ზრდის თუ არა კონკურენტუნარიანობას ტრენინგების გავლა?

ტრენინგები და არაფორმალური განათლება დღევანდელობის განუყრელი ნაწილი გახდა. სემინარებისა და მოკლევადიანი კურსების დახმარებით ადამიანებს ეძლევათ შესაძლებლობა, რომ დაეუფლონ ახალ ცოდნას და მიიღონ ახალი გამოცდილებები იმაზე ბევრად უფრო მოკლე დროში, ვიდრე ამას უნივერსიტეტი სთავაზობს.

გარდა იმისა, რომ ტრენინგებს დროის რესურსის დაზოგვა შეუძლია ადამიანებისთვის და საკმაოდ მცირე დროში დიდი მასალის დაუფლების შესაძლებლობას იძლევა, თანამედროვეობაში სინათლის სისწრაფით ჩნდება ახალი მიმართულებები და ფაქტობრივად შეუძლებელია, რომ მათ შესასწავლად აკადემიურ საფეხურზე შემუშავდეს შესაბამისი მოდულები და სილაბუსები, ვინდიდან სანამ ბიუროკრატიის ყველა ეტაპს გაივლის პროგრამა და აკრედიტაციას/ავტორიზაციას მიიღებს, შეიძლება უკვე მრავალი სიახლეც იყოს დანერგილი და ეს პროგრამა უკვე მოძველებულადაც ჩაითვალოს. სწორედ ამიტომ უფრო მომგებიანია სხვადასხვა ტრენინგების გავლა. თუმცა ცხადია, აქაც გვმართებს სიფრთხილე, ტრენინგი უნდა შევარჩიოთ დიდი ყურადღებით, რათა ცოდნა-გამოცდილება და პრაქტიკა მივიღოთ ნამდვილად საკითხის საფუძვლიანად მცოდნე მენტორისგან და არა უბრალო მოყვარულისგან.

ასევე, მნიშვნელოვანია, რომ ტრენინგების გავლა არამც და არამც არ ნიშნავს კურსის ბოლოს მოპოვებულ სერტიფიკატს. ყველაზე მთავარი ტრენინგიდან მიღებული ცოდნაა, რომლის პრაქტიკაში გამოყენებასაც შეძლებთ და კვალიფიკაციას აიმაღლებთ. ტრენინგების გავლის მიზანი სხვადასხვა შეიძლება იყოს: მაგალითად თქვენთვის საინტერესო სფეროს შესახებ საბაზისო ან პროფესიონალური ინფორმაციის მიღება, ასევე, შეიძლება თქვენივე სამუშაო სფეროში კვალიფიკაციის დონის ამაღლება ან დამატებით უნარებზე და ცოდნებზე მუშაობა იყოს საჭირო და შესაბამისად გჭირდებოდეთ კურსების გავლა.

არსებობს გარკვეული კურსები/ტრენინგები, რომელთა გავლის შემდეგ ბარდება სპეციალური გამოცდა, რისი ჩაბარების შემდეგაც თქვენი კვალიფიკაცია უფრო მაღლდება და ბაზარზე დასაქმებისთვის უფრო მაღალანაზღაურებადი კანდიდატი ხდებით, რადგან შეიძლება ითქვას, რომ გაქვთ გარკვეული ლიცენზია. რომ შევადაროთ აკადემიურ ხარისხებს, განსხვავება ბაკალავრს, მაგისტრსა და დოქტორს შორის აისახება მათი დასაქმების სფეროსა თუ თანამდებობაზეც, ასევეა ტრენინგების შემდეგ მოპოვებული მრავალფეროვანი ცოდნებიც. შესაბამისი ტრენინგების გავლა შეიძლება ცალსახად ითქვას, რომ ზრდის კონკურენტუნარიანობას, მეტი ცოდნით და უნარით უფრო სასურველი კანდიდატი ხდებით დამსაქმებლისთვის და თქვენი ღირებულებაც, როგორც ანაზღაურების მხრივ, ისე რესურსის სახით, იმატებს.

ტრენინგის გავლამდე, თუკი მას თქვენი ძალებით მოიძიებთ, აუცილებელია, რომ გაიკითხოთ ტრენინგის ხარისხი იმ ადამიანებთან, ვინც უკვე გაიარა ის. ასევე ნახოთ ინფორმაცია ტრენერის თაობაზე, თუ ის თქვენთვის უცნობია, მოიძიეთ მის შესახებ ინფორმაცია ინტერნეტში, გაიკითხეთ თუ გყავთ საერთო ნაცნობები და იკითხეთ დახასიათება, რა გამოცდილება აქვს, რამდენად კარგი გადმოცემის უნარი აქვს და ა.შ. ასევე, იუთუბზე შეიძლება ნახოთ ნაწყვეტები მისი ადრე ჩატარებული ტრენინგებიდან და შეგექმნებათ შთაბეჭდილება მასთან ტრენინგის ფორმატზეც. როგორც დასაწყისში აღვნიშნეთ, სჯობს, რომ გამოცდილ ტრენერთან გაიაროთ კურსები, რათა დარწმუნებული იყოთ, რომ ეს ადამიანი თავისი საქმის უბადლო მცოდნეა და ასევე, ტრენინგის მონაწილეებისთვის რა ასპექტებზე როგორი მიდგომაა საჭირო, ამაშიც ერკვევა.

რიგ შემთხვევაში, ტრენინგების საჭიროებას განსაზღვრავს დამსაქმებელი და თავადვე უზრუნველყოფს დასაქმებულისთვის ტრენინგის დაგეგმვას, ზოგჯერ კი არის შემთხვევები, როდესაც თავად თანამშრომელს სთხოვს, რომ მოიძიოს მისთვის მისაღები ამა თუ იმ საკითხის ტრენინგი და ძებნაც დასაქმებულს უწევს. თუკი თქვენი შემთხვევაც ამ უკანასკნელის მსგავსია, ან უბრალოდ თქვენივე სურვილით ეძებთ ტრენინგებს ისეთ სფეროში, რომელშიც აქამდე გამოცდილება არ გქონიათ და შესწავლა გსურთ, ss.ge-ს ტრენინგების განყოფილება ამისთვის საკმაოდ ფართო არჩევანს გთავაზობთ და შეგიძლიათ სასურველი და საჭირო ტრენინგები მარტივად და სწრაფად იპოვოთ და გაიაროთ.