ძველი შენობის რესტავრაცია: გადაკეთება საცხოვრებლად

ძველი ნივთებისთვის ახალი სიცოცხლის მიცემა რენოვაციისთვის საკმაოდ კარგი გამოსავალია. ბიუჯეტური გზაა იმისთვის, რომ სახლში მუდამ თანამედროვე და „ახალი“ ნივთები ზედმეტი თანხის გადახდის გარეშე გქონდეთ. გამონაკლისი არც შენობაა, უბრალოდ იმ განსხვავებით, რომ რემონტი უფასო ნამდვილად არ იქნება.

ძველი შენობები განსაკუთრებული არქიტექტურის და სტილის მატარებელია, მათ რესტავრაციას და რენოვაციას თუ გადაწყვეტთ, ეცადეთ, რომ ორიგინალური სტილი არ დაუკარგოთ, თუმცა თანამედროვეობასაც მოარგეთ. ჩვენი დედაქალაქის ძველ უბნებში არქიტექტურულად საკმაოდ გამორჩეული შენობებია, განსაკუთრებით: ძველ თბილისში, სოლოლაკში, მთაწმინდასა და ვერაზე. მათი ნაწილი რესტავრირებულია, ნაწილი კი - რესტავრაციის მოლოდინში - მათი სიძველისა და ავარიულობიდან გამომდინარე.

რესტავრაციის შედეგად საცხოვრებლად გადაკეთებული სახლები თითქოს თავის ისტორიასაც ატარებს, რაც იმაში გამოიხატება, რომ არ კარგავს თავის პირვანდელ სახეს, თუმცა დღემდე საცხოვრებლად ვარგისია და ინტერიერის ცვლილების წყალობით, თანამედროვედაც გამოიყურება. დიზაინერების დახმარებით, ეს ორსახოვნება შესაძლებელია რომ თავისუფლად იქნას შენარჩუნებული. განსაკუთრებით საინტერესო და მიმზიდველი ხდება მსგავსი სახლები ტურისტებისთვის. უცხოელებზე გასაქირავებლად თბილისის ისტორიულ უბნებში ასევე ისტორიული შენობა-ნაგებობები თანამედროვე და კომფორტული აღჭურვილობით, ფაქტობრივად მომგებიანი პროექტი და შემოსავლის წყაროა.

ვინაიდან ექსტერიერზე და მის მომხიბვლელობაზე ასე თუ ისე ვისაუბრეთ, გირჩევდით, რომ ცვლილებებს ნუ შეიტანთ ფასადზე, რაც შეეხება იმას, თუ რისი შეცვლა დააპრიორიტეტოთ ძველი სახლების ინტერიერში, რომ ცხოვრება უსაფრთხო და კომფორტული იყოს, პირველ რიგში, შეაფასეთ მისი მდგომარეობა, რამდენად გაუძლებს საფუძვლიან რემონტს სიმყარიდან გამომდინარე. გახსოვდეთ, რომ ძველ სახლებს საკმაოდ სქელი კედლები აქვს თანამედროვე კორპუსებისგან განსხვავებით, ასევე მაღალი ჭერი და დიდი ფანჯრები, ვიტრაჟების სტილში. მისი იერსახის შენარჩუნება დაგეხმარებათ, რომ ბინა ნათელი დარჩეს, მაღალი ჭერი კი შესაძლებლობას მოგცემთ, რომ ანტრესოლიც გააკეთოთ და მეორე სართულზე დასაძინებელი სივრცე მოაწყოთ. ასევე, შეარჩიეთ ნეიტრალური ფერები, რათა კოსმეტიკური რემონტი ხშირად არ დაგჭირდეთ ფერთა პალიტრის განახლების მიზნით, ეცადეთ, რომ მოდური ფერები მხოლოდ აქსესუარებში გამოიყენოთ, რის შეცვლასაც მარტივად შეძლებთ.

ინტერიერის დიზაინის გადაწყვეტამდე, აუცილებელია, რომ ძველი შენობის გაყვანილობები მოაწესრიგოთ და თანმდევი პრობლემები მოაგვაროთ. მაგალითად, შესაძლოა იყოს ნესტის პრობლემა, გამოსაცვლელი იყოს წყლის მილები, რადგან დიდი ალბათობაა, რომ სიძველიდან გამომდინარე ჟონავდეს. ასევე, მნიშვნელოვანი პრობლემაა ბზარები და შესაძლოა შენობას გამაგრებითი სამუშაოების ჩატარებაც კი სჭირდებოდეს. იმისთვის, რომ თავი უსაფრთხოდ იგრძნოთ სახლში, მთავარია საძირკველი და საყრდენი მყარი გქონდეთ, ასევე - ჭერიც. განსაკუთრებით კი, თუკი თქვენს ზემოთ მთლიანი შენობის სახურავია.

რომ შევაჯამოთ, ძველი შენობის რესტავრაცია და საცხოვრებლად გადაკეთება საკმაოდ საინტერესო პროცესია და კრეატივს შეგიძლიათ მისცეთ გზა, თუმცა ამავდროულად საკმაოდ შრომატევადი და საპასუხისმგებლო პროცესიცაა, ვინაიდან გასათვალისწინებელი ფაქტორებია შენობის ექსპლუატაციის ვადა, საერთო მდგომარეობა და უსაფრთხოების საკითხები.