაიზრდებოდა და მაღალანაზღაურებადი და აქტუალურიც კი გახდებოდა. ეს ყველაფერი კაცობრიობის განვითარებას უკავშირდება და პროცესების გამარტივებას უწყობს ხელს, მაგალითად ისეთ ცვლილებებს, როგორიცაა ხელით გასაკეთებელი საქმის ელექტრონულად და ციფრულად მოგვარება. ერთ ცვლილებას მეორე მოსდევს და ადამიანებს, რა თქმა უნდა, ურჩევნიათ შესასრულებელი ამოცანები სწრაფად და ხარისხიანად გადაიჭრას დროის დაზოგვის ხარჯზე. სწორედ ამიტომ ჩნდება ახალი ციფრული პროფესიები, იწერება პროგრამები, იქმნება პლატფორმები და უკვე რიგ საქმეებს ადამიანების ნაცვლად რობოტებიც კი ასრულებენ. 2022-მა წელმა თავი იმითაც დაგვამახსოვრა, რომ პოსტ-პანდემიური პერიოდია და ბევრი ადამიანი დასაქმდა ონლაინ, მათ შორის, საერთაშორისო ბაზარზეც და სხვადასხვა ქვეყნებიდან ერთმანეთს დაუკავშირდნენ დასაქმებულები და დამსაქმებლები. ბაზრის არეალის გაფართოებამ უფრო მეტად პოპულარული გახადა ფრილანსერობა და ის პროფესიები, რაც მარტივად უთავსდება ფრილანსინგს. აქედან გამომდინარე, 2023 წელს მოსალოდნელი აქტუალური პროფესიების შესახებაც შეიძლება ვისაუბროთ.

პირველ რიგში, ერთმანეთისგან უნდა გაიმიჯნოს ორი რამ,  პროფესიები, რომლებიც ლოკალურად პოპულარულია და ადგილობრივ ბაზარზე აქვს საშუალო/ნორმალური ანაზღაურება და თან თანხვედრაშია დასაქმებულის ინტერესებთან და პროფესიები, რომლებიც გლობალურად მოთხოვნადი და საერთაშორისოდ მაღალანაზღაურებადია. 2023 წელს საქართველოში ზრდადი პროფესიების წინასწარმეტყველება შესაძლოა აბიტურიენტების მიერ არჩეულ პროფესიებზე დაყრდნობით გავაკეთოთ, თუმცა ეს არ გამორიცხავს, რომ მათ შეიცვალონ თავიანთი პირველადი პროფესიები და ძალები სხვა სფეროებში მოსინჯონ.

ინფორმაციული ტექნოლოგიები

ინფორმაციული ტექნოლოგიები საკმაოდ ფართო სფეროა და მასში შედის სხვადასხვა ვიწრო მიმართულებები, მათგან ნებისმიერი მათგანი ამ დროისთვის აქტუალურია და ასევე აქტუალური და  მოთხოვნადი დარჩება 2023 წელსაც. მაგალითად, ერთერთი ყველაზე ძნელად მოსაძიებელი და რთულად შესანარჩუნებელი, ამავდროულად, მაღალანაზღაურებადი მიმართულებაა დევოპსი, რაც გულისხმობს ციფრული პროდუქტების შექმნას კომპანიებისთვის, მომხმარებლისთვის სერვისის სწრაფად ხელმისაწდომობას და განახლების მიმართ მოქნილობას. დევოპსი მომავლის პროფესიაა, რომელიც დეველოპერებსა და ოპერაციებს შორის დამაკავშირებელი რგოლია და ორივე მიმართულების მოთხოვნების სინთეზს ქმნის და ამუშავებს. ინფორმაციულ ტექნოლოგიებში ასევე პოპულარულია კოდინგი, რაც გულისხმობს კომპიუტერულ კოდთან მუშაობას, ის პროგრამირების ნაწილია, კოდის წერა ტექნიკასთან სასაუბრო ენაა, რომლის დახმარებითაც კომპიუტერს ვეხმარებით, რომ ბრძანებები გავაგებინოთ. თავად პროგრამირება კი უფრო მეტად ფართო ცოდნას და გამოცდილებას საჭიროებს დამატებით უნარებთან ერთად. პროგრამირების სპეციალისტი ქმნის კომპლექსურ პროგრამას, რომლის დახმარებითაც კომპიუტერი ინსტრუქციების სრულ პაკეტს იგებს და სისრულეში მოჰყავს. ასევე მნიშვნელოვანი და აქტუალურია ინფორმაციულ ტექნოლოგიებში ტესტერის და ხარისხის მართვის სამსახურის ფუნქციები, ვინაიდან სიახლეების დანერგვას ყოველთვის სჭირდება ტესტირება და გამოცდა, სანამ საბოლოო ვერსიას მომხმარებლამდე მივიყვანთ. ამიტომ მნიშვნელოვანი პოზიცია უკავიათ ტესტერებს და ახალი პროგრამებისა თუ აპლიკაციების ხარისხის შემმოწმებლებსაც. გარდა ჩამოთვლილისა, რა თქმა უნდა, ინფორმაციული ტექნოლოგიების სფერო კიდევ ძალიან ბევრ მიმართულებას აერთიანებს, რომელიც მეტნაკლებად მნიშვნელოვანი, აქტუალური და პოპულარულია, შესაბამისად განისაზღვრება მისი ანაზღაურებაც.

დიზაინი

თუკი დღესდღეობით ფურცელზე შესრულებული ნახატი, გამონაკლისების გარდა, მნიშვნელოვან შემოსავალს ვერ მოგიტანთ, იმავეს ვერ ვიტყვით ციფრულ სფეროში გადატანილ დიზაინებზეც. რომელთა შორისაც აღსანიშნავია გრაფიკული დიზაინი. ფურცლის ნაცვლად შეგიძლიათ თქვენი ნახატი სხვადასხვა პროგრამაში შეასრულოთ (ფოტოშოფი, ილუსტრატორი და ა.შ.), ითანამშრომლოთ კომპანიებთან, რომლებსაც სჭირდებათ ლოგოები, პოსტერები, სარეკლამო ბანერები თუ სხვადასხვა ტიპის პროდუქტი და გრაფიკული სახით შექმნილი ნაწარმი მიაწოდოთ რიგ შემთხვევებში სახლიდან გაუსვლელადაც. გრაფიკული დიზაინერის პროფესიაც იმ ჩამონათვალს განეკუთვნება, რომელიც საერთაშორისო ბაზარზე გასვლაში დაგეხმარებათ და შეძლებთ, რომ უცხოელ დამსაქმებლებთანაც გახვიდეთ კონტაქტზე. გრაფიკული დიზაინრებიც, თავისმხრივ, მიმართულებებად იყოფიან და ასევე მოთხოვნადი დიზაინერია Motion გრაფიკული დიზაინერი, რომელიც მოძრავ გრაფიკაზე მუშაობს და მისი შექმნილი შედეგები მომხმარებელს ანიმაციებში, ვიდეოებსა და რეკლამებში გვხვდება. Motion დიზაინმა ერთგვარად გამოაცოცხლა კლასიკური გრაფიკული დიზაინი და მეტი სიცოცხლე შესძინა ნამუშევრებს. როდესაც ვახსენებთ დიზაინს, ასევე უნდა აღვნიშნოთ UI/UX დიზაინი, რაც გულისხმობს ვებ და მობაილ აპლიკაციების დიზაინის შექმნას როგორც ვიზუალური მხარის გათვალისწინებით, ასევე მომხმარებელთა გამოცდილების გათვალისწინებითაც. UI/UX დიზაინერი ზრუნავს, რომ მომხმარებლისთვის რაც შეიძლება მოხერხებული დიზაინი შექმნას და გამოიყენოს მომხმარებლის ფსიქოლოგიასთან დაკავშირებული ხრიკებიც, რაც დაეხმარებათ იმ კომპანიებს, ვინც გაყიდვების სფეროში პოზიციონირებს, რომ მოიზიდონ მეტი კლიენტი კომფორტის გამო და გაზარდონ თავიანთი გაყიდვები გამართული საიტისა თუ აპლიკაციის დახმარებით.

მარკეტინგი

კომპანიებს დღესდღეობით, პოზიციონირებისთვის, ცნობადობის გაზრდისა და მომხმარებლების მოზიდვისთვის აუცილებლად სჭირდებათ მარკეტინგი. ის შეიძლება განვიხილოთ, როგორც კლასიკური განმარტებით და შესაბამისად, კლასიკური მიმართულებით, ასევე დროთა განმავლობაში შემომატებული ფუნქციებითა და მრავალფეროვანი შინაარსით. კლასიკური გაგებით, მარკეტინგი არის ორგანიზაციისთვის დამხმარე ინსტრუმენტი, რომ წარმოაჩინოს კონკურენტული  უპირატესობა, მოუსმინოს მომხმარებელს, ჩაატაროს ბაზრის კვლევა და გაყიდოს ის და ისეთი პროდუქტი, რაც მის სამიზნე სეგმენტს სჭირდება. ტრადიციული მარკეტინგის გარდა არსებობს ციფრული მარკეტინგი, რომლის სპეციალისტებიც ზრუნავენ ბრენდს პოპულარობა მოუტანონ ციფრულ არხებში, ონლაინ რეჟიმში. ციფრული მარკეტინგი საშუალებას იძლევა, რომ სამიზნე აუდიტორია სხვადასხვა ასპექტების მიხედვით განსაზღვროთ (დემოგრაფიული მონაცემები, ინტერესები), გამოიყენოთ სხვადასხვა მარკეტინგ სტრატეგიები და რეკლამისა თუ შეტყობინებების სახით დაუკავშირდეთ პოტენციურ მომხმარებელს. ციფრული მარკეტინგი, თავისმხრივ, კიდევ იყოფა ქვეკატეგორიებად, რაც საშუალებას აძლევს სფეროთი დაინტერესებულ  ადამიანებს, რომ მარკეტინგში მრავალფეროვან საქმიანობას დაეუფლონ და ისწავლონ და დასაქმდნენ სხვადასხვა მიმართულებებით.