რა უნარებია საჭირო, რომ დაცვაში იმუშაო

მნიშვნელოვან ობიექტებს ყოველთვის სჭირდება დაცვა. ზოგიერთი ობიექტი ვიდეოკამერების კონტროლის ქვეშ არის და შესაბამისად, დისტანციურად იმართება მისი უსაფრთხოების საკითხი, ზოგიერთი კი ადგილზე საჭიროებს უსაფრთხოების სპეციალისტის ყოლას.ამ უკანასკნელი შემთხვევისთვის, დაცვის ოფიცრად მუშაობის მსურველებს შეუძლიათ ss.ge-ზე განთავსებულ ვაკანსიებს გაეცნონ, გამოხმაურებამდე კი იმ უნარებსა და თვისებებზე მოგიყვებით, რაც უსაფრთხოების სპეციალისტს ეფექტურ მუშაობაში დაეხმარება.

ობიექტის სამუშაო სპეციფიკიდან გამომდინარე დაცვის თანამშრომლის ფუნქციები შეიძლება განსხვავდებოდეს ერთმანეთისგან. რა თქმა უნდა, საბაზისო მოვალეობები ერთნაირია, რადგან დაცვის ფუნცია უსაფრთხო და დაცული გარემოს შექმნა და შენარჩუნებაა ორგანიზაციაში. თუმცა კომპანიის სპეციფიკიდან გამომდინარე, მას შეიძლება ევალებოდეს, რომ უცხო პირთა შესვლა არ დაუშვას ობიექტზე ან რიგ შემთხვევაში, კონფლიქტები აღმოფხვრას და ჩართული მხარეები გააშველოს.

ნებისმიერ ობიექტზე, დაცვის თანამშრომლის მთავარი უნარები არის თავაზიანობა, მოთმინების უნარი, გამართული კომუნიკაციის უნარი და ასევე, მნიშვნელოვანია პრეზენტაბელურობის საკითხიც. რიგ შემთხვევებში, ორგანიზაციაში შესვლისას, დაცვის თანამშრომელია ის პირველი ადამიანი, რომელსაც ვიზიტორი ხვდება, აქედან გამომდინარე, მნიშვნელოვანია, რომ ის გამოიყურებოდეს მოწესრიგებულად, სასურველია ეცვას შესაბამისი ფორმა ან ჰქონდეს ატრიბუტიკა, რითაც მისახვედრი იქნება, რომ ის უსაფრთხოებისა და წესრიგის დამცველი თანამშრომელია. ხშირ შემთხვევაში, სწორედ დაცვას მიმართავენ ხოლმე შეკითხვებით და ამიტომ, მნიშვნელოვანი და აუცილებელიც კია, რომ მას კარგი კომუნიკაციის უნარი ჰქონდეს და შეძლოს სწორად და ამომწურავად დააკმაყოფილოს ვიზიტორის შეკითხვები, რა თქმა უნდა, იმ ჩარჩოებში, რა ინფორმაციის გაცემის უფლებაც აქვს. ამის გათვალისწინებით, დაცვის თანამშრომელი კარგად უნდა ფლობდეს ინფორმაციას თავისი დამსაქმებლის შესახებ, უნდა იცავდეს კონფიდენციალურ ინფორმაციას, ჰქონდეს შეფასების და ანალიზის უნარი, რომლის დახმარებითაც კრიტიკული სიტუაციის ამოცნობას შეძლებს და შესაბამისად, ოპერატიულ რეაგირებას მოახდენს.

დაცვის ოფიცრად მუშაობა გარდა თვისებებისა და უნარებისა, რიგ შემთხვევაში მოიაზრებს ფიზიკურ მზაობასაც. განსაკუთრებით, გასართობი ობიექტების დაცვის თანამშრომლებს ხშირად უწევთ ფიზიკური დაპირისპირებების ჩახშობა, გაშველება, დაპირისპირებული მხარეების ერთმანეთისგან გარიდება, შესაბამისად ფიზიკურ ფორმაში ყოფნა მათი პლუსია, რომ შეძლონ ფიზიკური კონფლიქტის აღმოფხვრა და განეიტრალება. ისეთ ობიექტებზე, სადაც ფეისკონტროლია, მაგალითად იმ მომხმარებლებმა, ვინც ობიექტზე არ დაუშვეს, შესაძლოა უკმაყოფილება გამოთქვან და ეს სხვადასხვა ფორმით გამოხატონ. აქედან გამომდინარე, უსაფრთხოების თანამშრომელს მოთმინება მართებს, რომ არ აყვეს პროვოკაციულ გამოხტომებს, რეპლიკებსა თუ სცენებს. ამ ყველაფრის გათვალისწინებით, ემოციური მდგრადობაც დაცვის თანამშრომლის უნარების ნაწილი უნდა იყოს.

გარდა პიროვნული უნარებისა და ფიზიკური მზაობისა, ასევე მნიშვნელოვანი ნაწილია მუდმივი განვითარებისა და ახალი ცოდნების შეძენის სურვილი. სხვადასხვა ტიპის უსაფრთხოების წესების ცოდნა, როგორიცაა სახანძრო უსაფრთხოება, შრომის უსაფრთხოების საბაზისო ცოდნა და ახალი პროტოკოლების ათვისების უნარი;ჰქონდეს დამოუკიდებლად მუშაობის უნარი და ამავდროულად, შეეძლოს ბრძანებების შესრულება და წესების დაცვა. კარგად უნდა ჰქონდეს განვითარებული ზედამხედველობის უნარიც და მეგობრობდეს ტექნოლოგიებთან, რათა საჭიროების შემთხვევაში მონიტორინგი უზრუნველყოს და სათვალთვალო კამერების მონაცემების დამუშავება შეძლოს.