როგორ გავუმკლავდეთ სახლში მწერებს?

სახლში დაუპატიჟებელი სტუმრების გამოჩენა არც ისე იშვიათი მოვლენაა, განსაკუთრებით ზაფხულში. თუმცა ზოგიერთი მწერი სეზონის განურჩევლად ახერხებს ბინაში არსებობას, მათი სახეობებიდან გამომდინარე, გამკლავების მეთოდებიც სხვადასხვანაირია.

წვრილი ფრთოსანი მწერების გაჩენა სახლში შესაძლოა დაკავშირებული იყოს გაურეცხავ ხილ-ბოსტნეულთან, რომელზეც მანამდე არსებობდა მწერის კვერცხი. დიდხანს თუ გააჩერებთ ხილ-ბოსტნეულს და ის ლპობას დაიწყებს, ალბათობა, რომ მწერებს სწრაფი გამრავლებისთვის სასათბურე პირობა შეუქმნათ მაღალია. წვრილი მწერები საკვებ ნარჩენებში და რთულად მისადგომ ადგილებში უფრო მარტივად და სწრაფად მრავლდებიან. ამის თავიდან ასარიდებლად კი საჭიროა, რომ სახლი ხშირად დაალაგოთ სველი წესით და პროდუქტების ვადებს მიაქციოთ ყურადღება, რათა გაფუჭებული საკვები დიდხანს სახლში არ გააჩეროთ.

გარდა საკვებიდან წარმოშობილი მწერებისა, ალბათობა, რომ თქვენს სახლში რწყილები და ტკიპები დაბინავდნენ, შესაძლებელია შინაური ცხოველის „დახმარებით“ გაჩნდეს. ტკიპები და რწყილები სწორედ კატებისა და ძაღლების ბეწვში იდებენ ბინას და მათი მეშვეობით აღწევენ სახლშიც. ტკიპების ნაკბენი საკმაოდ საშიშია და ამიტომ მათი პრევენციისთვის, აუცილებელია, რომ თქვენს ოთხფეხა მეგობარს სპეციალური საყელური გაუკეთოთ, რომელიც მწერებზე ზემოქმედებას ახდენს და აფრთხობს, დაუმუშავოთ ბეწვის სპეციალური ადგილები შესაბამისი მედიკამენტებით და რაც მთავარია, დაიცვათ ცხოველის ჰიგიენური ნორმები როგორც მისი გასუფთავებით, ასევე მისი საწოლი კუთხის ან გადასაყვანი გალიის ხშირად დასუფთავებით. ვინაიდან ცხოველი მთელ ბინაში გადაადგილდება, რწყილი კი დახტის, შეუძლებელია ივარაუდოთ ბინის რომელ კუთხეში შეიძლება იყოს მწერი, შესაბამისად, აუცილებელია მთლიანი სახლის ხშირი დასუფთავება და ყურადღების გამახვილება ჰიგიენაზე. იმ შემთხვევაში კი თუ მაგალითად ტკიპას მაინც მოჰკრავთ თვალს ბინაში, გახსოვდეთ, რომ მისი მოკვლა სხვა მწერებივით მარტივი არ არის და მას ეფექტურად ცეცხლით შეგიძლიათ ებრძოლოთ, მაგალითად ასანთით ან სანთებელით დაწვათ.

თუ ოთახის მცენარეების მოყვარული ხართ, აუცილებლად ყურადღებით უნდა მოეკიდოთ ნიადაგისა და მათი მორწყვის საკითხს, ხშირად მწერების გამრავლების ადგილი ნიადაგში დაგუბებული დიდი რაოდენობის წყალია და ეს მწერები თავად მცენარესაც საფრთხეს უქმნიან. შეამცირეთ მცენარეების მორწყვის სიხშირე, არ მორწყათ უხვი წყლის ნაკადით და დაელოდეთ ნიადაგის გაშრობას. თუკი შეატყობთ, რომ მცენარე დაავადდა ისე, რომ მისი „გამოჯანმრთელება“ პრაქტიკულად შეუძლებელია, აუცილებლად მოაშორეთ ბინიდან.

მეტად სავარაუდოა სახლში პეპლების გაჩენა იმ შემთხვევაში, თუკი ფქვილის შენახვის პირობებია დარღვეული, ხშირად პურის ან/და მჭადის ფქვილს  უჩნდება პეპლები, რომლებიც მთელ სახლში ვრცელდებიან. ასეთ შემთხვევაში მნიშვნელოვანია, რომ დროულად მიგნოთ წყაროს და მისი ლიკვიდაციით დაიწყოთ სახლის მწერებისგან გასუფთავება.

არსებობს არც თუ ისე უსაფუძვლო ვარაუდი, რომ კორპუსის შემთხვევაში პირველ სართულზე უფრო დიდი ალბათობაა მწერების გაჩენის, ვიდრე მაღალ სართულებზე, თუმცა ბოლო პერიოდში აქტუალური ფაროსანების საკითხი მაღალ სართულებზეც ისევე აწუხებთ, როგორც ქვედა სართულის მცხოვრებლებს. გაფენილი სარეცხის სახლში შემოტანისას მნიშვნელოვანია, რომ დაფერთხოთ თითოეული მათგანი, რათა ტანსაცმლის ან თეთრეულის ნაკეცებს შორის ჩამალული მწერი კარადაში არ შეიტანოთ. ამგვარი ქცევა ნებისმიერ სართულზე მცხოვრებ ადამიანს გამოადგება.

გარდა წვრილი მწერებისა შედარებით მოზრდილი და უსიამოვნო მწერია ტარაკანი, რომელიც ხშირად ანტისანიტარიის დროს ჩნდება ან საკანალიზაციო მილებიდან აღწევს სახლში. მისი პრევენციისთვის აუცილებელია, რომ დროულად გაიტანოთ სახლიდან ნაგავი, განსაკუთრებით თუ ურნაში ან ნაგვის პარკში ისეთი ნარჩენებია, რომელიც მალფუჭებად საკვებს ეკუთვნის. ასევე, რეკომენდებულია, რომ უნიტაზი იყოს მუდმივად თავდახურულ მდგომარეობაში, განსაკუთრებით პირველ სართულზე. ტარაკნებთან საბრძოლველად, უმეტეს შემთხვევაში, სპეციალური ქიმიური ხსნარები გამოიყენება, რომელიც მეტნაკლებად უსაფრთხოა ადამიანისთვის. ნებისმიერ შემთხვევაში, თითოეულ საშუალებას მოყვება ინსტრუქცია, რომლის გაცნობა და დაცვაც აუცილებელია მათი შემადგენლობიდან გამომდინარე და შესაძლოა არ შეიძლებოდეს მისი გამოყენება სამზარეულოში, ხელთათმანის გარეშე ან ალერგიის მქონე ადამიანების შინ ყოფნისას.

ვიდრე სახლში უსიამოვნო სტუმრებს აღმოაჩენდეთ, მნიშვნელოვანია, რომ პრევენციის მიზნით საპროფილაქტიკო ზომებიც მიიღოთ, როგორიცაა სახლის ხშირი დალაგება, ოთახების განიავება, ფანჯრებზე მწერების საწინააღმდეგო ბადის გაკვრა, რეგულარული სადეზინფექციო სამუშაოების ჩატარება და ჰიგიენის შენარჩუნება.