სოციალური მედიისა და პროფესიული პლატფორმის მნიშვნელობა კარიერისთვის

ციფრულ საუკუნეში ინტერნეტი და სოციალური ქსელები ერთერთი მთავარი ინსტრუმენტია თვითპრეზენტაციისთვის, საკუთარი თავისა და შესაძლებლობების გამოსავლენად და მიღწევების გაზიარებისთვის.

დღესდღეობით არაერთი სოციალური ქსელი ფუნქციონირებს ბაზარზე და ყველა მათგანს თავისი დანიშნულება აქვს, შესაბამისად დამკვიდრებული აქვთ თავიანთი ადგილიც. არის სოციალური ქსელები, სადაც მხოლოდ ფოტოების გაზიარებაა შესაძლებელი, საკუთარი პირადი ცხოვრების, ბედნიერი მომენტების, არაფორმალური ხასიათის კონტენტის განთავსებით შეგიძლიათ სხვებსაც მისცეთ საშუალება თქვენი ამბების ნაწილი გახდნენ თუნდაც თქვენს ფოტოებზე გულებისა თუ კომენტარების დაწერით - ეს ინსტაგრამია. არის სოციალური ქსელი, რომელშიც გარდა ფოტოებისა, ახალი ამბების გაზიარება შეგიძლიათ, თქვენი მოსაზრების დაფიქსირება, ჯგუფების შექმნა და დისკუსიების წამოწყება, მოკლედ, ეს ფეისბუქია და კომუნიკაციის ჯერჯერობით ყველაზე ფართო არეალი სწორედ ფეისბუქზე იქმნება მრავალი სხვა ფუნქციონალის დახმარებით. არის ასევე X, რომელიც წლების განმავლობაში ტვიტერის სახელით იყო ცნობილი და აქ ახალი ამბების რაც შეიძლება ლაკონიურად გაზიარება ხდება, შეზღუდული სიმბოლიკების რაოდენობიდან გამომდინარე სწრაფად და მარტივად გაზიარებადი სიახლეების პლატფორმაა.

არსებობს ლინკდინიც, რომელიც წმინდად კარიერული მნიშვნელობის სოციალური ქსელია და ამ პლატფორმაზე ადამიანები არ აზიარებენ თავიანთი სადილის ფოტოს, არ უზიარებენ ერთმანეთს მუსიკას, სელფებსა თუ არასაქმიან საკითხებთან დაკავშირებულ კონტენტს. ლინკდინზე ადამიანები აზიარებენ თავიანთ კარიერულ მიღწევებს, უნარებს, განათლებას, სამსახურების გამოცდილებებს, ერთი სიტყვით, ლინკდინის About კატეგორია „მინი-რეზიუმეა“, პროფილის ფოტოს სტანდარტიც საქმიანი ფოტოს დაყენებას მოითხოვს (თუმცა, რა თქმა უნდა, არსებობენ გამონაკლისებიც). ლინკდინი თავისი ფუნქციებით მომხმარებელს სთავაზობს, რომ თავისი ინტერესების გათვალისწინებით, მოიძიოს სასურველი სამსახური, დამსაქმებლებს კი ეხმარება კანდიდატების მოძიებაში.

სოციალური მედია, როგორც დასაწყისში აღვნიშნეთ, ერთერთი ძალიან მნიშვნელოვანი ინსტრუმენტია თვითპრეზენტაციისთვის და სწორედ საქმიანი და პროფესიული პლატფორმების გამოყენებით, შესაძლებელია, რომ ნეთვორქინგის წყალობით შეხვდეთ სწორ ადამიანებს, რომლებთანაც შემდგომ შრომითი ურთიერთობა შეიძლება წამოიწყოთ. ამ პლატფორმის ალგორითმი ხშირ შემთხვევაში თავადაც გთავაზობთ თქვენთვის შესაფერის ვაკანსიებს, თუკი თქვენს პროფაილში სრული სიზუსტით გაქვთ შევსებული თქვენ შესახებ ინფორმაცია, დაწყებული სამუშაო გამოცდილებითა და განათლებით, ასევე ინტერესებითა და უნარებით. ლინკდინი ასევე სთავაზობს მომხმარებელს, რომ ამავე პლატფორმაზე გაიაროს ტრენინგები და დასრულების შემდეგ მიღებული სერტიფიკატები გააზიაროს თავის პროფაილზე. ასეა თუ ისე, პროფესიული პლატფორმა სწორედ ის ადგილია, სადაც ზედმეტ თავმომწონეობად არავის მოეჩვენება თუკი თქვენს მიღწევებს გაუზიარებთ თქვენს მეგობრებსა თუ კონტაქტებს, რადგან ის ზუსტად ამისთვის არსებობს და აქ ყველა ამას აკეთებს.

არაერთი ადამიანია, რომელმაც სამსახური სწორედ სოციალური პლატფორმის დახმარებით იპოვა, ასევე არაერთი კომპანიაა, რომლის გაზიარებულმა ინფორმაციამაც სწორ ადრესატამდე მიაღწია და სამსახურისა და თანამშრომლების მაძიებლები ერთმანეთს შეახვედრა.

მნიშვნელოვანია, რომ სოციალურ ქსელში აქტიური იყოთ, მუდმივად განაახლოთ ინფორმაცია თქვენ შესახებ, რომ პოტენციური დამსაქმებლები ძველმა ინფორმაციამ შეცდომაში არ შეიყვანოს. ასევე, შეინარჩუნეთ საქმიანი იმიჯი, ყველა სოციალური პლატფორმა თავისი დანიშნულებით გამოიყენეთ და პროფესიულ პლატფორმაზე ნუ გააზიარებთ გასართობ კონტენტს. შეარჩიეთ ისეთი ფოტოსურათი, სადაც კარგად ჩანხართ და შედარებით საქმიანი იერი გაქვთ, ნუ შეაჩერებთ არჩევანს სელფზე, ან ფოტოზე რომელშიც ცუდად ჩანხართ, გიკეთიათ მზის სათვალე, ხართ ვინმესთან ერთად და ა.შ. ასევე მიაქციეთ ყურადღება ფოტოს ხარისხს. გახსოვდეთ, რომ საქმიანი პლატფორმები არ არის ადგილი „ფოტოებზე ლაიქების დასაგროვებლად“. აზიარეთ ისეთი კონტენტი, რაც თქვენს ინტერესებში შედის კარიერული თვალსაზრისით, წამოიწყეთ დისკუსიები ან მონაწილეობა მიიღეთ უკვე არსებულში, დააფიქსირეთ და გამოხატეთ თქვენი აზრი კონსტრუქციულად და კორექტულად. პროფესიული პლატფორმა სწორედ ის ადგილია, სადაც ჯანსაღი დისკუსიების მეშვეობით ხდება აზრთა მიმოცვლა, ახალი ადამიანების გაცნობა, კონტაქტების შეძენა, ახალი ინფორმაციის მიღება და გაცემა და ა.შ.

წარმოიდგინეთ, რომ თუკი სოციალურ ქსელში შექმნილი ოფიციალური გვერდები კომპანიების სავიზიტო ბარათია, თქვენი პირადი პროფაილი სწორედ თქვენს სავიზიტო ბარათს წარმოადგენს და არც ისე იშვიათად, ადამიანზე მეტი წარმოდგენის შექმნის მიზნით, მათ სოციალურ ქსელებს სტუმრობენ დაინტერესებული პირები. სწორედ ასე იქმნება პირველადი შთაბეჭდილებები, ვიდრე პირადად დამყარდება კომუნიკაცია, ამიტომ მნიშვნელოვანია გახსოვდეთ, რომ რაც უფრო მეტი ინფორმაცია გაქვთ საჯაროდ ხელმმისაწვდომი, მით უფრო დიდ სივრცეს უტოვებთ სხვა ადამიანებს თქვენ მიმართ თავიანთი სუბიექტური დამოკიდებულების ჩამოსაყალიბებლად.