როდის და რამდენი ჯიბის ფული უნდა მისცეთ ბავშვს? - რჩევები, რომლებიც ბავშვისთვის ფულის ხარჯვის ჩვევების გამომუშავებაში დაგეხმარებათ

თუ თვლით, რომ ბავშვს ფულის ხარჯვის ჩვევები პატარა ასაკიდანვე არ უნდა გამოუმუშაოთ, ძალიან ცდებით. ფულის გონივრულად ხარჯვა, ინვესტირება და განკარგვა ადვილად გამოსდით მათ, ვინც ამას ბავშვობიდანვე აკეთებს. პატარების ყველაფრით უზრუნველყოფა და ყოველთვის ნებისმიერი სურვილის შესრულება, მათ ფინანსურ ჩვევებზე ცუდად მოქმედებს. სწორედ ამიტომ აუცილებელია, რომ ბავშვები პატარა ასაკიდანვე შეაჩვიოთ როგორც თანხის გონივრულად ხარჯვას, ისე მის მოგროვებასა და ინვესტირებას. მიზნის მიღწევაში ჩვენი რჩევები დაგეხმარებათ.

აუხსენით, საიდან მოდის ფული

ბავშვმა უნდა იცოდეს, რომ ფული, რომელსაც ოჯახი ხარჯავს, გამომუშავებულია და მის მისაღებად უფროსებმა გარკვეული შრომა გასწიეს. მას არ უნდა ეგონოს, რომ ფული ყოველთვის ექნება. კარგად უნდა გააცნობიეროს, რომ თანხის მისაღებად ადამიანი მუშაობს და საქმის შესაბამისად იღებს ანაზღაურებას. ფულის ხარჯვა კი გამომუშავების შესაბამისი უნდა იყოს.

გამიჯნეთ ერთმანეთისგან საჭირო და სასურველი ნივთები

ბავშვს შეიძლება ბევრი რამე უნდოდეს, მაგრამ აუცილებელია, მას საჭიროსა და სასურველის გამიჯვნა ასწავლოთ. აუხსენით, რომ საჭიროა საკვების, ტანსაცმლის, მედიკამენტების ყიდვა, თუმცა ყოველთვის საჭირო არაა კინოში ან გასართობ ცენტრში წასვლა, მაღაზიაში ყველა შესვლაზე ტკბილეულისა და სათამაშოების ყიდვა. ბავშვმა უნდა გააცნობიეროს, რომ მაღაზიაში შესვლა ყოველთვის ბევრი ფულის ხარჯვასთან არაა კავშირში.

მიეცით ჯიბის ფული, რომელსაც თავად გადაანაწილებს საყიდლებზე

სკოლის ასაკიდან ბავშვს მიეცით სიმბოლური თანხა, მაგალითად, 5 ლარი ჯიბის ფულად, რომელიც 1 კვირის განმავლობაში უნდა ეყოს. მან თავად უნდა განსაზღვროს, მიცემულ თანხას პირველივე დღეს დახარჯავს ტკბილეულში, მთელი კვირის განმავლობაში გამოიზოგავს, სხვას უყიდის რამეს თუ ყულაბაში შეინახავს სხვა დანაზოგთან ერთად.

ამ გზით ბავშვს აჩვევთ, რომ თანხა ყოველთვის ყველაფრისთვის არ გვაქვს და არჩევანის გაკეთებაა საჭირო.

ჯიბის ფულის მიცემის დროს სასურველია, დააწესოთ კონკრეტული თანხა და დღე, როდესაც მას ფულს მისცემთ და ეს არ შეცვალოთ. მაგალითად, 5 ლარი ყოველ ორშაბათს. ეს სისტემატურობა იმ შემთხვევაშიც აუცილებლად უნდა დაიცვათ, თუ ბავშვმა თანხა პირველივე დღეს დახარჯა და მთელი კვირა ჯიბის ფულის გარეშე მოუწია ყოფნა. ასე ისწავლის როგორც მოთმინებას, ისე ბიუჯეტის სწორად განკარგვას.

გახსოვდეთ, ჯიბის ფულის მიცემა არ დაუკავშიროთ ბავშვის ქცევას. არ უთხრათ, რომ თუ კარგად მოიქცევა, მხოლოდ იმ შემთხვევაში მიიღებს თანხას.

წაახალისეთ ფინანსურად

ფინანსური წახალისების ორი გზა არსებობს: როდესაც ბავშვს გარკვეული საქმის სანაცვლოდ თანხას მისცემთ და  როდესაც მას თანხის დაგროვებისთვის მისცემთ გარკვეულ თანხას. პირველ შემთხვევაში, გახსოვდეთ, საქმე, რომელშიც თანხას მისცემთ, არ უნდა იყოს მისი ყოველდღიური რუტინის ნაწილი. მაგალითად, თანხა არ უნდა მისცეთ სწავლისთვის ან საკუთარი სათამაშოების მილაგებისთვის. ასევე, არ აურიოთ ჯიბის ფული და გარკვეულ საქმეში გადახდილი ფული. თანხამ, რომელიც „გამოიმუშავა“ ჯიბის ფული არ უნდა ჩაანაცვლოს.

რაც შეეხება წახალისების მეორე გზას, ამ შემთხვევაში ბავშვს უთხარით, რომ თუ ის მოაგროვებს პირობითად 50 ლარს, თქვენ დანაზოგზე დაუმატებთ 10 ლარს. ასე მას დასაგროვებლად მეტი მოტივაცია ექნება.

დაეხმარეთ მიზნების დასახვასა და თანხის დაზოგვაში

ბავშვს აუხსენით, რომ ყველაფერს ერთდროულად ვერ იყიდის. ამისთვის აუცილებელია, დაისახოს მიზანი, შეადგინოს გეგმა, დააგროვოს თანხა. უთხარით, რომ არსებობს გრძელვადიანი და მოკლევადიანი მიზნები. მაგალითად, მოკლევადიანია მიზანი, როდესაც თანხას თვის ბოლოს ახალი ფანქრებისთვის ან ახალი ლეგოსთვის აგროვებს და გრძელვადიანია, როდესაც მოგროვებას საზაფხულო არდადეგებზე მოგზაურობისთვის იწყებს.

ბავშვმა უნდა გააცნობიეროს, რომ რაც მეტს დაზოგავს, მით სწრაფად მოაგროვებს და მიაღწევს მიზანს, მაგრამ ეს პროცესი არავითარ შემთხვევაში სტრესული არ უნდა გახდეს.

ჩართეთ ოჯახის ფინანსურ საკითხებში

როდესაც ოჯახში გარკვეულ მიზნებს დაისახავთ, ბავშვიც ჩართეთ ამ პროცესში. მაგალითად, მასაც უთხარით, რომ თანხის მოგროვებას იწყებთ ახალი ავტომობილისთვის ან სახლის რემონტისთვის. ამ გზით ბავშვი მიხვდება, რომ მხოლოდ ის კი არ ზოგავს და აგროვებს, არამედ უფროსებიც ასე იქცევიან. შედეგად ის თანხის უფრო გონივრულად ხარჯვას მიეჩვევა.