როგორ გამოვიყენოთ საახალწლო ფასდაკლებები გონივრულად

თუ ახალი წლის ფასდაკლების პერიოდში ბევრ ისეთ ნივთს ყიდულობთ, რომელიც რეალურად არ გჭირდებათ, იცოდეთ, რომ მარტო არ ხართ. ახალი წელი ახალ მიზნებს, ახალ თავგადასავლებს, ახალ საქმეებს და ხშირად ახალ შენაძენებსაც უკავშირდება. ეს არის დღესასწაული, რომელიც განახლებასთან არის დაკავშირებული. ადამიანების ფსიქოლოგიაც ისეა მოწყობილი, რომ ბევრი ახალი ნივთის შეძენა სურს და ამ დროს შეიძლება არაერთი ისეთი რაღაც იყიდოს, რაც საერთოდ არ სჭირდება.

ფასდაკლებებით არასწორად სარგებლობა და ზედმეტი შენაძენის გაკეთება ერთეული ადამიანების პრობლემა არ არის. ამ დროს მნიშვნელოვანია, ისწავლოთ თავშეკავება და თითოეული შენაძენი გააკონტროლოთ. ფასდაკლებებით სარგებლობა კარგია მხოლოდ მაშინ, როდესაც ამას გონივრულად აკეთებთ. აღნიშნულში კი ჩვენი რჩევები დაგეხმარებათ.

დაფიქრდით, რატომ ყიდულობთ

ხშირად ახალ ნივთს იმიტომ კი არ ყიდულობთ, რომ გჭირდებათ, არამედ იმიტომ რომ მასზე ფასდაკლებაა. ასე რომ, როდესაც ფასდაკლება მოგხიბლავთ, ჯერ დაფიქრდით, რატომ მოგინდათ მისი ყიდვა - იმიტომ რომ გჭირდებათ, თუ იმიტომ რომ უბრალოდ მოწყენილი ან დაღლილი ხართ? როდესაც შენაძენის მიზეზზე დაფიქრებას დაიწყებთ, ფასდაკლებებითაც უფრო გონივრულად ისარგებლებთ.

გადაათვალიერეთ თქვენი ნივთები

თქვენს ოთახს თვალი მოავლეთ და დაფიქრდით, რამდენი ნივთი გაქვთ, რომელიც ერთხელ ან არც ერთხელ გაქვთ გამოყენებული. ბევრი თუ არა, რამდენიმე მაინც გექნებათ. ეს ფაქტი აუცილებლად მიგახვედრებთ იმას, რომ თქვენ გაქვთ ნივთები, რომლებსაც თუ არ შეიძენდით, არც გაგახსენდებოდათ, რომ არ გქონდათ. საახალწლო ფასდაკლებებით სარგებლობამდე კი გაიხსენეთ ასეთი ნივთები და დაფიქრდით, ნამდვილად გჭირდებათ ის? ან იქნებ უკვე გაქვთ მსგავსი და არ იყენებთ?

შეადგინეთ საყიდლების სია

დეკემბრის დასაწყისში შეადგინეთ საყიდლების სია. ჩამოწერეთ მხოლოდ ის პროდუქტები, რომლებიც გჭირდებათ ან იცით, რომ უახლოეს პერიოდში დაგჭირდებათ. როდესაც თქვენს საყვარელ ობიექტებში ფასდაკლებები დაიწყება, თვალი გადაავლეთ სიას და დაფიქრდით, არის თუ არა ნივთი თქვენთვის სასურველი პროდუქტების სიაში. მიუხედავად იმისა თუ რამდენპროცენტიანი ფასდაკლებაა, თქვენთვის შენაძენი გონივრული არ იქნება, თუ ის არ გჭირდებათ.

წინასწარ გათვალეთ ბიუჯეტი

ბიუჯეტის დაგეგმვა არა მხოლოდ საახალწლო ფასდაკლებებით სარგებლობას გაგიმარტივებთ, არამედ ცხოვრებაში ბევრ სხვა საკითხსაც. როდესაც გექნებათ წინასწარ შედგენილი ფინანსური გეგმა, ფასდაკლებების პერიოდში რამდენი უნდა დახარჯოთ ტანსაცმელზე, რამდენი - თავის მოვლის საშუალებებზე და რამდენი სხვა ტიპის პროდუქციაზე, თქვენ ზედმეტი დანახარჯებისგან თავს დაიცავთ. ფასდაკლებების დასრულების შემდეგ კი არ აღმოაჩენთ, რომ გაქვთ ბევრი ნივთი, რომელიც არ გჭირდებათ და სანაცვლოდ აღარ გაქვთ ფული შემდეგ ხელფასამდე.

ბედნიერ და რაც მთავარია, გონივრულ წინასაახალწლო შოპინგს გისურვებთ!