მოთხოვნა ბინებზე იკლებს, თუმცა ფასები არა

აღნიშნული შესახებ ვრცლად ისაუბრა BMGTV -ის გადაცემა „საქმიანი დილას“ ეთერში Sakura Properties-ის დამფუძნებელმა ვიქტორია საკუროვამ. მისი თქმით, - „მშენებარე ბინების შემთხვევაში დეველოპერები ფასს მოქნილი პირობებით ინარჩუნებენ, ეს მეორად ბაზარზე ვერ მოხდება, რაც უძრავ ქონებაზე ფასს ავტომატურად ამცირებს“. 

რაც შეეხება საკურორტო ქალაქებს, აღსანიშნავია რომ წინა წლის იმავე საანგარიშო პერიოდთან შედარებით ბათუმში საცხოვრებელი ბინების გაყიდვების რაოდენობა 11%-ით შემცირდა, ხოლო იმავე ბათუმში ბაზრის ზომა კი 17%-ით და 56 მილიონი აშშ დოლარი შეადგინა. ამის შესახებ „ქოლიერსის“ კვლევაშია აღნიშნული. მათივე ცნობით, ბათუმში 2023 წლის აგვისტოში ახალაშენებული ბინების ტრანზაქციების რაოდენობა 8%-ით შემცირდა, ძველი ბინების შემთხვევაში კი 41%-იანი კლება დაფიქსირდა.

უძრავ ქონებაზე ტრანზაქციებისა და ფასის კლებაზე მიუთითებს Galt & Taggart - გალტ & თაგარტის კვლევაც, რომლის მიხედვითაც თბილისში ბინების გაყიდვები წლიურად 9,3 %-ით შემცირდა. გალტ & თაგარტის კვლევის მიხედვით ბინების გაყიდვებში შემცირება განსაკუთრებით თბილისში მეორად ბაზარზეა საგრძნობი, სადაც 14.6%-იანი კლება შეინიშნება, მაშინ როდესაც ახალ აშენებული უძრავი ქონების ბაზარზე კლება მხოლოდ 1.7%-ია. 

გალტ & თაგარტის კვლევის მიხედვით შემცირება თბილისის ყველა უბანს ეხება, სადაც გამონაკლისი მხოლოდ დიდი დიღომია და ზრდა შენარჩუნებულია, თუმცა აღნიშნული სავარაუდოდ ამ უბანში უძრავ ქონებაზე დაბალი ფასით არის განპირობებული. ასევე, წინა წლის იმავე საანგარიშო პერიოდთან შედარებით, გაყიდვები გაზრდილია ნაძალადევშიც. კვლევის თანახმად გაყიდვებში კვლავ მზარდია 51-დან 80 კვადრატულ მეტრამდე ზომის და საშუალო და მაღალი კლასის სეგმენტის ბინები.

მომავალში სავარაუდოა რომ საცხოვრებელი უძრავი ქონების გაყიდვებზე მიგრანტების გავლენა კიდევ უფრო შემცირდება, რაც საბოლოოდ პირდაპირ აისახება მეორად ბაზარზე. ხოლო, ახალ აშენებული ბინების ბაზარზე როგორც გაყიდვების მაჩვენებელი, ასევე ფასები დამოკიდებული იქნება, პირობებზე, რომელსაც დეველოპერული კომპანიები უძრავი ქონების მომავალ მესაკუთრეებს შესთავაზებენ. 

აღნიშნული ასევე დამოკიდებულია საფინანსო ინსტიტუტებზე, საბანკო სექტორის მიერ შემოთავაზებულ პირობებზე, რომლებიც თავის მხრივ, უკანასკნელ პერიოდში განვითარებული მოვლენების შედეგად საკმაოდ რთულ სიტუაციაში აღმოჩნდნენ.