როგორ ჩაიარა 2023 წლის ერთიანმა ეროვნულმა გამოცდებმა?

დასრულდა 2023 წლის ერთიანი ეროვნული გამოცდები და გამოქვეყნდა როგორც პირველადი, ასევე გასაჩივრების შემდგომი შედეგებიც. აგვისტოს ბოლომდე კი აბიტურიენტებს შესაძლებლობა აქვთ სურვილის შემთხვევაში შეცვალონ პროგრამების რეიტინგულ ჩამონათვალში შერჩეული პროგრამები: დაამატონ, წაშალონ ან გადაანაცვლონ სურვილის მიხედვით. ამისთვის კი უნდა ეწვიონ საკუთარ გვერდს online.naec.ge-ზე ინდივიდუალური პაროლითა და პირადი ნომრით.

2023 წლის ერთიანი ეროვნული გამოცდები იმით გამოირჩეოდა, რომ საქართველოს მასშტაბით 24 საგამოცდო ცენტრი გაიხსნა თბილისსა და 11 სხვა ქალაქში. მათ შორის, წელს პირველად, ამბროლაურში, ახლად გახსნილ საგამოცდო ცენტრშიც ჰქონდათ შესაძლებლობა აბიტურიენტებს, რომ გამოცდები ჩაებარებინათ, რაც რაჭველ აპლიკანტებს მისცემდა დროისა და ფინანსების დაზოგვის საშუალებას, რათა თავი აერიდებინათ ზედმეტი ხარჯებისგან. ასევე, წელს, აბიტურიენტთა უპრეცედენტო რაოდენობა იყო დარეგისტრირებული გამოცდებზე, მათი რაოდენობა 45 000-ზე მეტი იყო, ხოლო გამოცდებზე მათგან გამოცხადდა 94%.

2023 წლის ერთიან ეროვნულ გამოცდებზე მოხსნილი იყო კორონა ვირუსთან დაკავშირებული ყველა შეზღუდვა და რეგულაცია, თუმცა იმ შემთხვევაში, თუკი კოვიდ 19 დაუდასტურდებოდა, შესაძლებლობა ჰქონდა მიემართა საგამოცდო ცენტრისთვის და მისთვის ადრინდელის მსგავსად გაიხსნებოდა საგამოცდო ოთახი.

ცნობილია ასევე, რამდენმა აბიტურიენტმა რომელი  საგანი აირჩია არჩევითი საგნებიდან.  ყველაზე მეტი აბიტურიენტის არჩევანი ისტორიაზე შეჩერდა, ის 22 200-მდე აბიტურიენტმა აირჩია, შემდეგ მოდიოდა მათემატიკა 15 700-ზე მეტი აბიტურიენტის არჩევანით, ხოლო პირველ სამეულში მესამე ადგილზე შარშანდელი სამეულის მსგავსად ბიოლოგია აღმოჩნდა, რომელიც 3 600-ზე მეტმა აბიტურიენტმა აირჩია. ჩამონათვალი გაგრძელდა ისეთი არჩევითი საგნებით, როგორიცაა ქიმია, გეოგრაფია, ფიზიკა, ლიტერატურა, სამოქალაქო განათლება, ხოლო ყველაზე ნაკლებმა აპლიკანტმა აირჩია სახვითი და გამოყენებითი ხელოვნება, მათი რაოდენობა 300-ზე ოდნავ მეტია.

გამოცდები 3 ივლისს ქართული ენისა და ლიტერატურის გამოცდით დაიწყო და 26 ივლისს ფიზიკის გამოცდით დასრულდა, მას შემდეგ კი, რაც მონაწილეებს შედეგების ნახვისა და სურვილისა და საჭიროების შემთხვევაში მათი გასაჩივრების საშუალება მიეცათ, ყველაზე მეტი ნაშრომი ქართულ ენასა და ლიტერატურაში გასაჩივრდა. ჯამში, ყველა საგანში 128 440 ნაშრომიდან გასაჩივრდა 4 292, რაც საერთო  რაოდენობის 3,34%-ს შეადგენს, აქედან ქართულ ენასა და ლიტერატურაში გასაჩივრებულთა რაოდენობა 1 588 იყო, ყველაზე ნაკლები კი ფრანგულ ენაში - 2 გასაჩივრდა. შეფასებები სულ გასაჩივრებული ნაშრომებიდან 1 498 ნაშრომში შეიცვალა, საიდანაც 25 ნაშრომის შემთხვევაში ქულის დაკლება მოხდა, ხოლო დანარჩენებს - მოემატათ.

აბიტურიენტები საგანმანათლებლო პროგრამის არჩევანში საბოლოო ცვლილების შეტანას 30 აგვისტოს 18:00 საათამდე შეძლებენ, ამის შემდეგ კი ცნობილი გახდება ინფორმაცია ჩარიცხვების თაობაზე.