რას ნიშნავს ენერგოეფექტურობა და როგორია ის სამშენებლო ინდუსტრიაში?

კლიმატის ცვლილებების გამომწვევი ერთერთი მთავარი მიზეზი არაეფექტურად გამოყენებული ენერგიაა, რამაც შესაძლოა ეკოლოგიურ კრიზისამდეც მიგვიყვანოს. დაბინძურებული გარემო კი არამხოლოდ უბრალო მოცემულობაა, არამედ ის ჩვენს ჯანმრთელობაზეც სავალალოდ აისახება. იმისთვის, რომ შევამციროთ ენერგიის არამიზნობრივი მოხმარება, ყველა სფეროში უნდა შევიტანოთ შესაბამისი წვლილი.

რაც შეეხება სამშენებლო ინდუსტრიას, ენერგოეფექტური მასალები დღესდღეობით მშენებლობაშიც გამოიყენება, რათა რაც შეიძლება ნაკლები საფრთხე შეექმნას ჩვენს ჯანმრთელობას. ჩვენს სტატიებში შეხვდებოდით ეკოლოგიურად სუფთა სამშენებლო მასალების შესახებ ინფორმაციას, თუმცა აქ ვისაუბრებთ რას ნიშნავს ენერგოეფექტურობა და რა ფორმით გამოიყენება ის სამშენებლო ინდუსტრიაში.

ენერგოეფექტურობის დახმარებით სამრეწველო-საყოფაცხოვრებო-სამშენებლო პროცესებში შედეგი და სარგებელი უცვლელი რჩება, თუმცა მისი რესურსის გამოყენება ხდება მაქსიმალური შეზღუდვითა და ოპტიმალური გამოყენებით, ანუ მარტივად რომ ვთქვათ - არ იფლანგება. მისი მთავარი პრინციპის თანახმად, ენერგიის წარმოებაზე მნიშვნელოვანი მისი დაზოგვაა. გარდა ჯანმრთელობაში შეტანილი წვლილისა, ენერგოეფექტურობის ხარჯზე სახლში ტემპერატურაც კი სტაბილურდება და კომუნალური გადასახადები მცირდება. ენერგოეფექტურობის ძირითადი ნაწილი გარე ფასადების დათბუნებაა, მასალებად გამოიყენება მაღალი ხარისხის კარ-ფანჯრები, დაბალემისიური მინაპარკეტი და სხვ. ასევე, ცნობილია სამშენებლო ბლოკებში სტანდარტული ბლოკისგან განსხვავებული - იტონგის ბლოკი, რომელიც 6-ჯერ ნაკლებად თბოგამტარია და ამით უპირატესია სტანდარტულზე. მისი გამოყენებით, ოთახში ნარჩუნდება ტემპერატურა და გათბობა-გაგრილებისას დაახლოებით 40%-ით ნაკლები ენერგია იხარჯება. აქედან გამომდინარე გათბობისა თუ კონდიციონერის ხარჯები შეგიმცირდებათ, რაგდან ელექტრომოწყობილობების გამოყენება უფრო ნაკლებად მოგიწევთ.

გარდა ბლოკისა, საინტერესოა ენერგოეფექტურობით გამორჩეული დაბალემისიური მინა, რომელიც ამცირებს ულტრაიისფერი და ინფრაწითელი სხივების შემოდინებას ოთახში, სინათლე უცვლელად შემოდის მისი გამჭვირვალობის წყალობით, ხოლო ტემპერატურა არ იზრდება და ოთახში არსებული ტემპერატურა ნარჩუნდება სტაბილურად.

მესამე ნაწილია - ჭერი. სახურავის იზოლაცია შედარებით უფრო მნიშვნელოვანია დაბალი შენობებისთვის. სახურავის იზოლაციისთვის გამოიყენება ისეთი მასალები როგორიცაა ქვაბამბა, პენოფოლი, მინერალური ბამბა და სხვ.

ასევე გასათვალისწინებელია, რომ შესაძლოა ენერგოეფექტური მასალების სიძვირიდან გამომდინარე, სრულად ენერგოეფექტური სახლის აშენება უფრო ძვირი დაგიჯდეთ, თუმცა გრძელვადიან პერსპექტივაში უნდა იცოდეთ, რომ დაახლოებით 50% ენერგიას დაგიზოგავთ ენერგოეფექტურ სახლში ცხოვრება.