ჩვევები, რომლებშიც ვალის არმქონე ადამიანებს უნდა მიბაძოთ

საქართველოს ეროვნული ბანკის მონაცემებით, 2022 წლის დასასრულს საქართველოში კომერციული ბანკების მიერ გაცემული სესხების დავალიანების მოცულობამ 45 275 825 ათასი ლარი შეადგინა. მოსახლეობის უდიდეს ნაწილს სხვადასხვა ტიპისა და მოცულობის ფინანსური ვალდებულება აქვს. თუმცა არიან ისეთებიც, ვისაც სესხი არ აქვს.

თუ თქვენც მათ შორის ხართ, ვისაც სესხი აქვს, საინტერესოა, როგორ წარმოგიდგენიათ ცხოვრება ფინანსური ვალდებულების გარეშე? ალბათ, ეს თქვენი სასურველი და საოცნებო რეალობაა. გაგაცნობთ ჩვევებს, რომლებშიც ვალის არმქონე ადამიანებს უნდა მიბაძოთ, თუ გსურთ, რომ თქვენც მალე გათავისუფლდეთ ფინანსური ვალდებულებისგან.

შეადგინეთ ბიუჯეტი

არაფერია უფრო მნიშვნელოვანი, ვიდრე ბიუჯეტის შედგენა. ფინანსური ექსპერტები თანხმდებიან, რომ ფინანსების სწორი მართვის მთავარი წესი სწორედ ბიუჯეტის შედგენაა. ადამიანები, ვისაც ვალი არ აქვთ, ამ წესს პირწმინდად იცავენ.

სწორი ბიუჯეტირებისთვის უნდა განსაზღვროთ თქვენი შემოსავალი და გასავალი. ამ გზით უზრუნველყოფთ, რომ არ დახარჯოთ ფული, რომელიც რეალურად არ გაქვთ. ბიუჯეტის შედგენა ასევე დაგეხმარებათ, განსაზღვროთ თუ რაში ხარჯავთ თანხას და რომელი ხარჯის თავიდან აცილება შეგიძლიათ მარტივად.

ბიუჯეტირებისთვის შეგიძლიათ გამოიყენოთ სხვადასხვა პლატფორმები, მაგალითად, სპეციალური ონლაინ კალკულატორები ან Google Sheets.

ჩაიწერეთ ყველა ხარჯი

ბიუჯეტის შედგენაზე არანაკლებ მნიშვნელოვანია, რომ მას ნაბიჯ-ნაბიჯ მიჰყვეთ. ეს ნიშნავს, რომ ჩაიწეროთ ყველა ხარჯი. მათ, ვისაც ვალი არ აქვს, როგორც წესი, ზუსტად იციან, რაში ხარჯავენ თითოეულ თეთრს.

დაისახეთ მიზნები

უვალოდ ცხოვრება მოიცავს როგორც გრძელვადიანი, ისე მოკლევადიანი ფინანსური გეგმების დასახვას. ეს გულისხმობს: დანაზოგს ახალი მანქანისთვის, საოცნებო შვებულების დაგეგმვას, ბავშვების სკოლისთვის მომზადებას. თითოეული ეს ხარჯი წინასწარ უნდა განსაზღვროთ და თანხა დასახული მიზნის შესაბამისად დახარჯოთ. მიზნის დასახვასა და მისკენ სწრაფვაში ისეთი პატარა დეტალებიც დაგეხმარებათ, როგორიცაა მაცივარზე თუ სამუშაო სივრცეში გაკეთებული წარწერიანი სტიკერები. როდესაც ისინი ხშირად მოგხვდებათ თვალში, მუდმივად თქვენს გონებაში იტრიალებს და მიზნის მიღწევაც გაგიიოლდებათ.

გააკეთეთ დანაზოგი

ადამიანებს, ვისაც ვალი არ აქვთ, დანაზოგის გაკეთება უყვართ. ისინი შემნახველ ანგარიშზე ყოველთვის ათავსებენ თანხას და რაც მთავარია, ამას რეგულარულად აკეთებენ. ამისთვის შეგიძლიათ ავტომატური გადარიცხვის ფუნქცია გაააქტიუროთ. გარდა იმისა, რომ დანაზოგი გრძელვადიანი ფინანსური მიზნის მიღწევაში დაგეხმარებათ, თქვენ გარკვეული თანხა გექნებათ გადაუდებელი საჭიროებისთვის. ასე ვალის აღება აღარ მოგიწევთ დაუგეგმავი სამედიცინო ხარჯისთვის ან ავტომობილის შეკეთებისთვის.

გააკეთეთ გონივრული შენაძენი

ადამიანებმა, ვისაც ვალი არ აქვთ, იციან, როდის თქვა „არა“. ისინი ბევრს მუშაობენ საკუთარ თავზე, რომ დაგეგმილ ბიუჯეტს მიჰყვნენ და იმპულსური შენაძენისგან თავი შეიკავონ. ამისთვის, პატარა-პატარა დეტალების გათვალისწინებაა საჭირო. მაგალითად, წაშალეთ თქვენი სადებეტო ბარათის მონაცემები ონლაინ მაღაზიების ანგარიშიდან, ხშირად არ ესტუმროთ სავაჭრო ცენტრებს...

გონივრული ხარჯები მოიცავს კვების ხარჯებსაც. ადამიანები, ვისაც ვალი არ აქვთ, სადილსა თუ ვახშამს უმეტესად სახლში ამზადებენ. მათ კარგად იციან, რომ გარეთ კვება ასობით დამატებით ლარს უდრის.

არ გამოიყენოთ საკრედიტო ბარათი

შეიძლება ფიქრობთ, რომ საკრედიტო ბარათი ძალიან მოსახერხებელია. მით უმეტეს იმ შემთხვევაში, თუ მას ყოველთვიურად ანულებთ. მაგრამ რეალურად საკრედიტო ბარათი იმპულსური შენაძენისკენ გიბიძგებთ.

ისაუბრეთ თქვენს ფინანსურ მდგომარეობაზე

ოჯახის წევრებთან თქვენს ფინანსურ მდგომარეობაზე საუბარს ნუ მოერიდებით. აუხსენით ახლობელ ადამიანებს, რისი ფინანსური შესაძლებლობა გაქვთ ამ კონკრეტულ მომენტში და რისი - არა. ასე უნდა მოიქცეთ თქვენს შვილებთანაც. ამ გზით არაგონივრული, დამატებითი ხარჯებისგან უფრო დაცული იქნებით, რადგან არც თქვენი ოჯახის წევრებს ექნებათ თქვენგან მეტის მოლოდინი.

გაითვალისწინეთ რჩევები და მართეთ თქვენი ფინანსები გონივრულად. გახსოვდეთ, ვალის გარეშე ცხოვრება ნამდვილად დიდი უპირატესობაა.