თანამშრომელთა გადამზადება, როგორც სოციალური პასუხისმგებლობის მაგალითი

სოციალური პასუხისმგებლობის აღება და კომპანიების მიერ განხორციელებული კამპანიები ბოლო პერიოდში საკმაოდ მომრავლდა. ორგანიზაციების სახელით ტარდება  სხვადასხვა ტიპის საქველმოქმედო ღონისძიება, ზოგჯერ კომპანიები სტიპენდიას აწესებენ თავიანთი სახელით, აძლევენ შესაძლებლობებს ადამიანებს, რომ დასახულ მიზნებს მიაღწიონ. საკუთრივ სოციალური პასუხისმგებლობის აღება ორმხრივად სასარგებლო ქმედებაა: შედეგის მხრივ იმ ადამიანებისთვის - ვინც ამ ღონისძიებების ფარგლებში იღებს ბენეფიტს, ხოლო თავად ქმედება - ორგანიზაციის რეპუტაციაზე აისახება დადებითად.

გარდა იმ ბენეფიციარებისა, რომლებიც ღონისძიების სამიზნე აუდიტორიას წარმოადგენენ (და ხშირად, ისინი ყველაზე მოწყვლადი ჯგუფის წევრები არიან, მაგალითად ბავშვები, სოციალურად დაუცველები, შშმ პირები და სხვა), კომპანიებს აქვთ პასუხისმგებლობა თავად თავიანთი დასაქმებულების მიმართ. თუკი ორგანიზაციის თანამშრომელი ვერ გრძნობს თავს სათანადოდ დაფასებულად და მისი შრომითი კმაყოფილება დაბალია, ნებისმიერი „სიკეთე“, რომელსაც კომპანია გარე პირების მიმართ ახორციელებს, თანამშრომლებს გულწრფელ ქმედებად არ მიაჩნიათ და მხოლოდ პიარისა და მარკეტინგის ინსტრუმენტად მოიაზრებენ, აქედან გამომდინარე, ორგანიზაციებმა პირველ რიგში პასუხისმგებლობა თავიანთ თანამშრომლებზე უნდა აიღონ, შეისწავლონ მათი საჭიროებები, ჩაატარონ კვლევა თანამშრომელთა კმაყოფილების შესახებ, გაითვალისწინონ მათი სურვილები, რა თქმა უნდა, სამსახურებრივ ჭრილში და კმაყოფილი და მოტივირებული თანამშრომლებით უფრო მეტად შეძლებენ კამპანიების დაგეგმვას.

რაც შეეხება თანამშრომლების მიმართ აღებულ პასუხისმგებლობას, ეს შესაძლოა იყოს  სხვადასხვა ტიპის წახალისების ფორმები, მათი გადამზადება და კვალიფიკაციის ამაღლებაზე ზრუნვა, რაც ერთი მხრივ, კომპანიასაც გამოადგება და მეორე მხრივ, თანამშრომელიც იგრძნობს ყურადღებასა და დაფასებას. თანამშრომელთა გადამზადება და მათ პროფესიულ განვითარებაზე ორიენტირება საკმაოდ მნიშვნელოვანია, ვინაიდან მუდმივად ცვალებად სამუშაო გარემოში, სადაც ახალი ხელსაწყოებითა და ტექნიკებით მუშაობა ხდება შესაძლებელი, აუცილებელია, რომ თანამედროვე დასაქმებული გამოწვევებს მარტივად უმკლავდებოდეს, ორიენტირებული იყოს პრობლემის გადაჭრაზე, ამავდროულად კი გრძნობდეს მხარდაჭერას კომპანიისგან და კოლეგებისგან.

კომპანიის სფეროდან და ბიუჯეტიდან გამომდინარე, თანამშრომლის გადამზადება შესაძლოა დაიგეგმოს რამდენიმე ფორმითა და მიმართულებით. მაგალითად, კომპანიაში შეიქმნას ონლაინ პლატფორმა, სადაც იქნება განთავსებული სხვადასხვა სფეროს რესურსები და ხელმისაწვდომი იქნება ისინი თანამშრომლისათვის, ამავე პლატფორმაზე კი შესაძლებელი იყოს ტრენინგების გავლაც. გარდა ამისა, კვალიფიკაციის ამაღლების ხელშეწყობა შესაძლებელია ტრენინგცენტრებში პროფესიული კურსების დაფინანსებით, კურსების მოძიება კი შესაძლებელია ss.ge-ს განათლების რუბრიკაში, სადაც სხვადასხვა მიმართულების ტრენინგებია ხელმისაწვდომი.