როგორ მოვიქცეთ თუ მუშაობის მოტივაცია გაქრა?

სამოტივაციო სისტემების შექმნა და დახვეწა ყველა კომპანიის შემადგენელ ნაწილს წარმოადგენს. სამოტივაციო სისტემები ადამიანური კაპიტალის მართვის სამსახურის კომპეტენციაში შედის და ის გენერალურ დირექტორთან კოორდინაციით ყალიბდება. ბოლო პერიოდში, მას შემდეგ რაც დასაქმების ბაზარი საერთაშორისო გახდა და სამუშაო ადგილების მოძიება დისტანციურადაა შესაძლებელი, დამკვეთებთან პირისიპირი შეხვედრების გარეშე, კონკურენცია გაიზარდა და დასაქმებულების შენარჩუნება გართულდა. ეს პირველ რიგში იმან გამოიწვია, რომ ონლაინ მუშაობა და კომფორტის ზონაში დარჩენა ბევრ ადამიანს ურჩევნია კვირაში 5 დღე 8 საათიანი გრაფიკის ოფისში გატარებას. იმისთვის, რომ ეს ადამიანები ოფისში გამოვიყვანოთ, მათ ბენეფიტების საკმაოდ მსუყე პაკეტი უნდა შევთავაზოთ.

მეორე მხრივ, თუ მოტივაციის საკითხს დასაქმებულის მხრიდან განვიხილავთ, მისი დაქვეითების ბევრი მიზეზი შეიძლება არსებობდეს: როგორც გარეგანი, ისე შინაგანი ფაქტორები. გარეგან მოტივატორებს მიეკუთვნება სამუშაო გარემო, მატერიალური პირობები, დამოკიდებულებები... შინაგანი მოტივატორები კი სურვილებზეა დამოკიდებული და პიროვნების შიგნიდან მოდის, ძლიერი სურვილი მარცხის მიუხედავად არ მოგცემთ დანებების საშუალებას და აუცილებლად მიგაღწევინებთ დასახული მიზნებისთვის. პირველ რიგში, განსაზღვრეთ თქვენი მოტივაციის გაქრობა შინაგანმა ფაქტორებმა გამოიწვია თუ გარეგანმა. თუ პრობლემა გარეგან ფაქტორებშია, პირველ ეტაპზე სცადეთ თქვენს უშუალო მენეჯერთან გულწრფელი საუბარი, სთხოვეთ, თქვენი საქმე უფრო მრავალფეროვანი გახადოს და ხელი შეგიწყოთ კარიერულ განვითარებაში.

როდესაც ხელმძღვანელობას გულახდილად ესმის თანამშრომლების მოტივაციის დაქვეითების საკითხი, ნორმალურ პირობებში, წესით და რიგით ერთი და ორი თანამშრომლის მიერ აღნიშნული პრობლემაც ყურადსაღები უნდა იყოს და ქმედებისკენ უბიძგოს, რათა დანარჩენების დემოტივაცია თავიდან აიცილოს და პრევენციული ზომები მიიღოს მთლიანი კომპანიის ჩამოშლამდე.

შინაგანი მოტივაციის გაქრობის შემთხვევაში კი თავად უნდა აღმოაჩინოთ ის გამოსავალი, რაც დანაკლისს შეგივსებთ. მოტივაციის დაქვეითება შეიძლება უკავშრდებოდეს პერიოდსაც, მაგალითად ზაფხულში, როდესაც ცხელა და კოლეგების ნაწილი დასასვენებლად მიდის შვებულებაში, სოციალურ ქსელში მათ ფოტოებს უყურებთ პლაჟიდან თუ მთების ფონზე, რთულია სამუშაოზე კონცენტრირდე და ოფისის გარემოში დედლაინებზე იფიქრო. თუმცა წელიწადის დროების „დადანაშაულება“ საკუთარ დემოტივაციაში, არც ისე გონივრულია. როგორც მარკ ტვენი ამბობდა, „ზაფხული — წელიწადის დრო არის, როდესაც ძალიან ცხელა საიმისოდ, რომ ის გააკეთო, რის გასაკეთებლადაც ზამთარში ძალიან ციოდა.“  ასე რომ, მიზეზის პოვნას ყოველთვის შეძლებთ, რომ საქმე გადადოთ.

თუკი ფიქრობთ, რომ ყოველდღიური რუტინა მოსაბეზრებელი გახდა და სამსახურის მიღმა გჭირდებათ რამის კეთება, რაც სარგებელსაც მოგიტანთ, ახალ გამოცდილებებს შემოგთავაზებთ და ცოდნას გაგიმრავალფეროვნებთ, შეგიძლიათ დამატებით პროფესიას დაეუფლოთ, ნელ-ნელა იზრუნოთ თქვენი მიზნის და მომავლის ცვლილებაზე. დაეუფლოთ ახალ პროფესიას, შეიძინოთ ახალი კონტაქტები ახალი ცოდნების პარალელურად და წარმატებული ნეთვორქინგის დამსახურებით სამომავლოდ შემოთავაზებებიც მიიღოთ. თუ არ იცით საიდან დაიწყოთ თქვენი ყოველდღიურობის გამრავალფეროვნება და სად შეარჩიოთ შესაფერისი კურსები, ამაში ss.ge-ს ტრენინგების განყოფილება დაგეხმარებათ.