როგორ გავმიჯნოთ ერთმანეთისგან - რა არის სასწრაფო და რა - მნიშვნელოვანი

სამუშაო დღის ბოლოს გქონიათ ისეთი შეგრძნება, რომ ყველა გეგმა შეასრულეთ, გასაკეთებელი საქმეების გასწვრივ პლუსები მიაწერეთ, ვადებში ჩაეტიეთ, თუმცა ფუნდამენტურად მნიშვნელოვანი საქმეები მაინც გვერდზე დაგრჩათ? თქვენ მარტო არ ხართ. კვლევები ადასტურებს, რომ ადამიანები აპრიორიტეტებენ ისეთი დავალებების შესრულებას, რასაც მცირე დედლაინები აქვს, იმის მიუხედავად, რომ ისინი შესაძლოა არც მნიშვნელოვანი იყოს და არც ღირებული. ფსიქოლოგიური მომენტია, რომ ადამიანებს აწუხებთ დანიშნული ვადები და ყოველთვის სურთ, რომ ამ ვადებში ჩაეტიონ, მაშინაც კი, როცა შედარებით მნიშვნელოვანი საქმე აქვთ გასაკეთებელი, რომელსაც არც ისე დიდი დრო სჭირდება, თუმცა მისი შედეგი ბევრად უფრო დიდი იქნება, ვიდრე დედლაინ-დაწესებული საქმისა.

პარადოქსი კი ის არის, რომ ცხოვრებაში ყველაზე მნიშვნელოვან საკითხებს საერთოდ არ აქვს დედლაინები, მაგალითად ისეთ რამეებს, როგორიცაა ცხოვრებისეული ღირებულებების შენარჩუნება - მეტი დროის დათმობა საკუთარი თავისა თუ ოჯახისთვის, სამსახურს მიღმა არსებული ცოდნის შეძენა, გაღრმავება და გამრავალფეროვნება, თუნდაც ახალი ენებისა თუ ახალი დისციპლინების სწავლა ან საერთოდაც - ექიმთან ვიზიტი. ადამიანთა უმეტესობა სამსახურში დაწესებული დედლაინების ხარჯზე ივიწყებს თვითგანვითარებას, საკუთარ ჰობის. მათ წლობით შეიძლება გადადონ ახალი ენის სწავლა, საბოლოოდ კი დრო მხოლოდ ვადებში ჩასატევ ამოცანებს შეალიონ და ვერ აისრულონ საკუთარი თავისთვის მიცემული პირობები.

იმისთვის, რომ დავაბალანსოთ სიტუაცია, სხვადასხვა სტრატეგიების გამოყენებაა შესაძლებელი. მაგალითად, განსაზღვრეთ სამსახურში თუ მის გარეთ რა არის მნიშვნელოვანი და პრიორიტეტული და მთელი ერთი დღე დაუთმეთ ამ კონკრეტულ საქმეს. ეცადეთ, მეორე საქმეზე არ გადახვიდეთ მანამ, სანამ კონკრეტულად პირველს არ დაასრულებთ, იმ შემთხვევაშიც კი, თუ ეს საქმე პერსონალურია და არა საქმიანი. ამ სტრატეგიის დახმარებით, შეძლებთ რომ საკუთარ თავსაც დაუთმოთ ადეკვატური დრო და საქმესაც არ მოსწყდეთ ხოლმე კეთების დროს.

დახარჯეთ რაც შეიძლება ნაკლები დრო უმნიშვნელო დავალებების კეთებაზე. სანამ დაიწყებთ მის შესრულებას, განსაზღვრეთ რა არის მოსალოდნელი შედეგი, ექნება თუ არა მას დიდი როლი საბოლოო შედეგის მიღწევაში. შეეცადეთ, რომ ეს უმნიშვნელო პატარა დავალებები დიდ და მნიშვნელოვან დავალებებში კომპონენტებად გააერთიანოთ და ხელშესახებ შედეგებამდე მიხვიდეთ. სწრაფი გადაწყვეტილების მიღების უნარი ასევე დაგეხმარებათ, ვინაიდან საქმის დაწყებამდე სწრაფად შეძლებთ ამ მოსალოდნელი შედეგების გაანალიზებას და შესაფერის სტრატეგიას მოარგებთ.

თანამედროვე ცხოვრებაში ძალიან მარტივია, რომ ისეთ ლაბირინთში მოვხვდეთ, სადაც ერთი და იმავე საქმის რუტინულად კეთება მოგვიწიოს, მივიღოთ ან გავცეთ ერთი და იგივე ინსტრუქციები. იმისთვის, რომ არ დაკარგოთ დრო წვრილმანების დევნაში, გაამარტივეთ თქვენი სამუშაო პროცესი, შექმენით განმეორებადი თასქების შაბლონები. შეეცადეთ იპოვოთ ყველაფერში ისეთი გამოსავალი, რაც დროის ინვესტიციის საშუალებას მოგცემთ და მომავალში დაგიზოგავთ მას. ხშირად დაიჭირეთ თადარიგი და ნუ დაელოდებით „ბოლო წუთს“, ეცადეთ, რომ თქვენი სამუშაოს პროცესი უფრო დიდ სურათზე დაინახოთ და ვიწრო გზების ძიების ნაცვლად შეძლოთ უფრო ფართომასშტაბიანი და რევოლუციური გამოსავლები იპოვოთ, რაც საშუალებას მოგცემთ, რომ ამოცანების შესრულების პროცესი თქვენთვისაც და თქვენი გუნდის წევრებისთვისაც გაამარტივოთ.