რა პრობლემები შეიძლება შეგვხვდეს ცხოვრების პირველ წელს ახალაშენებულ კორპუსში და როგორ მოვაგვაროთ ისინი

ახალაშენებული კორპუსი ექსპლუატაციაში შესვლის შემდეგ გარკვეული პერიოდის განმავლობაში ფორმირებას კვლავ განიცდის, რასაც ტერმინთა დონეზე „დაჯდომა“ და „შეკუმშვა“ ჰქვია. ეს პროცესები ბუნებრივია და გულისხმობს ნაგებობის ნიადაგთან შერწყმას და პარამეტრების ცვლილებას მცირედით, მასალის მოცულობის ცვლილების გათვალისწინებით. ეს პროცესი პროგნოზირებადია და მათი ხანგრძლივობა დამოკიდებულია კორპუსის სიდიდეზე. აღნიშნული ინფორმაციის მიღება დეველოპერისგან არის შესაძლებელი ზუსტი ან მიახლოებითი პერიოდის თაობაზე.

ახალაშენებულ კორპუსებში შესახლებულ ადამიანთა უმრავლესობა ერთნაირ პრობლემებს უჩივის, სწორედ ამიტომ არსებობს უნივერსალური შემთხვევების გადაჭრის უნივერსალური გზები.

ბზარები კედელზე

როგორც ზემოთ ვახსენეთ, მშენებლობის დასრულების შემდეგ, კორპუსი უნდა „დაჯდეს“, სწორედ ამიტომ, მნიშვნელოვანია, რომ გარკვეული დროით მოვიცადოთ, სანამ ბინაში რემონტს დავიწყებთ. ნაჩქარევმა რემონტმა შესაძლოა ის პირველი პრობლემა გამოიწვიოს, როგორიცაა ბზარები კედელზე. განსაკუთრებით იმ შემთხვევაში, თუ კედლების შეღებვას გადაწყვეტთ შპალერის გამოყენების ნაცვლად. სპეციალისტებთან კონსულტაციის შემდეგ, შეგიძლიათ ზუსტად განსაზღვროთ, როდისაა რეკომენდებული რემონტის დაწყება, ნებადართული თარიღის დადგომის შემდეგ კი გაითვალისწინეთ, რომ უმჯობესია, თუ ახალაშენებული კორპუსის კედლებზე პირველ რიგში, გააკრავთ „ფლიზელინის“ ქაღალდს, რაც კედლებს მინი ბზარების გაჩენისგან დაიცავს. აღნიშნული ქაღალდი არსებობს სადა ვარიანტიც და გარკვეული პატერნებითაც. თუ შპალერი არ მოგწონთ და კედლის შეღებვა გაქვთ გადაწყვეტილი, ასეთ დროს რეკომენდებულია, რომ შპაკლში განიერი ასაზომი ბადეები ჩააყოლოთ, რაც ასევე აარიდებს კედელს ბზარის გაჩენის საშიშროებას.

ხმის იზოლაცია

მეორე პრობლემა, რასაც ხშირად აწყდებიან ახალაშენებულ კორპუსში შესახლებულები, თხელი კედლებია. ადამიანები არამხოლოდ ხმაურს უჩივიან, არამედ აღნიშნავენ, რომ ოდნავ მაღალი ტონალობის საუბარიც კი ესმით მეზობლებისგან. ასეთ დროს კი უხერხულობა იქმნება ისეთი დამატებითი გარემოებების დროს, როგორიცაა მუსიკის მოსმენა, ბავშვის ტირილი, სტუმრების ხმაური და ა.შ. შედარებით მარტივი, თუმცა არც თუ ისე მარტივი გამოსავალია მეზობელთან მოსაზღვრე კედლების ავეჯით შევსება. ეს მცირედით შეაკავებს ხმაურს, თუმცა არ გააქრობს სრულად. თუ რემონტის დაწყებამდე გაითვალისწინებთ, რომ ხმის იზოლაცია დაიცვათ, უმჯობესია თუ მეზობლის საზიარო კედელს თაბაშირ-მუყაოს ფილებითა და ხმის იზოლაციის მასალებით შეფუთავთ. ასეთ დროს აუცილებლად ისიც უნდა გაითვალისწინოთ, რომ ოთახში სივრცე შეგიმცირდებათ.

ჭერის დათბუნება

თუკი ბოლო სართულზე ცხოვრობთ, ჭერის დათბუნება საჭირო და აუცილებელიც კია. პენოპლასტის მასალა არის ერთერთი ვარიანტი ამისთვის, თუმცა თბოუნარიანობით უფრო უკეთესია ქვაბამბა. არსებობს განსხვავებული თბოსაიზოლაციო მასალებიც, რომელთა ფასიც ერთმანეთისგან განსხვავდება და მომხმარებლის არჩევანზეა დამოკიდებული მისი ფინანსური მდგომარეობის გათვალისწინებით. ასევე ჭერის იზოლაცია მნიშვნელოვანია იმ შემთხვევაშიც, თუკი თქვენი ბინა ვერანდის ქვეშ მდებარეობს.