მინდა ბინის ყიდვა: რითი დავიწყო?

საკუთარი ბინის შეძენა ცხოვრების ერთერთი ყველაზე მნიშვნელოვანი  გადაწყვეტილებაა და შეძენამდე აუცილებლად კარგად უნდა გქონდეთ გააზრებული რა საჭიროებები გექნებათ ახალ ბინაში და შესაბამისი კრიტერიუმებისა და პარამეტრების ბინა უნდა შეარჩიოთ.

პირველ რიგში, მნიშვნელოვანი დეტალია, თუ რამდენი ადამიანი იცხოვრებთ ბინაში, იქნებიან თუ არა მათ შორის ბავშვები ან ხანდაზმულები, სწორედ ამ დეტალების გათვალისწინებით შეგიძლიათ გადაწყვიტოთ ბინის სიდიდე ან/და მასში შემავალი ოთახების რაოდენობის საკითხი. წინასწარ უნდა იცოდეთ რამდენს გასწვდება თქვენი ბიუჯეტი და ამის მიხედვით შესაბამის უბნებში აარჩიოთ ბინები, მათ შორის კი არჩევანი გააკეთოთ ისეთ უბანზე, სადაც ხელი მარტივად მიგიწვდებათ საჭირო და საკვანძო ადგილებზე, როგორიცაა მაგალითად მეტრო, სავაჭრო ცენტრები, სკოლა, ბაღი, აფთიაქები თუ საავადმყოფოები. ახლოს მდებარე ობიექტების მნიშვნელოვნება, ცხადია, ინდივიდუალური საჭიროებებიდან გამომდინარე უნდა განსაზღვროთ. ბინის ყიდვა მისი ქირაობისგან სწორედ იმით განსხვავდება, რომ ყიდვის შემდეგ უფრო დიდხანს და სტაბილურად იცხოვრებთ ამ ბინაში, ვიდრე ნაქირავებში. პრიორიტეტის შეცვლისას ნაქირავები ბინის ცვლილებაც მარტივია, ხოლო ყიდვა-გაყიდვის პროცესი გაცილებით სერიოზული და საფუძლიანი გადაწყვეტილებაა.

მას შემდეგ, რაც განსაზღვრავთ თქვენს ბიუჯეტს და საცხოვრებელ უბანსაც შეარჩევთ, დროა შეხვიდეთ ss.ge-ზე და თქვენთვის სასურველი პარამეტრების მიხედვით გაფილტროთ განცხადებებივრცელი ძიების ღილაკის დახმარებით. მაგალითად, მიუთითოთ პროექტი, ოთახების რაოდენობა, აივანი, სარდაფი, სასურველი სართული და ა.შ. შერჩეული ბინები შეგიძლიათ შეადაროთ ერთმანეთს, სანამ საბოლოო გადაწყვეტილებას მიიღებთ. აუცილებლად გასათვალისწინებელი ფაქტია ისიც, რომ თუკი ძველ აშენებულ და უკვე გარემონტებული ბინის შეძენას აპირებთ, შესაძლოა რიგი დეტალები თქვენი გემოვნების მიხედვით გქონდეთ გადასაკეთებელი და მცირე რემონტისთვის თანხის გათვალისწინება ურიგო არ იქნებოდა. ხოლო იმ შემთხვევაში, თუკი მშენებარე ან დასრულებულ პროექტში თეთრი კარკასი უნდა ჩაიბაროთ, აუცილებელიც კია სარემონტო ხარჯების გათვალისწინება.

შეძენამდე კარგად დაფიქრდით რა შეიძლება იყოს დასაზუსტებელი ახალ ბინასთან დაკავშირებით, მფლობელს ან რეალტორს, ვისთანაც კომუნიკაციას აწარმოებთ, დაუსვით ყველა შეკითხვა, რისი დახმარებითაც ყველა ინფორმაციას ამომწურავად მიიღებთ და თავიდან აიცილებთ გაურკვევლობებს. გულდასმით იზრუნეთ სამართლებრივ საკითხებზე, როგორიცაა ბინის გადმოფორმების საკითხი. შეამოწმეთ საკადასტრო კოდი და დარწმუნდით, რომ ბინა არ არის დატვირთული იპოთეკით ან არ ადევს ყადაღა.